Image source：FB／日本東海旅行
文／積遜猿
日本嘅美好，係咪只係我哋觀光表面睇到咁完美呢？一直以嚟，都有唔少日本文化達人指出，日本人係一個相當壓抑自己嘅民族，佢哋好多時都係為咗人哋，而收埋自己嘅喜好。哇，呢點同香港人真係差天共地，睇嚟兩個地方嘅文化相當唔同喎。
唔怪得，喺9月25號連登（LIHKG)有日本巴打出咗個Post，「未返工就想辭工，但係太恐怖唔敢辭」，即時引起網民熱議，佢喺入面分享自己仲未入職，但已經體會到日本工作文化嘅恐怖，即刻想辭職。哇，到底咩事？點解未返工就會想辭職？我哋一齊睇睇佢講咩喇！
Image source：LIHKG
原來呢位巴打，根本就未開始正式入職，但公司已經迫佢朝九晚七返工，美其名「遙距研修」，即係做義工，無錢，真係好得人驚。巴打就話自己「作為一個不羈放縱愛自由嘅香港人」，見到呢個情況，就打算要辭職喇。不過佢就連打電話過去辭職嘅勇氣都無，希望各位巴絲打可以畀畀意見佢喎。好多網民都勸佢東家唔打咪打西家，唔好勉強自己，一定無好下場。
佢仲分享咗17點日本傳統公司嘅情況：
1）社員每星期有五日工作日，兩日休息日
2）工作日係指必須集中精神工作嘅日子
3）休息日係指，假如工作唔太忙的話有可能可以休息嘅日子
4）一般工作時間都係朝九晚六或者朝十晚九，不過係純粹for your reference，冇咩實際意義
5）一個月嘅工時，205～225個鐘係平均，想升職建議做足260個鐘（應酬另計）
6）一般新入職會有10~20日左右有薪假期，不過都係純粹for your reference，冇咩實際意義
7）放心，草草埋埋啲年假通常都可以堆到辭職時一次過放，除非唔得
8）正職以外嘅收入來源一律禁止
9）點解？因為社員嘅時間就係公司嘅時間，你有時間就應該幫公司賺錢而唔係幫自已賺錢
10）你入得嚟做就預咗做到60歲
11）60歲之後因爲你已經冇利用價值，如果你賴死唔走的話保持扣你人工嘅權利
12）想轉工，冇問題，要有心理準備最後一個月會比死更難受。因為下屬辭工有可能會影響到上司嘅performance
13）亦唔係話一定冇辦法和和氣氣咁辭工嘅
14）但必須要符合下列條件：
(a) 辭職員工為女性；及
(b) 工作滿三年；及
(c) 年介20-40歲並ーー
(i) 即將結婚；或
(ii) 即將分娩。
15）於是近年有一種律師樓，係專門幫人辭職的。當你覺得公司太恐怖連遞信都唔敢的話律師可以幫你搞掂晒
17）但請律師有個問題係，冇禮貌。日本人為咗禮貌係可以去到好盡。佢地為咗要見到你喊住認錯，唔比你拍拍籮柚就走咗去，係乜都做得出...... 例如ban晒你間學校嘅師弟妹以後永不錄用，或者擔心你唔記得同屋企人分享心事，幫你打比你老豆
再一齊睇埋網民有咩睇法喇！
「講左咁耐，日本都真係一個好玩唔好住既地方....成日都有人想移民但又唔知玩同住既分別。」
「如果俾人發現你有辭職嘅心，你慘撚過唔辭！」
「日本工作文化真係比垃圾更垃圾，香港已經好垃圾。」
延伸閱讀►►►
分享本篇文章
你可能也會喜歡這些文章 :