Image source：FB／Ks Leung
文／積遜猿
點解高登、連登神獸都係「壁虎」？原因無他嘅，因為佢得意囉！細細隻，好鬼Q，直頭好似多咗個屋企人咁，睇到都心情都變好咗。咩話？你千其唔好以為大家都係外貌協會先得喎。封得「壁虎」做神獸，緊係要有埋內涵喇！「壁虎」唔單止可愛，仲係益蟲，佢哋會專食你哋屋企入面嘅蟲仔，好似蚊、烏蠅同小強咁，除時勁過你屋企支殺蟲水，天然無害，應該要出返份人工比佢先啱。
近排連登又再次傾開呢隻神獸，話自己屋企幾隻「壁虎」都無咩用，搞到佢夜晚瞓覺都好辛苦，好多蚊都咬到佢好嚴重。不過呢咁正常嘅Post，又點會諗到會有超展開喎。有位巴打留言問：「壁虎會叫？」之後竟然有人覆佢：「識叫個啲係四腳蛇呀！」吓，咩「壁虎」同「四腳蛇」唔係同一樣嘢咩？有位似乎係昆蟲生物專家嘅巴打就咁樣講：
「唔同
四腳蛇=鹽蛇=จิ้งจก
壁虎=守宮=ตุ๊กแก
呢方面泰文分得清楚啲
蜥蜴= กิ้งก่า」
哇，連泰文都用埋，認真唔得掂！呢到又要介紹另一個連登文化，就係「假膠」喇。假膠，即係故意好認真咁講一堆錯誤、唔合理嘅言論。呢位巴打雖然引用埋外文，話「壁虎」、「四腳蛇」同「蜥蜴」都係唔同生物，但事實似乎唔係咁喎。就有巴打特登留言指正：
「簡單啲嚟講，鹽蛇都係壁虎嘅一種
講泰文喎，九唔搭八咁，笑死我」
根據維基百料，「蜥蜴」係蜥蜴亞目（Lacertilia）生物嘅總稱，而「壁虎」則係壁虎科（Gekkonidae）生物嘅總稱，其中「四腳蛇」、「鹽蛇」以至「守宮」都可以叫做「壁虎」。我哋平日最常見到嘅「四腳蛇」、「鹽蛇」，學名叫無疣蝎虎（H. bowringii），係壁虎科入面其中一種生物，所以叫佢做「壁虎」都無錯。一齊睇睇無疣蝎虎（H. bowringii），可愛連登神獸當年紅遍全香港嘅經典廣告喇：
延伸閱讀►►►
分享本篇文章
你可能也會喜歡這些文章 :