時代革命下 反送中運動十大普通但不平凡嘅香港人

時代革命下 反送中運動十大普通但不平凡嘅香港人

一個民主社會,每個人嘅聲音都好重要。呢十位人物本身都係普通平凡人,不過係呢場反送中運動入面,成為大家唔會忘記嘅一個角色。

2019/08/16

致每一個為香港努力嘅人

反送中示威行動兩個幾月嚟仍然持續,今次抗爭行動同過往其他社運最大分別,就係從頭到尾無大台,示威者透過唔同社交平台互相交流第一手消息,資訊流通速度快之餘,亦都吸收過往經驗,避免咗一D社運領袖係運動一旦升級嘅時候,需要承受被控告等等嘅風險。同過去以大台為核心嘅社運比較,無大台都更加展示出市民係自主性咁參與示威。「兄弟爬山,各有各做」,既然大家目標一致,其實唔需要政治領袖帶領都一樣可以好團結。

無大台令今次抗爭唔似過去有社運領袖,但兩個幾月嚟,有唔少普通市民因爲示威而引伸出嚟嘅事件得到好大關注,DailyView今日就整理咗反送中社運以來最不平凡嘅小人物,呢D人都成爲呢個長時間抗爭活動入面好重要嘅小插曲,可能係引起民憤嘅激發點,可能令大家喺憤怒情緒之中流下感動嘅眼淚,而有D係市民心中永遠忘記唔到嘅憾事。

DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

10 烈士 麥小姐(網路聲量:2826筆)

反送中運動到目前為止,總共已經有7名市民因此自殺,其中麥小姐,係第四位以死相諫嘅烈士。7月3號清晨,喺長沙灣住所墜樓身亡,事後家屬公開死訊同麥小姐兩張遺言,內容大致係講對於目前香港情況嘅無力感同痛苦。其中一張寫住:「不是民選的政府是不會回應訴求的 香港需要的是革命」香港市民除咗心痛都好沉重,喺呢種心情之下,大家都話會為呢D烈士繼續走落去。

image source:Facebook/鍾祖康
9 暴徒情侶 杜依蘭&湯偉雄(網路聲量:3224筆)

7月28號上環警署衝突,總共49人被捕,其中兩個就係杜依蘭同湯偉雄呢一對「暴徒情侶」。話就話暴徒,其實呢兩位當日只係扶起一名後來同樣被拘捕嘅16歲女仔,但就被警方控告暴動罪。事件發生前,呢對情侶一早排好期結婚,雖然獲准保釋可以如期登記結婚,不過就唔可以離港,姐係話唔可以去度蜜月。消息傳開之後,市民都紛紛送上祝福,話佢哋喺亂世中一對嘅佳人,登記結婚當日,新郎仲戴住頭盔影相。

8 香港媽媽 陸錦城(網路聲量:4032筆)

相信大家都好記得呢一幕:一個普通平凡嘅媽媽企喺一班防暴警察面前,喊住話「我都係一個媽媽,你哋都有細路,點解要打小朋友?收隊啦!」然後將自己背囊掉低,話自己無武器,唔係要衝擊。後來當佢慢慢行近警察嘅時候,被警察用胡椒水噴中,身邊都響起一下又一下嘅催淚彈發射聲音。唔少人都被呢個畫面感動到眼濕濕,將呢個媽媽封為「香港媽媽」。其實除咗呢個媽媽,後來都有好多家長企出黎,表示心痛,同支持一班年輕人。

7 佔領立法會 梁繼平(網路聲量:8389筆)

大部分示威者都會戴住口罩,除咗希望可以稍微阻隔催淚彈,都係為咗保護自己身分以免被政府秋後算賬。但佔領立法會當晚,一個示威者喺媒體面前宣讀「七一宣言」,之後更除低口罩呼籲大家留低。呢位示威者其實係擁有香港大學政治學,法學雙學位,目前喺美國攻讀政治學博士嘅梁繼平。佢認為依家目前問題根源於香港沒有民主普選而導致,堅持呢個活動唔可以割席,「要贏一齊贏,要輸一齊輸」,大膽除低口罩係為咗表示自己只係想清楚表達訴求,並唔係其他人口中嘅暴徒。

6 機場道歉 香港年輕人(網路聲量:9767筆)

示威者幾次喺機場進行嘅示威活動,希望癱瘓機場運作,促請政府回應訴求,同埋令唔同旅客關注香港發生緊咩事。同之前港鐵不合作運動一樣,呢D行為受到部分人指責,話示威者造成大家不便,影響大家。因為有呢D不滿嘅聲音,8月14號當日喺機場,有年輕示威者舉起寫住中英文「對唔住阻到你 但香港生病了」嘅牌,90度鞠躬,向旅客同其他市民道歉。呢一幕,令唔少人都覺得好心酸,更為呢班為香港抗爭嘅後生仔感動心痛。

image source:Facebook/香港地
5 天水圍少女(網路聲量:15254筆)

之前喺網上被瘋傳,引起公憤嘅一張相,係一名著住黑色連身裙嘅少女喺被警察拘捕嘅時候抬起,令佢雙腳被分開,裙都因為動作而被捲起,露出下半身走光。當時「執行職務」嘅都係男警員,而被抬住行嘅途中都受到警員辱罵同以「肥婆」,「八婆」等字眼人身攻擊,呢D行為受到市民強烈譴責,並批評極度唔尊重女性。到第二日朝早6點獲准保釋之後,佢亦有上連登向大家報平安,仲話當時被撳低之後係直接被抬起,並唔係警方所講因為激烈反抗導致3名女警無法制伏,之後先被抬起,之後呢位少女都有向媒體展示被抬起同被警棍毆打留下嘅瘀傷。

image source:Youtube/ like qoo
4 烈士 梁凌杰(網路聲量:17101)

喺6月16號為修訂遊行結束之後,民陣宣布當日參與遊行人數為200萬+1人,當中呢1人就係前一日喺太古廣場墮下嘅梁凌杰,梁烈士。6月15下晝,梁凌杰著住一件寫住「林鄭殺港 黑警冷血」喺黃色雨褸,企喺太古廣場平台,喺棚架掛上「反送中」等抗議橫額。在場市民不斷大叫撐住,唔好死,立法會議員鄺俊宇三度要求同梁凌杰對話但被拒絕。直到夜晚9點幾,梁烈士爬出棚架,警員同消防員拉唔返佢,最終墮下,送院搶救證實不治。事後喺佢身上發現兩封遺書,寫低自殺原因、反對修例嘅訴求,同交代身後事。梁烈士都係反對修例運動中,第一名以死相諫嘅死者。

3 爆眼少女(網路聲量:24626筆)

示威至今出現過好多大小小流血事件,不過呢一單導致永久失明嘅布袋彈爆眼,一定係令大家最心痛最嬲嘅。8月11號夜晚警方喺尖沙嘴警署外清場,喺有消防員喺現場嘅情況下,突然有一下槍聲,一位企喺巴士站廣告燈箱後無進行攻擊同挑釁行為嘅少女跌落地下,成地都係血,當時粒布袋彈仲卡咗喺護目鏡上。少女右眼球爆裂,永久失明,恐怕仲會毀容。市民當晚即刻組織第二日去機場示威,要求「黑警還眼」,雖然召集得好急,但一樣有好多市民懷住悲憤心情去響應。

2 抗爭絕食 陳伯(網路聲量:35879筆)

73歲嘅陳伯,由7月3號開始絕食,一直去到22號中午先結束,絕食行動總共維持19日。絕食到第12日嘅時候,陳伯同其它絕食人士,仲有一班市民由金鐘海富中心行去禮賓府,要求同特首、警務署署長對話。雖然陳伯一路要人扶住行,不過都一直無放棄,最後因爲醫生擔心佢嘅健康情況而提出折返金鐘。去到8月3號黃大仙衝突,陳伯就企警察盾牌前面勸説,後來跌倒之後話被警察箍頸。係發生有年輕人自殺事件之後,陳伯都有勸告一班後生要做長期抗爭,唔好為政府犧牲生命。

image source:Youtube/ 眾新聞
1 雷射筆男方仲賢(網路聲量:60781筆)

喺8月6號夜晚,浸大學生會會長方仲賢因爲身上有10支警方所謂「雷射槍」而被5名休班警員以持有攻擊性武器拘捕,雖然方同學當時表示個D只係觀星用嘅雷射筆,事後亦有專家指個一款只可以稱為雷射筆,而唔係功率相差好大嘅雷射槍。不過當時警員懷疑並無接納佢解釋,將佢帶返警署。事件發生之後,大批市民深水埗警署外聚集要求放人,律師同醫生,都出嚟反駁警方隨便歸類攻擊性武器係製造白色恐怖,亦係之後是市民組織集體觀星嘅緣由。

求助熱線►►►

香港撒瑪利亞防止自殺會: 2389 2222 撒瑪利亞會熱線(多種語言): 2896 0000

醫管局精神健康專線: 2466 7350 利民會: 3512 2626 生命熱線: 2382 0000 

明愛向晴軒: 18288 東華三院芷若園: 18281 社會福利署: 2343 2255

賽馬會青少年情緒健康網上支援平台「Open噏」:www.openup.hk

分析說明:

本研究資料由《KEYPO大數據關鍵引擎》提供,分析時間範圍為2019年05月17日至2019年08月14日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『反送中不平凡的風景』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。


「加入香港網路溫度計Fan Page睇睇網民討論緊乜嘢?」>>>

-------------------------------------------------------------------------------

DailyView曰:

「 是有種人 令這兒有風景 。

接續看下一篇

x

訂閱DailyView網路溫度計(香港版)電子報