一罩難求!拎著口罩救市救港嘅十大香港人 香港眾志先第二名!

一罩難求!拎著口罩救市救港嘅十大香港人 香港眾志先第二名!

肺炎再猖狂,都狂唔過香港人橫掃口罩嘅決心!

2020/02/21

香港人互救精神發力!

雖然話全城抗疫,不過喺社會咁分化嘅情況下,不論係搶物資、撐唔撐醫護罷工、就連有人自發性派口罩幫人,竟然可以演變成另一種撕裂嘅局面。不過人性始終有光輝嘅一面,真係大難當前,有多一個口罩嘅人都會攞出來幫無口罩嘅人,今日就等DailyView用網路大數據話你知,有邊10位帶著口罩救人嘅香港精神代表啦!

DV小教室:網路溫度計透過《KEYPO大數據關鍵引擎》,觀測、爬梳港澳地區近萬個網站、頻道,其中包括新聞頻道、各大討論區、FB、IG以及Blog,從中取得資料樣本數,並以AI語意程式作數據分析。「網路熱度」為主題項目相關的網路posts和comments ,數值愈大代表主題項目的討論度愈高。

派口罩
No. 10 王維基(443筆)

由HKTV創辦人王維基所經營嘅網購平台HKTVmall,係市面流通買到口罩嘅來源之一,而各地通路喺口罩出現缺貨都開始限購,HKTVmall亦有限度地分批售賣口罩。同時間又派員工飛到東南亞等地搜刮貨源,王維基本人甚至飛到台灣搵口罩製造商,話要生產「香港人嘅口罩」。全城咁樣撲口罩,非常識搞公關嘅王維基就大手筆咁每位員工派一盒口罩,穩定大家返工又要面對搶貨潮嘅心,仲呼籲員工健康先可以照顧香港人。以目前口罩仲矜貴過錢嘅時勢,王維基免費派嘅呢批口罩,賺得全港對HKTVmall的良心企業印象。

網友:「一個商人都可以做到咁,但政府乜都唔肯做。」

image source:FB/HKTVmall
No. 9 馮盈盈(495筆)

被連登網友高標準認定嘅貼地港姐馮盈盈(網稱FFY),自發到屋邨派口罩畀老人家,喺Facebook同IG打出長文,抒發自己17年前經歷SARS帶晒口罩嘅日子,同依家對比總算有能力可以幫助其他人。雖然出文時間撞正六號(陸浩明)喺節目上講錯嘢之後,網友自然唔會放過呢個機會質疑FFY係咪趁機補鑊,不過自發性憑一己之力湊幾百個口罩,親力親為去派畀街坊,咁樣嘅舉動本身就勝過螢幕後面嘅冷氣軍師。不出所料留言梗係清一色支持同好評,更加話FFY由香港小姐晉升香港仙女,真正成為香港最靚嘅代表啊。

網民:「真港姐,唔需要任何機構支援,做返自己最好,讚。」

No. 8 葉劉淑儀(1118筆)

新民黨主席葉劉淑儀都算得上完全唔得民心嘅政府官員之一,不論係以往嘅言行令人髮指之外,今次就算有善心人士捐贈口罩,但咁嘅情勢下都非常唔討好。事源葉太喺佢自己Facebook上嘅「瘟疫日紀事」系列寫到新民黨中委王聰德父子捐贈咗一批口罩,新民黨會代為派到安老院。然而網友細心嘅發現,嗰批口罩就係被揭發過「薄到無功能」嘅黑心口罩。 雖然話口罩難求,不過連基本功能都無嘅口罩,真係唔戴好過。至於傳媒同葉太求證嘅時候,葉太就表示派口罩嗰陣都有解釋過材質,有同街坊講「唔嫌棄先好攞」。

網民:「真係非常有用喎,留番(返)疫情完咗之後俾(畀)大家開工用。」

No. 7 喬寶寶(2234筆)

以香港為家嘅印度裔藝人喬寶寶,向來都係香港少數族裔嘅代表,抱著「幫得幾多得幾多」嘅心態, 佢就連同開餐廳嘅老友一齊派發1萬5千個口罩畀老人家,場面雖然混亂再加上有排唔到籌嘅人大鬧成件事係做戲,喬寶寶就話佢有心理準備,無辦法幫晒所有嘅人。有網友就話平時香港人對少數族裔唔係太友善,不過危急關頭就掉返轉頭係少數族裔為香港人付出,形容非常感動。喬寶寶就話希望咁樣可以改善大家對南亞人嘅印象。

網民:「香港人成日就笑賓妹印傭阿叉巴基乜坦,依家就係佢地救返本地人,真係多謝佢地,每個都係我地嘅朋友。」

image source:FB/喬寶寶 Qbobo
No. 6 杜汶澤(2351筆)

不屑賺人民幣嘅杜汶澤,政治立場已經出晒腸,面對今次有網友認為「邊個再派口罩物資就係反手維穩」嘅言論,反而企硬表示病毒無分黃藍,防範細菌傳染比咩都重要,就算對方係咪同路人都係咁講。懶理俾人當成鬼咁批鬥,依然繼續籌口罩、籌完口罩籌消毒洗手液、籌完繼續搵窿路籌漂白水,物資除咗派畀有購買困難嘅老人家之外,仲有香港護士協會、同埋無黨派議員郭子健,唔單止略盡綿力來救港,一切嘅行動都反襯香港政府嘅毫無作為,直接批評政府無盡責保護香港人。

網民:「多謝杜生的熱血!感激!」

image source:FB/杜汶澤
No. 5 林鄭月娥(2505筆)

呼籲大家理性抗疫嘅行政長官林鄭月娥,喺全球搜購口罩嘅工作上依然做緊最大努力,紓解市民日排夜排嘅狀況。階段性做得幾多得幾多,林鄭月娥就將之前獲私人捐贈,大約160萬個口罩全數捐贈非政府機構同弱勢社群。日前更到藍田同九龍城探視獨居長者同基層住戶,派發口罩同食物等物品。與此同時,林鄭月娥嘅公關團隊透過Facebook表示抗疫期間有好多謠言、假消息傳播,引起市民不必要嘅恐慌,從而增加咗政府抗疫嘅難度,仲引用世界衛生組織總幹事嘅話「需要團結,而非污名化」,希望香港人可以團結渡過逆境。

網民:「支持齊心抗疫!打敗病毒! 」

image source:政府新聞處
No. 4 李嘉誠基金會(2899筆)

香港人心中永遠嘅首富嘉誠哥,身體力行話你知咩叫取之社會、用之社會,李嘉誠基金會早前為武漢醫護直接捐款1億港幣作為支援。另一方面不忘香港市民,基金會表示透過全球友好網路,第一批物資已寄到香港,總共25萬個口罩會派到社福機構同長者院舍,主要係幫助低收入家庭、病患者、獨居長者甚至基層人士等。同時亦發布消息,基金會一直努力採購符合醫療規格嘅防護衣、醫療口罩等,用來提供畀前線醫護人員。危難當前,有錢出錢、有力出力嘅行為非常得民心,甚至有人高呼誠哥做特首算數。

網民:「哈, 私營公司做埋政府公僕應做嘅事,呢個政府……」

image source:FB/李嘉誠基金會
No. 3 Bob叔(3058筆)

橫跨飲食、旅遊界別的Bob叔,廚藝了得又夠真性情,喺YouTube片中激動之處就會爆兩句粗口,夠晒市井貼地。加上Bob叔邊煮邊大談時事節目,自反修例風波開始,Bob叔亦會開直播同網友交流,包括討論警暴、及封關等熱門話題,立場鮮明而且言論都幾刺激,成為敢言嘅香港YouTuber代表之一,廣受網民愛戴。之前仲現身黃色經濟圈嘅集會,表示全力支持。活躍於連登嘅Bob叔,日前出post話佢跟杜汶澤同黃之鋒嘅腳步,不惜喺英國食藥房炒價都掃到8千個口罩,會寄返香港派畀有需要人士,仲話會繼續採購再寄返香港,無私嘅行動簡直就型到出汁 。

網民:「真心型。Bob 叔 我愛你。」

image source:連登討論區
No. 2 香港眾志(黃之鋒)(12951筆)

民間政治團體香港眾志,落實「聚眾之志」嘅精神,繼之前由美國買到嘅10萬個口罩後,透過海外港人同多個團體嘅協助下,又成功喺洪都拉斯撲到口罩。香港眾志祕書長黃之鋒就喺Facebook宣布有120萬個口罩成功清關並送達香港。百萬計嘅口罩成本高達七位數字,由民主派政黨共同出資,之後會透過幾十位無黨籍及素人區議員派到市民手上。雖然今次搜購數量可觀,但黃之鋒亦直接講明民間嘅供應數量遠追唔上街坊需求,需要大家嘅諒解同耐心。而香港眾志亦表示會繼續用唔同嘅管道來搜羅資源,實行民間自救。

網民:「多謝眾志,香港只可自救,一齊加油。」

No. 1 Tommy 阮民安(14009筆)

被稱為樂壇小強的前E-Kids成員—Tommy(阮民安),面對依家口罩短缺嘅情況,Tommy就喺海外訂購大批口罩喺街頭免費派發,唯一條件係領取口罩時要高呼革命或仇警口號,呢部分唔單止引起部分市民嘅反感,連創作人恭碩良亦出post表示唔妥, 不過就調返轉頭俾人鬧到要刪文,大部分網民對於Tommy都係充滿感激之情,評價佢係娛樂圈中少數真係身體力行做實事嘅人之一。喺早於8月就有媒體報導佢露面參與反修例遊行,其高調嘅政治表態獲得網友正評;但部分網友就唔買單,認為Tommy只係抽緊政治水來重新搏上位。

網民:「Tommy多謝你,你為我哋既付出實在太令我哋感動!」

image source:IG/tommyboy_ekids

網路溫度計香港版嘅Telegram開咗喇!快D嚟follow我哋啦https://t.me/dailyviewhk

【香港網路溫度計調查結果之圖文,未經授權請勿轉載、改寫】

分析說明:

本研究資料由《KEYPO大數據關鍵引擎》提供,分析時間範圍為2020年01月01日至2019年02月19日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『派口罩嘅人』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論熱度大小,不代表網友正負評價。

「加入香港網路溫度計Fan Page睇睇網民嘅花生係乜嘢?」>>>

---------------------------------------------------------------------------------------------------------

DailyView曰:

仲有我女神Stephy啊!



接續看下一篇

x

訂閱DailyView網路溫度計(香港版)電子報