十大反送中警察!咁多位阿Sir,ererer你仲識邊位?

十大反送中警察!咁多位阿Sir,ererer你仲識邊位?

好掛住皇家警察

2019/09/11

SIR
香港警察,點樣執法?

香港地呢,以前警察係維護治安嘅好朋友,認真人見人愛,香港人個個都信任佢哋。但係,隨住2019年6月起嘅「反送中」逃犯條例引發嘅社會運動開始,已經好多人開始懷疑警察嘅言行,對於佢哋對待示威者嘅態度,更加令香港人不滿。警察,係咪已經今非昔比呢?今日就等DailyView用大數據話你知,香港人呢三個月最關注嘅十大警察,同埋呢十位人物嘅大事喇!

DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

10 「唔好搞我後面Sir」 (7045筆)

「唔好搞我後面Sir」,喺反送中社運早期6月12日晚,呢位阿Sir就同立法會議員楊岳橋理論,楊生不斷質詢佢用咩理由檢查行人嘅物品,又話警察咁叫人停低,又唔講原因,令人難以理解。阿Sir不斷話自己合情合法合理,最後好似太緊張,高叫「唔好搞我後面」,但係後面只得其他警察,唔怪得咁多網友笑佢,叫佢放鬆少少喇。


9 「光頭Sir」 (7056筆)

「光頭Sir」劉Sir點解咁出名?皆因佢喺7月30日晚上,喺葵涌一度出現警民衝突嘅時候,佢就手持一支散彈槍,作態要射擊在埸嘅示威者!「光頭Sir」荷槍實彈咁面對示威者,真係隨時一下唔小心就會殺死人。網民見到佢嘅凶狠,話佢根本唔係用最低武力喎。但點知過一排,網上流傳中國國內勁讚劉Sir嘅消息,話心痛劉Sir喎,真係嚇一跳,然後得啖笑。


8 游乃強(7102筆)

721元朗黑夜,出名嘅警員點止李漢民?游乃強喺第二日解釋返警察行動,當中嘅理由,就相當令網民嬲嬲豬喇!佢話警察人手不足,怕死唔出去等支援。又話警方有去調查,但就無見到白衣人手上有攻擊性武器,又話唔確保白衣人有參與打鬥,所以一個人都無捉。咁多條片,咁多隻眼,警察呢種講法當然引起港人批評佢講大話。


7 「隻揪」Sir(7309筆)

我哋成日話香港警察係保護香港市民嘅安全,好多香港人都曾經認為警察係有專業精神,能夠克制情緒,中立持平咁面對各種事情。但隨住反送中社運嘅發展,警察就成日辱罵市民,好似呢位隻揪Sir喺7月7日挑釁要同市民隻揪,高叫「你認住我,隻揪呀」,言行絕對唔專業,表情相當凶狠,網民表示認真對呢位警察失望。


6 「你唔會令我驚」Sir(14899筆)

「你唔會令我驚Sir」李漢民出名係邊?就喺香港人最心痛嘅7月21日元朗黑夜。正當大家都見住香港市民俾白衣人狂打,但無警察及時出現,都好鬼嬲。咁警察終於係白衣人打完人走咗之後出現,記者當然就不斷追問呢位阿Sir喇!但可惜嘅係,佢嘅回應係無錶唔知時間,佢唔驚記者追問,網民狂話佢態度惡劣,目中無人。


5 李桂華(15868筆)

香港高級警司李桂華,佢成日都會代表警方發言,不過佢嘅言論無為警方行動降溫,反而成日引起咗網民熱議。好似警方拘捕浸會大學學生會會長方仲賢咁,話佢買嘅觀星筆係涉嫌藏有攻擊性武器喎!面對記者提問,李桂華嘅解釋係「嗯」,表示唔接受方仲賢話想觀星。而李桂華都承認警員將竹枝放進示威者背包,難怪大家咁留意。


4 「柏林仔」(18375筆)

人稱「柏林仔」嘅鄭柏林,佢本身係香港知名童星,之後大個仔就加入咗香港警隊,形象其實相當正面。正因為咁,佢對待示威者嘅手法,就有好大反差喇!喺7月14日香港眾志常委遭樣似「柏林仔」嘅人180度扭手腕,睇到都覺得痛,網民就話對佢好失望。網民就話,面對示威者根本無力反抗嘅情況,點解仲要咁樣傷害佢哋?


3 余鎧均(20194筆)

警察公共關係科高級警司余鎧均,話明公共關係科,目標緊係要同市民打好關係,為警察喺前線嘅各種行為提出合理解釋。不過網民對佢嘅解話,似乎就唔收貨喇!最出名嘅係,余警司為8月25日荃葵青遊行當中,有警察向天開槍,佢就話警員表現英勇及克制。而警察持槍腳踢示威者,佢話呢種只係警員嘅自然反應,並無問題。


2 「Er er Sir」(38865筆)

警察公共關係科高級警司江永祥,喺香港警察記者會入面成日代表警方發言,香港人周不時都會見到佢個樣係電視出現,熟到好似朋友咁。佢嘅態度相對其他警察溫和,最出名嘅口頭禪係「Er……」,搞到網民起咗個朵叫佢「Erer Sir」。佢早前為警察話示威者係曱甴解話,至少都講咗呢種字眼唔理想、唔禮貌,希望大家唔好再鬧交。


1 謝振中(55726筆)

全香港因為反送中而知名度最高嘅警司,一定會提到警察公共關係科高級警司謝振中!皆因佢最常喺香港警察記者會出現,為香港警方對待示威者嘅言行解話,成日引起網民不滿,仲俾網民惡搞做潛力圖《明報》報道佢最近為9月7日警方蓄意向記者噴發胡椒噴劑解釋,話警方要求記者行開少少,但記者唔聽,唯有用胡椒噴劑囉。


分析說明:

本研究資料由《KEYPO大數據關鍵引擎》提供,分析時間範圍為2019年06月08日至2019年09月10日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『香港警察』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。

「加入香港網路溫度計Fan Page睇睇網民嘅花生係乜嘢?」>>>

---------------------------------------------------------------------------------------------------------

DailyView曰:

警察定示威者要為治安變差負責?


接續看下一篇

x

訂閱DailyView網路溫度計(香港版)電子報