被《時代》選中嘅連登仔!同特朗普齊名,網上最具影響力25個人

自6月9號,香港人針對「反送中」逃犯條例嘅抗爭,延續至今。「東方之珠」香港,今次嘅社會運動備受國際社會關注,以前《時代》雜誌封面已經登出過香港6月12日「反送中」示威,以「抵抗(The Resistance)」作為標題,配上黑色嘅雨傘背後有濃濃催淚彈煙霧。今次,《時代》雜誌又再講香港。

Image source:TIME

文/積遜猿

香港睇落只係一個彈丸之地,但受到國際嘅關注卻相當之多。由2014年雨傘運動,到2019年「反送中」示威,每次各國重要報章、雜誌都會有詳細報導,香港人嘅形象相當正面,認為佢哋係值得學習,高質文明嘅抗爭者。2019年7月16號,《時代》雜誌選出咗二十五位網上最具影響力嘅人,入面有特朗普唔奇,但又點估到,竟然有「香港抗爭者(Hong Kong Protesters)」。

Image source:Twitter TIME

《時代》雜誌用咗一大段文章,解釋香港抗爭者同網上之間嘅關連,點出佢哋點解可以作為唯一一個群體,擠身二十五名之一。該文首先強調,香港抗爭者嘅「反送中」運動,最重要係「無大台(leaderless)」。咁佢哋無領袖,並唔代表無平台連繫彼此,大台已經成為歷史,網路社群時代先係未來。香港抗爭者用上連登,做連登仔;開Telegram,接收消息,反映咗新世代抗爭思維、手法嘅改變。

內文好仔細咁描述咗,香港抗爭者點樣用呢兩個工具搞社會運動,形容貼近「直接民主制(more of a direct  democracy)」。好似連登咁,連登仔開Post分享睇法,講吓之後活動要點行落去,大家同意嘅話就會俾正評,留名推Post,令件事得到更多嘅關注。而Telegram,本身加密相對其他App安全,適合大家討論活動嘅各種可能,亦都可以一人一票決定方向。

Image source:Wiki

更重要嘅係,兩者都同樣會公布各種資訊,好似之後社會運動嘅日期,如果被警察拉咗有咩合法權利要留意,同時亦都係香港抗爭者有歸屬感、安全感嘅地方。正如抗爭者劉頴匡受訪講:「我哋相信人民嘅力量、思想,一定會做出比有大台領導更好嘅決定。」呢種,就係香港抗爭者善用網路嘅力量。

一齊睇睇連登網民點睇:「今鋪全球認證晒」、「連登正式成為外國勢力」、「一個local forum勁到上左time」等,今次真係被《時代》選中嘅連登仔喇!

延伸閱讀►

片/蔣麗芸要連繫外國勢力?民建聯神盾局,We-connect

網民力讚都要刪Post?吉野家瞬間被狂插

片/邊個係廢青?佔領立法會HKU義士露面受訪

x

訂閱DailyView網路溫度計(香港版)電子報