放假淨係行商場？
image source: 民政事務總署
成日放假都唔知去邊好，覺得好無聊？香港雖然細，但其實仲有好多打卡秘境你可能未去過！例如係綠蛋島、張保仔洞(長洲)、銀礦灣、鹽田梓⋯⋯呢幾個都係遠離城市煩囂，可以係假日安排出遊嘅地方，但想知邊啲打卡秘境最多人討論？今日就跟著網路溫度計，細數香港打卡熱點 TOP 10 討論排行！跟住我哋一齊香港輕度遊。
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
NO.10 屏山文物徑
屏山文物徑位於天水圍，地理位置嚟講唔係咁容易到達，但文物徑勝在短短一個鐘就睇到超過十幾樣古蹟，例如覲庭書室、鄧公祠、聚星樓，最啱一家大細去睇古蹟同歷史建築物，同時了解到傳統面貌和鄉村嘅生活文化！好似穿越咗時光隧道，突然變咗古代探險家！再加埋青山綠樹、清新空氣，好值得放假一齊去打卡冒險！ 網民：「返工壓力大都可以嚟呢度放鬆心情！」
NO.9 美利樓
其中令外國人樂而忘返嘅香港地方——赤柱美利樓，擁有超過160年歷史，中西混合嘅建築風格，加上日落夕陽，夜晚繁星嘅景色真心一流！而帝樂德國餐廳King Ludwig Beerhall 喺美利樓開業逾20年，今年4月突然執笠，唔少網友都認為成個赤柱愈嚟愈冷清；有網友就話美利樓應該攞嚟做博物館，唔係做餐廳！你又點睇？ 網民：「以前係拍拖，求婚，紀念日嘅地方！」
NO.8 西貢碼頭
西貢碼頭有清新嘅海風，迷人嘅海景，仲有好多間餐廳同商店，可以一邊食嘢一邊欣賞風景，仲可以出海玩水上活動，好啱帶另一半嚟放鬆，人潮最誇張嗰陣出返市區都要成3粒鐘！而成為熱門討論嘅原因喺舊年7月喺西貢碼頭發現受傷鯨魚，一時引起唔少網友討論！希望鯨魚可以大步檻過，但不幸嘅係半個月後就發現鯨魚喺西貢牛尾洲附近反肚⋯⋯ 網民：「政府反應太慢！」
NO.7 萬宜水庫
大家中、小學時期學校旅行都有可能嚟過，但壯麗嘅自然景觀永遠都睇唔厭，人流唔多又易行，一望無際嘅天空仲好適合去觀星添！呢個地方紅到連內地旅客都慕名而來，但千祈唔好學佢哋紅雨都照出發，咁樣只會被困！另一個多人討論嘅原因係上文所述嘅鯨魚被政府安排喺萬宜水庫，網友們紛紛討伐「知唔知咩叫鯨落？」。
網民：「成日都好多非法入境者喺萬宜水庫⋯⋯」
NO.6 赤柱廣場
赤柱廣場獨特嘅歐風建築，吃、喝、玩樂、購物應有盡有，好似走入一個歐洲小鎮咁，好有情調！赤柱廣場嘅Marketing 非常有創意，舊年決定以澳式聖誕做主題，等大家慳返程機票錢就享受到仲夏feel到不一樣嘅聖誕！其實佢哋一直都有豐富多彩嘅活動，得閒可以去一日遊，除咗赤柱廣場，仲可以沿住海邊行，非常寫意！
網民：「想感受異國風情必去！」
NO.5 數碼港
數碼港唔單止係創新科技公司嘅工作場所，附近嘅海濱公園擁有大片草地同無敵海景，最啱帶小朋友同寵物放電同影靚相！而數碼港商場不定期都會搞展覽或活動，之前搞過「梵花活現數碼港」，融合藝術與科技，非常有趣！仲有好多嘅娛樂設施同餐廳，實在方便又舒適！總括嚟講，數碼港集科技、娛樂同休閒於一身，絕對係打卡必到之處！
網民：「唔係住南區都好少去！」
NO.4 太平山山頂
太平山山頂最勁嘅係可以飽覽維多利亞港嘅全貌同埋九龍半島嘅景色，年年煙花唔少人都特登上去觀賞。另外，太平山山頂都係攝影愛好者嘅天堂，每日唔同嘅天氣同光線帶嚟唔同嘅景致，滿足你嘅攝影慾望！不過，太平山山頂歷史悠久，喺山上又多樹，自然有好多「都市傳說」，仲有市民嘅車cam影到紅衣女鬼添！上去要小心啲啦～
網民：「太平山唔太平，日頭去行山就得！」
NO.3 石澳村
唔少人都將石澳村睇做一個靈感源泉同文化交流嘅地方，除咗有最出名嘅係迷人嘅石澳泳灘，隨時喺街都可以見到色彩繽紛嘅歐式小屋，最啱打卡！不過舊年一場世紀雨災，打破咗石澳村一直以嚟嘅寧靜，斷水又斷糧，慘變荒島！好彩過去嘅5月頭，政府喺石澳村舉行跨部門演習，以應對突發惡劣天氣，為未來做足預備！
網民：「原來《喜劇之王》喺石澳拍！可以去打卡～」
NO.2 黃金海岸
黃金海岸位於屯門，離市區有一段距離，但交通未算複雜，假日可以安排一個「偽外地旅行」Trip，因為黃金海岸以地中海風格設計，周圍嘅餐廳同酒吧非常有異國風情！雖然海灘係人工而成，但勝在水質唔錯，環境乾淨，成為玩水上活動嘅熱門景點！如果唔想咁趕，仲可以Book埋黃金海岸酒店，時不時做優惠，價格都幾吸引，喺一個好好嘅Staycation 享受多姿多彩假期嘅理想去處！
網民：「黃金海岸夜晚去好浪漫，酒店自助餐都幾抵食」
NO.1 大嶼山-大佛與心經簡林
大嶼山好有可能一日玩唔晒，點解？昂坪360、天壇大佛、心經簡林呢啲遊客必去嘅就唔洗多講啦！玩大嶼山仲可以上山下海添！就好似長沙泳灘、鳳凰徑等等⋯⋯而除咗天然景觀吸引，文化遺產都值得一睇，例如大澳天后廟、大澳漁村⋯⋯唔只可以感受宗教氛圍，仲可以欣賞到古老嘅建築設計同文化意義。處處都係秘境可以瘋狂影靚相，絕對係一個難忘嘅體驗！
網民：「心經簡林行好耐，但好值得！」
其實香港秘境打卡聖地又點止十個呀？放假坐半粒鐘船去長洲搵張保仔洞探險又得，去鹽田梓體驗獨特本土嘅文化遺產又得，鍾意刺激活動嘅就可以去綠蛋島玩水上活動，其實香港都唔係好無聊啫！即刻約埋班frd 去玩啦！
【以上圖文為香港網路溫度計調查結果，未經授權請勿轉載改寫】
分析說明：
本研究資料由《KEYPO大數據關鍵引擎》提供，分析時間範圍為2023年5月18日至2024年5月17日。KEYPO觀測港澳地區萬個網站頻道，包含新聞媒體、Facebook、Instagram、YouTube及各大討論區、BLOG等，針對本議題相關文本內容進行分析，並根據網友就該議題之討論，作為內容撰寫依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
分享本篇文章
你可能也會喜歡這些文章 :