Image source：IG／stboo
文／積遜猿
香港九十後，全部都二十喇，唔再係當年嘅青澀幼稚嘅細路仔、細路女，已經向緊三十大關邁進喇！呢一代成長嘅人，正式進入社會無耐，面對工作、生活等等事情，難免會感到壓抑。唔開心，好多時都會回想返細細個，咩都唔識，小小事就可以開心滿足嘅日子。最近網上討論區「連登」，就有位九十後巴打，開咗個Post講鄧麗欣 StephyTang，話佢係90後既回憶。呢個講法，好多巴絲打都非常同意，引起網路熱議。
開Post嘅巴打首先講咗佢認為Stephy最出名嘅歌，一定係〈不要離我太遠〉，仲大讚王偉文填詞經典，「真係可以loop足一日」咁話。好多人都話，已經好耐無聽Stephy嘅歌，估唔到今日聽返，突然有好多回憶出返嚟。佢又形容話，今時今日，香港嘅樂壇已經無咗呢種類型嘅歌手，真係好可惜
佢哋一數Stephy嘅歌，即刻又忍唔住係咁舉其他經典例子，好似呢首〈再見不是朋友〉咁，就好多人都鍾意喇！又有巴絲打形容，而家聽返呢首分手歌，別有一番感受。因為細細個未必有咁多戀愛經驗，直到大個咗，拍過拖，亦都好可惜嘅失過戀，再聽返先發現原來首歌咁有意思。
不過講到Stephy最紅嘅K歌，〈電燈膽〉，一句「能承認嗎？我怕當那電燈膽」，真係九十後見到字都有Stephy把聲彈出嚟！當年成堆學生放學一齊去唱K，一定次次都有點呢首歌，搞到無人未聽過，無人唔識唱，真係陪住咗九十後呢一代人嘅成長。聽嘅，唔止係歌，仲有當年開心嘅青春回憶。
有網民List咗佢嘅鄧麗欣歌單，唔知你又同唔同意呢：
經典系列
好心好報
好好戀愛
十分愛
旋律系列
他不准我哭
黑白照
藍孩子
我的最愛
等你約會我
個人最痛系列
七年
其他網民又點樣講Stephy做為九十後回憶，一齊睇睇喇！
「講真當年的確個個都笑佢唔好聽，但又真係耳熟能詳，播返好多佢舊嘅歌都識唱大部份。」
「樂壇欠佢一個交代，佢為90後既青春付出左咁多。」
「講起Stephy就諗起方力申，好想佢地復合，佢兩個係90後既金童玉女。」
延伸閱讀►►►
分享本篇文章
你可能也會喜歡這些文章 :