網民力讚都要刪Post?吉野家瞬間被狂插

黃子華曰:「公關做得唔好,食屎架喇!」香港地,公關災難時時聽聞,好多都一直流傳喺網路俾人抽水,真係好事不出門,醜事傳千里。公關做得唔好俾人炒魷相當正常,但勢估唔到,連做得好都會出事噃……

image source:《KEYPO大數據關鍵引擎》

文:積遜猿

香港知名日本連鎖餐廳吉野家,一向都係以「抵食下午茶」同「吉野家打邊爐」深受港人歡迎,分店仲開到六十幾間,認真厲害。近日吉野家捲入咗「反送中條例」嘅紛爭,網路討論聲量激增,由原先受到網民激讚,變成發起抵制唔食吉野家,真係刺激過坐高鐵囉!


image source:FB 香港吉野家 Yoshinoya Hong Kong截圖,已刪文


吉野家FB Page喺7月10號,Post咗一篇以「獅子狗」為核心內容嘅文,「想食獅子狗,唔只大埔有。嘢可以亂食,名唔可以亂叫」,推銷吉野家嘅竹輪火鍋。網民摩擦力相當高,明眼人一睇就知係移花接木,「獅子狗」嘅諧音,咪就係因為大埔警察撕走連儂牆紙,網民諷刺警察為「撕紙狗」嘅抽水用詞囉!


網民見到吉野家公關跟得咁貼,抽水又抽得咁順其自然不著痕跡,當然個個都話要組隊去吉野家食「獅子狗」。哇,就咁睇吉野家今次嘅公關真做得唔錯喎。


image source:FB 職工盟


但呢則Post文喺7月11號晚,竟然刪走咗!根據7月12號《文匯報》嘅報道,原來吉野家母公司合興嘅行政總裁、全國政協委員洪明基睇到個Post嬲嬲豬,即時下令刪Post,仲Frie埋負責廣告嘅員工,同間廣告公司解約咁話。


網民見到呢件事,緊係相當不滿,好多人都話「抵制吉野家」,「唔食吉野家咪食其他囉」。職工盟話呢件事係「赤裸裸的政治迫害」,仲去咗吉野家油麻地分店外面舉牌抗議,「吉野家,不了」、「罷食吉野家」,職工盟總幹事蒙兆達仲形容洪明基係「染紅獅子狗」。



雖然呢,吉野家FB Page出咗個Post,話無人俾人炒咗。但係睇留言呢,大家都唔係好信,有人話「無事又會刪Post」、「這社會越來越多人講大話」。只可以講,今次呢件事吉野家係網民心中,已經係由天堂跌入地獄喇!

 #我都無嘢講


延伸閱讀►


片/邊個係廢青?佔領立法會HKU義士露面受訪

片/反送中嘅網路影響:Telegram喺香港到底仲安唔安全?

片/灣仔阿叔串爆警察?霸氣哥再現「反送中」示威!

x

訂閱DailyView網路溫度計(香港版)電子報