片/年輕人嘅守護者葉德嫻!銀髮族遊行誓言唔做廢老

自2014年雨傘運動,去到2019年嘅「反送中」逃犯條例抗爭,無論係黃定藍,係市民定警察,係後生仔定老人家,都無得唔承認世代差異、社會撕裂已經相當嚴重。後生仔俾人話係「廢青」,老人家都變埋做「廢老」,竟然都喺「大和解」嘅潮流之中,後生仔同老人家都可以We-connect。

Image source:FB 有種責任叫堅持

文/積遜猿

6月9日「反送中」事件延續至今,大家都將個關注點放喺八十、九十同零零後,話佢哋喺香港土生土長,對呢個地方好有感情,亦都願意為社會拋頭顱灑熱血。呢段時期,亦都有好多後生仔話唔識同屋企嘅老人家溝通,形容佢哋係「廢老」,唔肯接受後生仔對社會嘅睇法,剩係識食蛇齋餅糭喎,

呢個講法當然相當「標籤化」,一竹竿打低成船人,緊係無助解決世代差異喇!其實今日睇真啲,香港好多社會運動,由八九民運去到而家,都仍然有唔少老人家拖著年邁嘅身軀行出嚟,只係為咗同後生仔一樣爭取嘅理想、公義。要數香港銀髮族最出名嘅代表,相信一定係近日頻密參加「反送中」示威遊行,金像獎兼金馬獎影后葉德嫻莫屬喇!

香港老人家喺7月17號妟晝發起「銀髮族」遊行,提出撤回惡法、成立獨立調查委員會同實行雙普選等五大訴求,正如佢哋FB專頁嘅名一樣,高叫「銀髮族老而不廢」,要同後生仔站喺同一陣營,大會估計有成九千人參加,認真難得。葉德嫻接受訪問,就話:「年輕人,多謝你哋,如果唔係你哋個惡法已經係過咗架喇。所以我哋好感激,同埋希望你哋唔好受傷,要堅持落去,你哋係做得啱。你哋無做錯!」

同場其實都仲有另一位年近銀髮,五十七歲嘅歌手黃耀明陪住葉德嫻,佢亦都接受訪問,講吓自己嘅感受:「我哋要繼續行出嚟喇,因為呢個政府真係將人民同警部放喺一齊對立,我覺得呢個係唔可以匿喺警棍後面,要繼續出嚟,回應我哋嘅訴求。香港唔可以繼續咁樣管治落去,佢一定要回應所有人嘅訴求。」

Image source:FB Claudia Mo/毛孟靜

睇返今次「銀髮族」遊行,我哋會發現在場好多後生仔陪住老人家行,沿途自發站喺路邊維持秩序,仲喺終點排成人鏈係咁多謝老人家嘅付出、支持。正如「銀髮族老而不廢」FB Page嘅總結:「今日創造一個紀錄,銀髮族與年輕人連結」。就等我哋一齊拒絕「標籤」,後生仔、老人家「大和解」,We-connect!

image source:《KEYPO大數據關鍵引擎》

根據我哋嘅《KEYPO大數據關鍵引擎》「文字雲」會見到有關葉德嫻嘅留言都相當正面,例如「好嘢」,多數都係網民力讚葉德嫻。而「支持」嘅留言,唔少都係話「Deaine姐支持你」,「我撐德嫻姐」咁。而「多謝」就更加唔需要講喇:「Elderly is our good model!」、「銀髮族咁多位,感謝你哋!」、「良心藝人」、「如果香港全部老人家係呢種人,我必定每次見到都讓座」、「葉德嫻,多謝你,有良心,藝人」。


延伸閱讀►

被《時代》選中嘅連登仔!同特朗普齊名,網上最具影響力25個人

片/蔣麗芸要連繫外國勢力?民建聯神盾局,We-connect

網民力讚都要刪Post?吉野家瞬間被狂插

x

訂閱DailyView網路溫度計(香港版)電子報