兩個月衝突不斷!大數據剖析反送中十大熱議事件

兩個月衝突不斷!大數據剖析反送中十大熱議事件

反送中示威事件到依家已經超過兩個月,為咗自由、民主兩個字,香港人再一次發揮打不死嘅獅子山精神。無論最後結果係點,歷史都會記得呢一刻。

2019/08/14

反送中運動持續兩個月——踏上這無盡旅途

《逃犯條例》修訂風波至今已經持續兩個幾月,亦已經引起國際關注,講咗兩個幾月,至今政府仍然無聆聽、解決示威者嘅五大訴求:「設立獨立調查委員會」、「平反暴動定性」、「撤回送中惡法」、「撤銷檢控示威者」、「特首下台 實行雙真普選」,雖然特首安排警方每日進行一次記者會回答公眾問題,但示威源頭嘅根本問題並無解決,導致示威行動持續不斷,每個禮拜仍然遊行集會,實行遍地開花。今日網路溫度計用網路大數據整理咗由6月示威開始到依家,討論度最高嘅十樣事件,一齊嚟重溫一吓呢兩個幾月嚟呢場無盡嘅時代革命。

DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

 

7.21 元朗黑夜 無警時份

呢一晚,可以話將香港人嘅怒氣推到最高,都令大家更加質疑警方嘅雙重標準。當日民陣遊行去到大概夜晚10點,警察發射3粒催淚彈,2粒海綿彈同1粒橡膠子彈驅散上環示威者。同一時間,幾百名拎著水喉通、木棍,竹枝嘅白衫人士衝入元朗西鐵站無差別攻擊市民,誇張到追上月台車廂。最令人心寒係,報警之後39分鐘白衫人已經散水,先有警察到場,前後腳嘅完美配合,加上一邊武力鎮壓,一邊對白衫人視若無睹,令大家懷疑到底呢單嘢係咪警黑合作。

image source:鏗鏘集:721元朗黑夜/截圖

元朗
6.16 香港200萬人上街

成個「逃犯條例」示威活動由6月9號開始,經過幾次唔同形式嘅抗議行動,政府仍然如期執行二讀,一班市民當然非常不滿,再加上6月12日驅趕示威者嘅時候警方被指使用過度武力,於是民陣再次發起遊行。喺6月16號呼籲大家再次上街,高溫天氣並無阻擋示威者向政府反映不滿嘅決心,超過就出現九七年以來前所未見,接近200萬人上街嘅新紀錄,亦由呢個時候開始正式向政府提出五大訴求。

8.5 「全港大三罷」不合作運動

逃犯修訂條例引伸嘅示威到呢個時候已經持續兩個月,喺咁多唔同類型示威行動都得唔到政府回應訴求嘅時候,市民發起三大罷:罷工、罷課,罷市。喺7個地區都有集會活動,而當日嘅港鐵不合作運動係有史以來最大規模,影響都係最大,總共8條路線受阻。集會後來受到警方大規模清場,總共施發800粒催淚彈,140粒橡膠子彈同20粒海綿彈,更加拘捕148人,當中最細嗰個只得13歲。

7.28 追究開槍責任 遮打花園集會

為咗追究警察喺21號向市民開槍而發起嘅遊行,原定喺遮打花園集合開始遊行到中山紀念公園,喺警方反對通知書下,只可以喺遮打花園進行集會。不過示威人士分成幾批,最後按原定計劃行,警察施放多次催淚彈同舉起橙旗,清場過程中除咗大家見慣見熟嘅警棍,仲包括:胡椒彈、催淚彈、催淚水劑、海綿彈,橡膠子彈。一次過將多種武器曬冷,當時嘅場面真係好混亂。

8.3 「旺角再遊行」 黃大仙爆衝突

旺角遊行因為人數眾多,起步後半個鐘仍然有好多市民喺晏架街遊樂場等待出發,之後慢慢有市民自發遊行,人潮開始偏離原定路線,後來更加一度短暫佔領紅隧。到夜晚防暴警察開始驅散示威者,同樣發放咗多次催淚彈,部分示威者被警察以警棍毆打,壓喺地下拘捕。之後有防暴警察衝入黃大仙地鐵站想拉示威者,不過黃大仙居民就好團結,好多街坊踢住拖,集體鬧走警察。再夜少少,喺黃大仙紀律部隊宿舍就有居民多次空中襲物想攻擊示威者,一班示威者就當然好躁啦。

7.26 香港機場「和你飛」萬人集會

「和理非」就聽得多,今次呢場機場集會就係好符合主題喇。因為政府一直無撤回逃犯條例修訂,警察執法問題同元朗事件,個幾月累積嘅怨氣仍然未解決,引發呢一次集會表達不滿。當日集會市民除咗派傳單俾到港旅客,都有舉牌、播放新聞片,希望令更多國家嘅人關注呢次嘅示威行動。最後總共有21082位市民聯署,當中有8700位係機場人員,集會歷時11個鐘。

7.6 光復屯門 告別娜娜

大家成日掛喺嘴邊講嘅「遍地開花」,反送中第一次實行呢四個字就喺7月6號。由2006年起就開始被大媽佔據作為表演場地,其中最出名嘅就係娜娜。因為噪音滋擾附近嘅市民,喺呢一日大家終於爆發一齊去「支持」大媽歌舞表演。後來因為示威人士越嚟越多,嚇到大媽匿入廁所,後來被警察護送離開佢地個舞台。而喺屯門西鐵站對開位置一名示威人士就比一個男人襲擊,個男人之後竟然被警察護送上的士,警員因為咁而舉紅旗警告同使用胡椒噴霧。

image source:Youtube/ JASON(大J)
7.14 沙田反修例遊行 血染新城市

7月14係逃犯條例示威活動中,第一次喺新界地區舉行遊行,下晝五點因為有遊行人士無跟原定路線行,警方開始同示威者有對峙同衝突。到咗夜晚,防暴警察進入新城市廣場驅散示威者,一邊驅散,一邊封鎖出入口,手法強硬造成流血衝突,警方亦都係商場入面施放胡椒噴霧,走難場面令商場入面唔少只係落街食餐飯嘅街坊嚇到都唔知點算。


8.12 黑警還眼 百萬人塞爆機場

最新發生嘅呢一次示威,係由於11號警方懷疑係高處向地面發射布袋彈嘅時候擊中一名急救員,目前消息指佢受傷眼球永久失明。因為事件再次激起民憤,市民即刻組織呢次機場集會號召百萬人塞爆機場,齊齊叫「黑警還眼」。雖然只係短短一晚,不過參與市民都好多,集會癱瘓機場,多班航班取消,集會最後和平結束,並無衝突發生。


立法會
7.1 玻璃爆裂 衝擊立法會

示威發展接近一個月,三位示威者以死相諫同多次示威行動都無得到政府回應,令「反送中」氣氛越演越烈,7月1號示威者兵分兩路,一批參與每年都有嘅七一遊行,要求政府撤回惡法同要特首下台,而另一批示威者就試圖衝擊立法會。下晝五點兩塊玻璃都被破壞,示威者都正式攻入立法會。喺當日凌晨四點,特首召開咗緊急記者會,強烈譴責示威者,令唔少人話佢為咗兩塊玻璃就咁緊張,但就漠視廣大市民訴求同三位死者。

分析說明:

本研究資料由《KEYPO大數據關鍵引擎》提供,分析時間範圍為2019年06月08日至2019年08月13日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『反送中社會運動』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。

「加入香港網路溫度計Fan Page睇睇網民討論緊乜嘢?」>>>

-------------------------------------------------------------------------------

DailyView曰:

「相信咁多位香港人都會記住2019年香港發生過咩事」

接續看下一篇

x

訂閱DailyView網路溫度計(香港版)電子報