片/香港社運型YouTuber!大 J 轉型想參選區議員

2019-07-19

3348Views

香港一向都有唔少YouTuber,但通常愈出名嘅,就愈容易俾人批評話佢低質。呢個現象,特別係高登、連登嘅網民定律「逢紅必反」,除咗上神枱嘅名人好似黃子華咁,真係無咩人可以打破。又點估得到,喺香港最近呢個亂世當中,竟然出現咗一位人兄打破定律,受到網民激讚。

Image source:大J FB大J IG

文/積遜猿

香港知名全職YouTuber 大J ,一向主力拍打機、淘寶開箱嘅影片,係香港第一個突破50萬訂閱數嘅YouTuber,至今訂閱數已經達70萬以上,而佢嘅年收入亦早喺2016年超過一百萬港幣,真係相當成功。不過,正所謂樹大招風,成功嘅背後難免會招人妒忌,佢因為咁都受到唔少網民嘅批評。咁多批評入面,最多被人提及嘅就係認為 大J 嘅觀眾年齡層偏低,仲會用「小學雞」形容佢嘅受眾。

不過自從 大J 拍咗一段影片,題目係「6月9日。上街吧。」顧名思義,佢係叫大家6月9日要上街頭,為反對「反送中」逃犯修例發聲!雖然佢當時身在美國,而喺香港,但精神都同香港市民同在。網民見到,即時分享喺各大網路社群、討論區,力讚佢喺關鍵時刻發聲,一定令好多後生仔知道「反送中」事件,令到抗爭力量更加強大。「經常看大J,由這段片開始,增加了幾分敬意!」,網民嘅留言,亦都係代表咗香港人嘅心聲。

大J 自白話:「平時政治嘢,我真係極少極少出聲嘅,但今次呢件事真係關乎到作為一個香港人,往後落嚟果個情況,究竟香港嘅未來係點樣。香港回歸話五十年不變,基本法又話五十年不變,但係其實事實上香港嘅環境已經慢慢變緊。」「我希望有睇呢條片嘅觀眾,如果你係有時間嘅,應該話無時間都要整啲時間出嚟,為香港表吓態。」

唔好以為大J 得個講字,佢之後仲仲去埋抗爭現場拍片!佢首先喺「光復屯門公園」運動前夕,去咗現場先睇吓大媽嘅表演有幾擾民,之後又喺正日參加光復行動,好似戰地記者咁拍到好多衝突場面,用佢嘅YouTuber影響力,令更多人知道呢件事嘅情況。

「我哋除咗直接出嚟行動之外,我哋亦都有好多其他嘅嘢可以做到嘅。如果大家都認為要俾返一個寧靜而且乾淨嘅公園市民享用,大家睇完呢條片之後,Send返封E-mail去有關嘅部門。」大J 講到呢個地步,做到呢個行動,又叫人登記做選民,已經被網民封佢做香港YouTuber嘅良心,仲話佢轉型做埋社運型YouTuber!

喺7月15號,香港「光復上水」社運入面,佢又去咗現場拍片!最後呢,佢又再自白:「我真係好佩服香港班後生仔,為咗社會上好多不公義、不公平嘅事,肯走出嚟為香港人發聲。我真係好佩服佢哋。我都好想一直陪住佢哋留到最後,但可惜嘅係,我個人嘅體力真有啲不繼,我運動不足唔夠FIT,所以大家應該做多啲運動,操FIT啲,咁先可以繼續抗爭落去。」

   

千其唔好以為大J 咁做有咩好處,佢自己都話,因為今次對「反送中」事件發聲,保守估計已經損失咗六位數字嘅贊助同合作。但佢無懼風雨,依然堅持講自己想講嘅說話,就喺7月18號,仲喺FB問網民:「如果YouTuber去選區議員,你覺得有幾多勝算?」此言一出,即時引起網民瘋狂討論,一齊睇睇網民點撐佢喇:

網民張繼聰:「支持大j 追擊自動當選區!」

網民尚多湖:「功能組別整返個YouTube界。」

網民Aerovelocity:「佢選我出嚟助選,係就撼個建制。」

網民毒不可耐.:「入我嗰區我投硬你!」

網民波蘿的的:「大J 如果你睇到的話,我一定支持你呀!」


延伸閱讀►

被《時代》選中嘅連登仔!同特朗普齊名,網上最具影響力25個人

片/蔣麗芸要連繫外國勢力?民建聯神盾局,We-connect

片/年輕人嘅守護者葉德嫻!銀髮族遊行誓言唔做廢老

x

訂閱DailyView網路溫度計(香港版)電子報