片/網傳何君堯威脅朱凱廸?朱凱廸有生命危險已經唔係第一次

7月23號,立法會議員朱凱廸、何君堯,喺港台節目「視點31」就住「元朗白衫無差別攻擊市民」恐襲事件發表意見,朱何兩人立場唔同,舌劍唇槍,最後何君堯仲拍枱大罵,揚長而去。7月24號凌晨,佢喺FB直播,其中言論引起網民熱烈討論……

Image source:YouTube:RTHK 香港電台

文/積遜猿

7月21號晚上,香港唔單止得上環發生流血事件,連元朗呢個本應和平,無遊行示威,無警民衝突,竟然都發生咗一件大事,甚至蓋過咗對上環警察向示威者開槍嘅關注。皆因元朗出現一堆白衫人,無差別嘅用武器攻擊元朗地鐵站內外嘅市民,連《立場新聞》嘅記者都俾佢哋打到訓低,滿頭鮮血。學者沈旭暉都忍唔住話,呢件事係國際標準已經係「恐怖襲擊」喇!

發生咁大件事,網路又有影片見到何君堯同埋白衫人握手,仲講「你哋係我英雄」,似乎好有嫌疑喎。而朱凱廸就係長期關注新界鄉郊發展嘅議員,唔怪得港台會請佢哋上去就住今次議題傾傾喇。不過佢哋兩個喺節目到都無傾到咩內容,兩方互數不是,何生仲嬲到話朱生係人渣拍枱走人,認真勞氣。之後,佢父母嘅墓地都被人毀壞,寫咗粗口又噴黑油咁。

何君堯嬲到當晚凌晨喺FB直播,片中佢再次解釋點解會喺元朗同白衫人握手:「呢種莫須有、毫無根據、只係靠估,就話以言入罪、或者握手入罪,我哋香港已進入乜嘢景況?呢啲係咩人、咩議員質素?代表乜嘢後面嘅選民?」而佢亦一再重申泛民同黑衣人合作,先係真正暴力。但係呢,網民對佢呢番已經講完再講嘅言論,當然已經唔覺得新奇喇。最受網民熱烈討論嘅,喺片中最後懷疑對朱凱廸嘅死亡威脅:

佢喺直播最後對朱生講:「我義正嚴詞話你聽,前面條路一條係生路,另一條係不生路,你要選擇係邊一條路?你早啲決定。」網民聽到就話好驚,好多人都覺得「不生路」即係「死路」喇,即係何君堯公開威脅朱凱廸嘅人生安全喎。仲有網民建議朱凱廸快啲報警,唔係隨時會有白衫人搵上門。

其實朱凱廸已經唔係第一次受到生命威脅,早喺2016年嗰陣,佢高票當選香港新界西立法會議員,已經開過記者會公開宣稱自己收到死亡恐嚇。好多人都話,皆因佢「反對官商鄉黑」,搞到新界鄉事勢力唔高興。嗰陣呢,何君堯都有講過嘢,佢就話:「你知道有人販毒,你會唔會周圍同人講你知道邊個販毒?」今次嘅事件,唔知朱凱廸之後會唔會好似上次咁,開返個記招交代呢?


延伸閱讀►►►


何君堯親人墓碑被破壞!網民熱議兇手身份!

片/新民黨建議派$8000,網民回應「$4000都未收到喎」

銀髮一族又發威!婆婆踩入元朗警署,狂數警方幾十分鐘!

x

訂閱DailyView網路溫度計(香港版)電子報