政府記招Bingo紙?強烈譴責、外國勢力,十大官媒最愛用詞!

政府記招Bingo紙?強烈譴責、外國勢力,十大官媒最愛用詞!

唔好再說三道四

2019/09/27

BINGO
一齊玩香港記招Bingo喇!

香港自6月起因應「反送中」引發嘅社會運動,至今已超過100多日,各界皆未能判斷社運完結嘅日子。同時,因為警民衝突、流血事件愈演愈烈,加上市民質疑警方執法不公,促使香港市民對政府、警方嘅信任度持續下滑,達到有史以來嘅新低。係咁多事件之中,政府、警方為咗挽回民眾信任,不斷咁發起官方記者會,可惜嘅係,每次網民都唔鍾意佢哋嘅官方講法,甚至整埋Bingo紙取笑佢哋。今日DailyView就同大家一齊,細數十大官媒嘅最愛用詞,睇睇佢哋到底係咩意思喇!

DV小教室:網路溫度計透過《KEYPO大數據關鍵引擎》,觀測、爬梳港澳地區近萬個網站、頻道,其中包括新聞頻道、各大討論區、FB、IG以及Blog,從中取得資料樣本數,並以AI語意程式作數據分析。「網路熱度」為主題項目相關的網路posts和comments,數值愈大代表主題項目的討論度愈高。


10 行之有效(121筆)

——邊個決定有冇效?

到底咩嘢先係「行之有效」?喺香港社運入面,呢個其實係關鍵問題。香港保安局局長李家超話,獨立監察警方處理投訴委員會有唔同嘅職能,已經足夠處理投訴,查找警隊程序、做法不足之處,所以佢認為監警會已經有行之有效。不過,另一方面,香港市民就話獨立調查委員會先係真正行之有效,監警會根本無足夠嘅權力調調警方罪行,呢樣亦係五大訴求之一。

9 反中亂港(170筆)

——香港邊個整亂?

1997年香港主權移交中國,之後只要係香港人嘅社會運動,都會成日見到被冠上「港英餘孽」、「反中亂港」呢種用詞,話佢哋根本就係搞亂香港嘅罪人。今次「反送中」社運都一樣,8月13日新華社就以〈禍港亂港頭目必將自食其果〉一文,點名黃之鋒、羅冠聰、黎智英係反中亂港。不過香港網民就話,真正反中亂港係香港政府,無佢哋嘅施政,點會咁多人示威咁話。

8 說三道四(175筆)

——成日對香港說三道四?

咩叫「說三道四」呢?呢個四字成詞係話一個人以言語惹是生非,亂講一堆嘢,搞到件事仲差咗,不負責任咁。呢句話成為中國官方媒體嘅常用詞,好似近日香港「反送中」社運咁,因為世界各地都有各個領域嘅人支持香港示威,甚至話要求中國改善人權。中國外交部就曾經堅決反對英方對香港問題說三道四,不過呢,對香港市民嚟講,呢種「說三道四」或者真話。

7 顏色革命(294筆)

——紅藍黃邊隻色好睇?

顏色革命(Colour revolution),指嘅係80、90年代喺中亞、東歐追求自由民主、普世價值嘅政治抗爭,立場親西方同親美,多數會用某一種色代表自己。中國官媒對於革命呢個字緊係好敏感,即係要推翻現有政權喇!只要見到香港自2014年雨傘社運,到今日「反送中」社運,都係用黃色,就話呢種係顏色革命。網民就話唔理革唔革命,顏色都係黃色好睇喎。

6 嚴正執法(547筆)

——嚴正對邊種人執法?

香港警察對待示威者,自6月起一直都有質疑佢哋嘅「最低限度武力」,不過呢種並唔係而家坊間對警方最有力嘅指控。真正有相有片,廣受香港市民質疑嘅,喺由7月21日元朗黑夜白衣人無差別恐襲,香港警方放任白衣人攻擊民眾,事後亦欠缺有力拘捕、追查,民眾再唔信任警方「嚴正執法」。不過警方代表一再宣稱警察絕無偏坦,對任何犯法人士都嚴正執法。

5 外國勢力(572筆)

——iPhone係咪外國勢力?

香港「反送中」社運熱門標籤,一定非「外國勢力」莫屬喇!好多建制派議員都話,今次香港社運可以搞得 咁大,咁鬼有組織同咁多活動,背後一定係外國勢力指使。呢個外國勢力,講緊嘅緊係同中國打得火熱嘅美國。立法會議員蔣麗芸受訪時,仲話見到有外國勢力指揮示威,仲示範埋各種手勢嘅意思。另一面,網民就反問,咁係咪大家買部IPhone都係漢奸?

4 和平理性(705筆)

——理性一定要和平?

一直以嚟,香港人示威遊行都有一個信念,「和平、理性、非暴力」。可惜呢種美好嘅理想,喺6月份百萬人和平遊行之後打破咗,而香港市民支持勇武,理解激進行為嘅人數達到前所未有嘅新高。呢種情況之下,即使警方一再聲言示威者多數都係和平理性,但分化唔到香港嘅不割蓆。官媒一直話希望香港早日回到和平理性,但好似香港網民咁講,佢哋而家先係最理性。

3 中央政府(744筆)

——邊個話示威者要港獨?

香港自6月起嘅社會運動,由最初嘅「反送中」到「五大訴求,缺一不可」,再講「光復香港,時代革命」,高唱《我願榮光歸香港》。一直以嚟,呢100幾日,香港示威者都會真正咁講過要港獨,更加唔係社運要求嘅主流意見。但係,中國中央政府一直都發話,話唔少香港嘅示威者係要求港獨,並未真正咁了解明白香港社運嘅訴求。五大訴求,其實只係要求香港政府解決。

2 強烈譴責(934筆)

——強烈譴責,無助解難?

香港社運呢100多日,至今已經陷入咗一個互相「強烈譴責」嘅局面喇!香港示威者有民間記者,佢哋多次強烈譴責香港警方嘅無理行為,刻意傷害手無寸鐵嘅示威者,甚至濫用權力拘捕、拘留香港市民,而政府放任警方,令到香港人出街都驚。而政府、警方就差唔多每次記招都講,有部份示威者相當暴力,強烈譴責呢堆暴徒嘅惡行,佢哋令香港玉石俱焚喎。

1 一國兩制(1616筆)

——一國兩制,各自表述?

香港自1997年主權移交,「一國兩制」係相當重要嘅條件,香港至少許諾咗「五十年不變」。一國兩制,即係呢五十年之內,香港係保有高度自治,中國唔可以影響太多香港嘅運作。但係而家中國以至香港政府對一國兩制嘅講法已經唔同,佢哋認為一國高於兩制,中國有權直接干涉香港。而香港示威者就認為,佢哋先係真正保護一國兩制嘅人,因為咁先係原本港人治港嘅諾言。 

分析說明:

本研究資料由《KEYPO大數據關鍵引擎》提供,分析時間範圍為2019年06月08日至2019年09月25日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『香港社運官方媒體十大用詞』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。

「加入香港網路溫度計Fan Page睇睇網民嘅花生係乜嘢?」>>>

---------------------------------------------------------------------------------------------------------

DailyView曰:

香港人苦中作樂嘅境界真係好高!




接續看下一篇

x

訂閱DailyView網路溫度計(香港版)電子報