你唔好咁啦，我想打機啊！
對好多男士嚟講，浪漫依家嘢除咗豆腐火腩飯之外，就係咩都唔使煩咁沉浸喺遊戲世界入面，暫時拋低一切嚟自生活同工作嘅煩惱，一個靜靜地喺屋企打吓機。2019年香港同香港人都過得好艱難，現實世界唔如意嘅事，唔少人都嘗試用遊戲嚟緩解，抖一抖，等自己狀態好啲，先再振作奮鬥落去！不如今日就等DailyView為大家講吓今年新出嘅PS4十大熱門遊戲，畀大家參加吓有咩可以玩一玩，休一休息啦。
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 《星球大戰絕地：組織殞落》
《星球大戰》可以話係紅遍住世界，各國都有好多忠實Fans深愛依個充滿原力嘅世界。依隻《星球大戰絕地：組織殞落》就畀咗個機會畀一眾新舊星戰迷，齊齊扮演一個絕地學徒，喺俾帝國追殺嘅情況下，用光劍同原力慢慢咁成為絕地武士。好多玩家都話隻Game嘅星球設計睇得出好畀心機，玩法有解謎，而打鬥就少少似魂類Game，係一隻唔錯嘅遊戲。
9 《人中之龍 5 夢 實踐者》
《人中之龍》系列遊戲拳拳到肉嘅打撃感加上多樣化嘅支線小遊戲（有唔少男士都好鍾意嘅夜總會），吸引唔少玩家追捧，今次《人中之龍 5》一出梗係即刻備受關注啦！今集玩家可以用桐生一馬、冴島大河、秋山駿、澤村遙、同品田辰雄，喺札幌、東京、名古屋、大阪同福岡到過關軟將，瘋狂打出「王龍之極」同「究極之極」，一齊為夢想努力！
8 《伊蘇IX -怪人之夜- 》
日本老牌嘅動作角色扮演遊戲《伊蘇》真係好紅，紅到出埋小說、漫畫同動畫，今年佢哋終於推出到第9集喇！一個又一個同伴、快節奏嘅戰鬥、熱血音樂，成隻Game畀人個感覺都非常日本！今次有全新嘅「異能動作」系統，唔同嘅「怪人」伙伴都可以有唔同嘅「異能」，飛簷走壁不再是夢啊！加上今次開放度過嘅地圖，玩家真係可以用「異能」周圍去啊！
7 《莎木 3》
唔少香港80後玩過《莎木》、《莎木2》系列，一直默默咁等待續作出現，直到18年後嘅2019，終於等到《莎木 3》面世。依隻Game經過被冷藏、募資、製作、延期又延期，一眾舊玩家終於再一次望到「芭月涼」同「莎花」！有好多人都話，一開Game聽到個音樂，就忍唔住淚眼汪汪。誇張？梗係唔係啦！依隻唔止係Game，而係童年嘅歲月同埋集體回憶啊！
6 《血咒之城：暗夜儀式》
知名遊戲製作人「IGA」募資製作而成嘅遊戲號稱係惡魔城嘅精神續集，一推出就引起好多人課金支持，金額仲超出原本預算好多。的確不枉Fans咁熱衷籌募資金，呢隻Game雖然拖咗四年，但出到嚟依然係非常有誠意嘅作品。2.5D嘅橫移模式，用女主角去過關斬將，個Feel真係好滿足到惡魔城Fans嘅回憶，雖然有唔少Bug，但一反映就即刻修正，所以好多Fans都好埋單，好評如潮！
5 《新櫻花大戰》
當《新櫻花大戰》嘅主題曲一響起，相信好多人嘅童年回憶都即刻返返嚟。呢隻Game分咗冒險同埋戰鬥兩部分，冒險部分男主角可以周圍走，跟返故事主線情節，同時探索帝都地圖。而最受Fans（宅男）喜愛嘅就係溝女模式，玩家可以化身花心大蘿蔔，周圍去溝女增加好感度。戰鬥模式都好爽，可以同隊員做「合體攻擊」，真係怪唔得宅男咁鍾意。
4 《往日不再》
《往日不再》呢隻Game其實俾好多國內外嘅遊戲媒體評得唔係太高分，但係銷量同埋玩家好評度又算係幾好，真係專業評級同埋玩家需求其實都有一定落差。遊戲以末日作為背景，以男主角嘅角度進行主線情節，過吓末日生活、累積資源，應付一大班喪屍同埋醉酒佬，繼而清除佢哋嘅過程，真係畀人一種末日嘅感覺！
3 《惡魔獵人 5》
惡魔獵人，亦即係大家所講嘅「DMC」，成個系列講求嘅都係靚、型。第五代都係老樣子，行嘅係好玩家取向嘅設計，過場有好好聽嘅音樂，同埋好惡搞嘅情節。玩家用但丁、尼祿同埋V嚟到去進行惡魔狩獵嘅工作。玩家用各種招式同武器對抗惡魔，然後由系統畀分，所以玩家做到幾多Combo就好緊要，點樣連技連得又爽又型又高分，就係呢隻Game嘅精髓所在。
2 《王國之心 3》
王國之心系列係一款好Hit嘅動作角色扮演遊戲，遊戲世界入面包含左唔同既迪士尼同Final Fantasy 嘅角色同埋劇情。唔少玩家話今次《王國之心 3》嘅戰鬥系統爽咗，再結合埋多個迪士尼故事劇情，遊戲加埋咁多個可愛嘅迪士尼人物，喺唔同世界入面仲會有華麗嘅動畫播出，真係又睇得又玩得啊。相信唔少玩家覺得2012年等到依家係值得㗎啦！
1 《死亡擱淺》
《死亡擱淺》係由日本知名設計師小島秀夫製作，佢由《潛龍諜影》系列以嚟就收穫咗好多Fans，喺香港備受關注。好多玩家玩完呢隻Game之後，都覺得打機好似睇電影咁，代入感好足。另外有玩家話玩到尾都未知道隻Game講緊咩，直到睇完兩個鐘電影之後，先知道遊戲同電影之間嘅關聯性，紛紛讚嘆依隻Game嘅巧思同世界觀真係好強。
【以上圖文為香港網路溫度計調查結果，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年01月01日至2019年12月26日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『2019年PS4遊戲』相關文本進行分析，並根據網友就該議題之討論及結合「巴哈論壇追蹤數」，以各佔50％的比例排名，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
分享本篇文章
你可能也會喜歡這些文章 :