元朗嘅日與夜:721、727,社群關鍵領袖嘅網路大數據!

元朗嘅日與夜:721、727,社群關鍵領袖嘅網路大數據!

示威者都係俾人打果個

2019/07/31

Images Source: Facebook/hellowong

港人同悲,七月元朗

「我墜入元朗,你卻在網外看」,七月元朗,注定咗係一個不得安寧,充滿動盪嘅時期,在場嘅人或者唔多,但每一個香港人都經過網路見證咗元朗嘅流血事件,心繫元朗,而觀者同悲同怒。自6月9號香港「反送中」逃犯條例,各種警民衝突嘅流血事件不斷發生,但係直到7月21號入夜嘅元朗地鐵站,白衫人「無差別毆打市民」嘅恐襲,先係目前最令香港憤慨嘅大事。而7月27號,元朗示威遊行,表達對白衫人恐襲警察嘅執法不滿,亦都引起紛爭。元朗嘅日與夜,網上嘅討論又係講緊咩?今日DailyView用網路大數據話你知,除咗主流媒體以外,邊個係元朗事件嘅社群關鍵領袖,而佢哋係如何獲得關注呢?

DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

元朗大事:721、727

image source:KEYPO大數據關鍵引擎

721,白衫人恐襲

——無差別毆打香港市民

7月21號晚上,網上突然流傳話,元朗地鐵站有大批白衫人聚集,準備對喺其他地方返嚟嘅香港示威者唔客氣咁話。咁當時大家緊係好驚,但又唔知到底實際情況係點,白衫人會做到咩地步。無耐,就有白衫人追打香港市民嘅影片、流傳,令到好多住喺元朗嘅香港人有家歸不得。更恐怖嘅係,就連《立場新聞》記者拍攝都俾呢堆白衫人圍毆。後尾白衫人仲要衝入月台,單方面攻擊市民,連柳俊江都俾到頭破血流。好多市民都問,香港警察到底去咗邊?

727,元朗反恐襲示威

——警察一樣打到入月台

7月27號日頭,香港市民聚集元朗,和平示威遊行,佢哋嘅訴求係針對三個方面。第一係反「黑警」,話佢哋喺7月21號晚「拒絕執勤,勾結黑幫」;第二係話「鄉黑」,「襲擊市民」;第三則講「黑官」,指責「中聯辦俾錢」。遊行示威搞手申請不反對通知書,但不獲通過。香港市民集會都仲有好多合法方式嘅,去搵何韻詩簽名,去買老婆餅,去元朗一日遊,都係香港嘅公民權利。可惜嘅係,入夜之後警察一樣武力驅趕,仲打到入地鐵站。網民話同721好似喎!

image source:KEYPO大數據關鍵引擎》,以上資料僅分析網路社群關鍵領袖,並未包含新聞網站。

杜汶澤

——力數何君堯不是

杜汶澤一向敢言,喺今次「反送中」事件入面都多次發聲,仲親身去救咗一位年輕嘅示威者,認真唔話得。今次721元朗事件,社生又點會唔出手呢?社生發貼文力數何君堯開記者會嘅交代,話何生支持元朗鄉親,但又譴責暴力,根本係「精神錯亂」。社生仲話,白衫嘅咪先係「真.暴徒」囉,何生先係真正同暴徒同行嘅人。底下嘅留言一概係中指,表達對何生不滿。社生仲出咗條「小社燒熄」,評論呢件事,大家不妨一聽。

潘小濤

——香港警察做緊咩?

電台DJ潘小濤,向來都關心時事,呢排嘅「反送中」事件緊係力撐示威者喇!721元朗白衫人打人事件,佢轉發咗王喜嘅質問,「盧偉聰,你話21號晚唔夠人手調去元朗。得罪講句:『出糧三萬人,應急就無人?!』」認真入肉,Likes數近九千。潘小濤仲分享咗一條有關警察嘅片,標題係「【鐵路應變部隊 • 提升反恐應變能力】」,內文係香港警察話自己已經成立咗一支應變小隊。但點解721都仲係無警察幫手呢?

金水

——廣傳元朗事件

文化時事評論人金水,對香港嘅民主發展、社會運動,一直都相當敢言。721元朗白衫人無差別打人恐襲事件,金水都極力譴責暴力,仲整咗條片,「5 分鐘話你知尋晚元朗發生咩事」。正所謂有圖有真相,有片嘅說服力自然更加高喇!該FB貼文已經有1.5萬讚好,2.8萬次嘅分享,影響力相當之大。有網民就話:「2019年7月21日,香港是個法治國家這句話,正式走入歷史」,「那些把香港警察拍成英雄的劇集,都變成了笑話」。

HKG報

——林卓廷抵死

HKG報向來力撐政府,今次即使係元朗白衫人無差別恐襲打人事件都一樣,好多藍絲都讚好!HKG報喺7月22號喺FB發表咗一篇貼文,內文為:「林卓廷喺元朗受傷,怪警方失職,冇及時保護佢喎,大家點睇?」就有網民留言話:「明明好似住沙田,專登走入元朗俾人打,好有誠意喎!」「我覺得啲帶口罩嘅白衣人都係動機良好、手無寸鐵、高尚、有秩序、自制及温柔勇武嘅抗爭者。」簡單講,即係林議員抵打。

image source:FB HKG報 HKGpao
幫港出聲

——力撐警察

幫港出聲喺721元朗白衫人無差別恐襲打人事件之後,引用咗行會成員、新民黨主席葉劉淑儀嘅說話,話要支持、信任警察,「因為這三萬人,就是香港維持治安的唯一力量!」底下好多網民都讚好,話:「撐警,支持警,大大力支持警」、「支持警察全力管理港九! 新界交由叔父管理!」、「葉劉曾任保安局局長,對各紀律部隊的架構、人事编制及運作瞭如指掌,以理服人,敢言見稱,佩服!」真係力撐警察!

港人講地

——何君堯辦公室毀壞

港人講地一向以求真、務實嘅理念為港發聲,元朗621之後,就發表咗「不滿何君堯疑與白衣施暴者有關 百人到其辦事處示,玻璃門被推倒」嘅貼文,獲得二千五百多個讚好。港人講地想問大家,點樣睇何君堯因網上熱傳佢同「白衣人」合照,仲讚對方係「英雄」嘅片段,引起過百人到場包圍位於荃灣嘅辦事處,仲推倒玻璃門。留言除咗「恭喜」,都有話:「如果佢真係喺幕後策劃,尋日又點會咁張揚同班叔父食飯。」

image source:KEYPO大數據關鍵引擎》,以上資料僅分析網路社群關鍵領袖,並未包含新聞網站。

HOCC

——去搵何韻詩簽名

何韻詩一向夠型,做歌手本身如日中天,但眼見社會不公義,都決心投身社會運動,做一位敢於發聲嘅藝人。最近何韻詩先衝出國際,上咗聯合國議會為「反送中」而發聲,受到網民力讚。今次因為元朗727事件,警方唔通過不反對通知書,咁香港人就要用其他理由集會喇。其中,因為文化事件集會,好似搵何韻詩簽名咁,係合法理由。何韻詩嘅Post有成 5.8萬個讚好,唔怪得連連登網民都話「何韻詩真係碩果僅存嘅真香港女歌手」啦!

image source:FB HOCC
潘小濤

——林鄭回應五大訴求

電台DJ潘小濤,喺7月27號晏晝上載咗一張元朗朗屏站月台照片,入面就講到明,就話見到呢個月台咁多人,林鄭一定要回應五大訴求,唔係嘅話一定收唔到科。呢個Post有成九千幾個讚好,認真受網民支持。底下仲有唔少留言:「612前都以為港孩不能吃苦,但是,我錯了,所以我因為這些孩子,我更要發聲,做D嘢!」、「香港人可以啞忍好耐。但到咗憤怒爆發時,威力無可估計!加油!」

image source:FB 潘小濤
金水

——身體力行直播遊行

金水自言「廢中一名,五行缺金欠水」,不過相信好多網民都唔覺得佢廢,而認為佢為香港出心出力,相當有用。單睇佢喺7月27號直播遊行,就已經好多留言,「不流血!不被捕!齊上齊落!香港人加油!」「好感動!偉大尊敬既香港人加油!一定要小心注意安全!」而且,佢又有個Post影低咗元朗街坊大馬路邊擺booth派寶礦力,今次咁多寶礦力,點會欠水,行到身水身汗即刻飲返支喇!

image source:FB 金水
HKG報

——警察鎮壓暴徒

7月27號,HKG報出咗篇「執法者經歷一日苦戰,大部分暴徒已散去,元朗暫歸平靜!畀Like支持執法者!」仲配埋警察入月台驅散民眾嘅圖。底下留言就話:「辛苦了警察們,謝謝你們守護香港 ,謝謝謝謝謝謝。」「香港全靠有盡忠職守的好警察,謝謝你們。十分感激。」仲有另一個Post係力插何韻詩,下面就有支持者講:「元朗居民加油!好好招待不速之客!讓他們看到你們的熱情!」

image source:FB HKG報 HKGpao
港人講地

——示威者要聽警方話

港人講地就7月27號,警方驅散示威民眾發Post,題為「警方與示威者南邊圍對峙 施放催淚彈驅散」,小編仲認為「示威者應該按警方呼籲,盡快撤走~」咁話,底下留言就講:「返屋企喇,大家都辛苦,你唔走,警察又辛苦。」「支持警隊,您們太辛苦,太委屈了,要平平安安收隊。 今日做了一場真正男子漢應該做的!」簡單講,即係希望示威者聽警察講,早日離開。

幫港出聲

——力撐林志偉

警隊員佐級協會主席林志偉喺7月26號發言,譴責侮辱國家行為同暴力衝突升級,仲用「蟑螂」形容涉事嘅示威者。幫港出聲就出咗個Post,問大家到底撐邊個喎!一齊睇吓下面嘅留言:「林 sir 一直鼓勵警隊,很多良好市民很愛載你」、「支持員佐級支持林志偉!」、「支持警察!支持林志偉! 咁多屆的佐級協會主席、最頂呱呱就係林志偉、 最理直氣壯對抗惡勢力 !」情況相當一面倒。

向香港警察致敬

——睇個名都明哂

向香港警察致敬,真係一目了然,緊係一個撐警察嘅Page喇!佢喺7月27號,就元朗示威遊行出咗Post,內文為「辛苦晒,香港警察,今日又要對付無恥的曱甴。」仲有一條片,寫住「反中曱甴係元朗又行私刑,群體欺凌意見不同的阿伯啦。」我哋一齊睇睇底下留言點講:「越睇越火滾,打Q佢地啦!」、「支持我们警察子弟兵们」、「香港人没救了」同「为你们感到光荣」,真係充份致敬。

分析說明:

本研究資料由《KEYPO大數據關鍵引擎》提供,分析時間範圍為2019年07月20日至2019年07月29日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『元朗』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。


「加入香港網路溫度計Fan Page睇睇網民嘅花生係乜嘢?」>>>

---------------------------------------------------------------------------------------------------------

DailyView曰:

香港,加油!香港人,加油!

接續看下一篇

x

訂閱DailyView網路溫度計(香港版)電子報