反送中送走埋一段關係變敵人!十大因為反送中運動破裂嘅關係!

反送中送走埋一段關係變敵人!十大因為反送中運動破裂嘅關係!

有人話:人與人之間關係好脆弱。係政治立場,是非黑白面前,為咗一段關係你會選擇忠於自己,定委曲求全?

2019/09/20

生於亂世 有分黃藍

大家成日話講錢傷感情,喺呢3個月嚟可以改口做:講政治傷感情。因爲黃絲藍絲勢不兩立,令唔少人變成敵對,最誇張甚至係導致關係破裂。其實每個人都有思想、言論自由,特別係政治話題方面,有唔同立場係好常見嘅事。不過隨住反送中運動越演越烈,兩邊立場唔同嘅人矛盾同衝突都不斷變大,今日DailyView用網路大數據帶大家一齊嚟望下呢3個月入面因爲反送中導致不和嘅排行前十名!

DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

反送中 反面
10 有病都唔敢睇醫生!(341筆)

無病無痛邊有人想睇醫生,不過依家好多示威者受傷,流到成面血都唔想求醫。醫療救援呢件事本身應該係中立,不偏不倚,但事源612金鐘衝突之後,有5名示威者係醫院被拘捕,令唔少人擔心如果去醫院求醫會被警察拉,為咗唔好送頭,大家寧願向一D熱心醫護人員成立嘅醫療專線同Telegram群組求助。


image source:Facebook/ 金水
9 示威搞到眾叛親離(625筆)

屋企本身應該係每個人嘅避風港,不過當兩代人觀點同感受有所不同,日對夜對分分鐘變成日嘈夜嘈。反送中運動參加者,亦即係大家講嘅黃絲,大部分都係年輕人,而多數所謂藍絲係年級比較大嘅長輩。唔少後生仔因爲發夢搞到同屋企人嘈交,唔想起衝突就唯有唔返屋企,有家歸不得。同街外人意見不合,可以據理力爭,又可以掉頭就走,但對象係親人,就避無可避喇。

image source:Facebook/做水
8 白色恐怖下篤灰(658筆)

打工仔每日返工8個鐘,見面時間可能仲多過屋企人,如果唔同channel日日篤眼篤鼻都咪話唔辛苦。以前有人話職場如戰場,宜家黃藍對立,透過篤灰排除異己呢D事就開始發生。早前港龍空勤工會主席施安娜就因爲有人篤灰,向公司提供佢喺個人社交網站轉發嘅反送中消息,被公司高層召見之後即時解僱。國泰航空都傳出白色恐怖,有空姐話差唔多牽涉一百人,部分接受調查,嚴重嘅仲被解僱。

7 同學都恥與為伍(1086筆)

頭先有提過今次反送中運動參與者好多都係學生,今個暑假相信大家都好難忘,唔係返學都成日約埋出黎發夢。喺呢幾個月嚟警察執法手段備受質疑,示威活動中好多學生都受傷,之後有人發起杯葛警二代行動,希望令警察仔女影響返自己父母。有警察回應擔心自己仔女。於是有網友就話:大棍大棍打人哋仔女,然後怕自己仔女被排擠?其實執法大家都理解,不過用咩標準去執行,就係大家最關注嘅重點。


image source:Facebook/ 咖喱張
6 偶像言論不代表Fans立場(1183筆)

做得偶像、明星,點都有返咁上下影響力,亦有可能有Fans追隨偶像行為,所以明星嘅言行舉止經常會比大家放大檢視,佢地對唔同事件嘅立場都會引起大家討論。一早被中國封殺嘅何韻詩今次運動同以前一樣出心出力,自然被大家捧上神台。而楊千嬅早前喺Instagram發表咗一張寫住RIP嘅相,後來被中國網友攻擊之後即刻刪除,仲表示熱愛香港同祖國。陳曉東,譚詠麟等等嘅香港藝人就因為支持中國嘅立場,令好多支持多年嘅Fans就話對偶像好失望,要狠心摧毀珍藏多年嘅專輯,以表示割蓆嘅決心。

image source:Youtube / 852郵報
5 Unfriend無情講(1288筆)

呢個年代Facebook,Instagram加個好友話咁易,不過有幾多真係你嘅真朋友呢。呢段時間入面日日咁多資訊,一打開Facebook又見到好友分享新消息,係黃係藍基本上一睇就知,如果大家同一陣線,俾個like之後順手再轉發,如果係敵對,有D人忍唔住留言嘗試理論,都有人選擇直接unfriend。所謂道不同不相為謀,依家形勢搞到咁,唔少人即使係多年好朋友,黑白面前都一樣無情講即刻unfriend。

image source:Facebook/金水
4 今年看更無利是(1608筆)

每逢新年喜氣洋洋梗係開心啦,不過最要大時大節開工最開心一定係收到一封又一封利是利是,個個人趕場周圍拜年大廈看更一日收到幾千蚊都唔出奇。8月3號有接近一百名市民喺馬鞍山警署外面聲援被捕人士,後來警察驅散示威者,更加衝入警署附近私人屋苑,同居民有所衝突。一班住戶好唔滿意點解保安會開門俾警察進入,之後就有網民話邊個保安開門容許警察入嚟,新年就唔好俾利是,懲罰佢咁話。

image source:Facebook/ 金水
3 愛情公義二選一(3977筆)

唔知大家記唔記得雨傘運動當年都曾經出現分手潮,示威行動持續咁耐,本身行街睇戲食飯嘅時間,變曬用嚟發夢,另一半真係少D包容同體諒都唔得。如果大家立場唔同,長時間意見分歧,的確好傷感情。連登就有兄弟分享自己因為堅持留守而比女朋友逼住喺愛情同理念兩者之間二選一。大局當前,呢位手足就決定放下兒女私情。亦都有自稱警察另一半公開發言話,因為無辦法接受伴侶為警隊工作而狠心分手。其實都啱嘅,大家價值觀唔同嘅話,再行落去都遲早有一日會爆煲。

2 有事唔好搵警察(4037筆)

細細個聽大人講:「有事記得搵警察叔叔幫手」,「警察保護市民」,不過呢D說話依家可能已經成為過去。呢三個月嚟多次警民衝突,導致警方同市民形成極端對立,市民、記者鬧警察,警察都還拖鬧返市民同記者轉頭。最多人覺得諷刺嘅係警察本身係所謂嘅「人民公僕」,收緊納稅人嘅錢,但反而成為傷害市民嘅人。而一次又一次嘅事件亦都令唔少人質疑警察執法嘅專業程度,作家倪匡表示,曾經良好嘅警民關係已經返唔到轉頭喇。

image source:Facebook/ 金水
1 全民罷飲罷食(7254筆)

本身大家每個禮拜六日最關心就係要去邊到打卡、影相,食好嘢,碌下Instagram睇下邊間餐廳最多人like。依家大家成日轉發嘅,就變成罷食餐廳、店舖名單。屋企人,朋友立場大家都好重視,俾錢幫襯嘅餐廳如果係同你唔係企同一邊嘅,咪姐係變相支持對方陣營!所以大家都食得好小心,聽到店員或者老闆表明立場之後,就即刻更新名單,楚河漢界劃得清清楚楚。黃絲,藍絲都分別列出兩邊店舖比自己人睇,你有你罷,我有我撐!

image source:LIHKG討論區

分析說明:

本研究資料由《KEYPO大數據關鍵引擎》提供,分析時間範圍為2019年06月08日至2019年09月18日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『十大因為反送中運動破裂嘅關係』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。


「加入香港網路溫度計Fan Page睇睇網民嘅花生係乜嘢?」>>>

---------------------------------------------------------------------------------------------------------

DailyView曰:

「勉強無幸福,道不同就唯有講byebye啦」


接續看下一篇

x

訂閱DailyView網路溫度計(香港版)電子報