香港警察信任度歷年最低?香港家書,香港市民嘅十大質問

香港警察信任度歷年最低?香港家書,香港市民嘅十大質問

十問有冇十答?

2019/09/18

Images Source: flickr:Studio Incendo

香港警察,奉公守法?

自從2019年6月起因為「反送中」逃犯修訂條例而引發嘅社會運動,由最初嘅撤回逃犯修訂條例,到之後警民衝突,無數流血事件出現,令示威者𨍭而高叫「五大訴求」。其中呼聲最高嘅,係成立「獨立調查委員會」,即係好多香港人都希望,針對示威者嘅執法問題 ,要有一個公平、公正、公開嘅審查。《明報》喺9月16號公布調查,近五成受訪者對香港警察完全不信任。今日DailyView就同大家講,到底香港人對警察嘅十大質疑係咩喇!

DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。


10 警察行為表現EQ低?(25555筆)

——唔好搞我後面

香港警察,一向都話自己係專業人士,遇到唔同嘅事都有高度嘅自我克制能力。不過到咗近呢三個月,喺香港嘅社會運動入面,有唔少網上流傳嘅片段,都令網民覺得警察失去控制。例如早喺6月,就出現咗一位阿Sir疑似頂唔住楊岳橋議員嘅質問,高叫「唔好搞我後面」,但後面只係得佢嘅同事。又有阿Sir挑釁示威者,叫人哋同佢隻揪,令好多人都話佢哋失哂控。

9 警察同黑社會合作?(35010筆)

——元朗、北角

喺香港7月21號,大家都熟知嘅「元朗黑夜」之前,絕大多數嘅香港人都唔會相信,代表社會公義、良知嘅香港警察,竟然會有機會同本地嘅黑社會勾結。可惜嘅係,不論721當日香港警察唔理示威者安危,放任黑社會打人,已經喺香港電台《鏗鏘集》同美國《紐約時報》有好充足嘅講解。最近9月15號,香港北角都有黑社會出沒打人,《立場新聞》有詳盡報道

8 警察私刑對付香港人?(38251筆)

——毆打老人

香港警察對付示威者嘅手法,一直都係佢哋聲稱嘅「最低限度武力」,但呢種講法就成日俾香港網民質疑,因為好多示威者頭破血流嘅相片、影片,似乎都唔係警方「最低限度武力」喎。根據《立場新聞》,公民黨郭家麒就形容警方係「絕對私刑」。而民主黨喺8月20號公開有老人係醫院被警員「濫用私刑」,連老人家都打埋一份,唔怪得咁多網民唔信警察嘅。

7 警察記者會講大話?(38816筆)

——831大搜捕

隨住香港社運抗爭時間愈拉愈長,去到而家已經超過一百日,都未見呢場社運嘅終點喺邊。正因為咁,要爭取話語權解釋事件就相當重要喇!香港警方成日都召開記者會,固定咁講解自己行動原因,而記者都不時提出尖銳嘅問題,其中有關8月31號大遊行前警方連環拘捕多位政治人物,其中警方解話就俾律政司法庭檢控主任質疑,話佢哋公然講大話,警方唔可信。

6 警方濫捕香港示威者?(40283筆)

——超過一千多人

根據《自由時報》報道,香港因應「反送中」引起嘅社會運動,到9月17號,已經有成一千五百多名嘅示威者俾警方拘捕。期間,有唔少市民都俾警方用「莫須有」嘅罪名拘留,當中要數最出名又最莫名其妙嘅,當然係浸大學生會會長方仲賢喺8月16號買鐳射筆觀星,但就俾警方用涉嫌管有攻擊性武器罪名拘捕,即時引起大量港人買入鐳射筆,變成遊行社運工具。

5 警方濫用暴力?(42076筆)

——最低限度武力?

香港警察由6月嘅社會運動武力驅散同鎮壓開始,每次召開記者會,都一再強調香港警察係專業嘅,所有武力都只係最低限度嘅武力。但係,早喺6月21號,國際特赦組織(Amnesty International)已經話咗香港警方喺6月12號使用過度武力,違反了國際人權法(international human rights law and standards)。更加唔好講 ,之後巾更多更高武力嘅事件喇!

4 警察沒有委任證?(60117筆)

——市民無得投訴

香港一直有個朵,叫做投訴之都;香港人一直有個花名,叫做投訴王。事關香港人真係好鍾意咩事都要投訴一番。咁其投訴都係香港人嘅權利,好可惜嘅係,係近呢三個月嘅香港社運之中,好多警察執法都無show出委任證,唔單止唔合法,更令香港人無得享受投訴嘅權力,令到香港人認真唔開心。認唔到警察,咁大件事,連王喜都拍咗條片諷刺警方。

3 警方濫用權力?(77620筆)

——香港仲安唔安全?

根據中央廣播電台報道,公民黨立法會議員陳淑莊,喺9月16號,出現咗喺日內瓦召開嘅聯合國人權理事會(Human Rights Council)發表演講。佢指控香港警方濫用公權力對付示威者,令到香港市民以至記者都失去人身安全,連言論自由都無埋。又好似之前網傳法國記者高叫香港警方故意向記者發射催淚彈咁,香港人質疑嘅理由,有圖有片,真係唔小事喎。

2 香港警察入面有公安?(88487筆)

——中國全力支援

《852郵報》創辦人暨總編輯,香港前《信報》副總編輯游清源受訪話,香港警隊入面有公安滲透,已經唔係第一日嘅事喇!佢仲話,自2014年雨傘運動之後,香港警方一直有北上受訓,而大陸公安都會攞單程證落香港,之後仲會光明正大咁做埋警察。而近日「反送中」社運入面,網上就流傳咗多條影片,好似係操大陸普通話嘅人執法,似乎有唔少網民相信。

1 港警扮示威者有冇犯法?(93170筆)

——彈出又彈入吹咩

8月11號8月31號,根據《關鍵評論網》報道,有警察係示威者當中扮做佢哋嘅一分子,然後再視機會加以拘捕示威者。呢種行為,令香港人相當驚訝,好多人都怕喺示威期間俾「鬼」陷害。更加有網民話,可能警察會刻意令現場情況惡化,搞到出現更多嘅流血衝突事件。到底警察咁做有冇犯法?警方就話佢哋無做任何犯法嘢,唔知你又點樣睇呢?

分析說明:

本研究資料由《KEYPO大數據關鍵引擎》提供,分析時間範圍為2019年06月08日至2019年09月16日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『香港網民對香港警察十大質疑』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。


「加入香港網路溫度計Fan Page睇睇網民嘅花生係乜嘢?」>>>

---------------------------------------------------------------------------------------------------------

DailyView曰:

係咪跌咗良心?

接續看下一篇

x

訂閱DailyView網路溫度計(香港版)電子報