片/達朝滅亡已成真?達哥用「引戰狗」形容網民嘅批評

2019-07-25

4611Views

林慧韡,人稱「達哥」,係香港網路KOL ,喺2011年開始喺網路平台JTV直播打機。後尾JTV倒閉,轉咗喺Twitch直播,成為香港最受歡迎嘅打機紅人,仲上埋電視,受FIFA邀請出席活動,好多後生仔都話成日睇達哥。

Image source:YouTube:undergroundDV截圖

文/積遜猿

達哥受後生仔歡迎到咩程度?時下好多香港後生仔流行嘅潮語,都係出自達哥,好似「喊出嚟」、「轟呀」、「完!」咁。長期有睇達哥嘅朋友,當然會知道佢仲玩嘢咁成立咗「達朝」,仲自創埋「達朝話」,有好多真兄弟都識講幾句。達哥出道以來都幾經風波,好似Back up佬事件,俾人利用佢嘅影片喺YouTube開Channel賺錢,仲反咬達哥,真兄弟當然馬上力撐喇!就算發生「你的Window不是正版」,都係俾網民笑吓,道歉完大家都係照睇。

但又點估得到,達哥竟然會有公佈「達朝滅亡已成真」影片宣言嘅一日?事源其實可以上追到今年6月9號「反送中」前,佢都無出過聲,仲喺6月6號話暫時休台。6月13號,即喺6月12號金鐘一帶警民衝突之後,出Post話「一直關注事件,希望傷者盡早康復,天佑香港!」7月5號,佢都有喺IG叫大家珍惜生命

Image source:《KEYPO大數據關鍵引擎》

根據我哋嘅《KEYPO大數據關鍵引擎》圖表可見,網路討論得達哥最多嘅日子除咗5月15號,關於佢打機選擇用咗簡體字嘅事件,其他都係同香港「反送中」間接有關嘅爭議。好似6月6號「反送中」遊行前夕休台,6月13號話關注事件,7月5號IG叫大家珍惜生命。而真正呢三個月嘅高峰,發生喺7月22號同7月24號。

7月22號,大家點諗得到,平日直播堅持唔講粗口,間中破防嘅達哥,喺FB情緒爆發,仲Cap哂網民Inbox佢批評佢嘅句子。「如果你地需要既係咁樣咩都攞出黎做show先叫有做野既kol,對唔住,我確實唔能係呀。」「問題係我亂出POST只係幫需要出黎被問責既人spin個風向去我度咋,你明唔能明啊!!!!」即時引起網民熱議,有唔少人都擔心達哥壓力太大,導致情緒崩潰。

「達朝滅亡已成真」,喺7月24號,達哥係FB同YouTube都上傳咗一條影片,主要係回應返網路上各種嘅批評。首先影片就列出咗一段文字:「始於公元2011年,達朝已經八載,風雨飄搖,氣數已盡。舊達太祖,因施懷柔政策失天下,落魄倒台。從此開始達朝最黑暗的時代,史稱緘默門事件。現時仲選擇留守嘅之達朝子民,有最後逃離的機會,否則……請接受我致以你們最由衷的感謝!」

影片當中,達哥講返自己近日Followers數目減少,感謝仲留喺度支持佢嘅Fans,形容佢哋相當善良,因為唔怕支持佢而受批評。達哥仲買咗份神秘禮物送俾一位無出樣嘅Fans,感謝佢一直以嚟嘅支持。最後達哥話希望大家留言建議有咩方法回饋大家,亦都話會抽出五位留言嘅兄弟送出禮物。雖然達哥發表嘅聲明,亦都送埋禮,但網民嘅意見似乎相當對立喎!

睇睇支持達哥嘅網友點講:

達哥,現今社會做一個正常人好難,希望你可以繼續加油,保持初心。

對於我黎講,仲可以聽到你把聲,見到你既倩影,比我知道你活得好,已經是最大的禮物了⋯⋯我愛達哥我愛達哥。

希望有朝一日再見到你開台直播,亦希望香港明天會更好。

Image source:FB:Undergrounddv 達哥

不過,達哥似乎將反對佢嘅網民,稱做「引戰狗」。一齊睇睇反對佢嘅網友又講咩:

我都由JTV時期開始睇,但呢獲野真係接受唔到。

明明可以處理得好D,結果出段咁嘅片,算喇,道不同不相為謀。

出句聲公開支持下都無,你點對得住我地!

Image source:LIHKG Post 「再會,達哥」

連登仲有個Post標題係「再會,達哥」,會員AvrilLavigneee話自己已經做咗達哥Fans好耐,仲收藏咗佢早期Card game嘅牌,但而家覺得好失望,燒埋咗張牌。「好多都係睇左你好耐嘅兄弟,係有道理架!你竟然話我地令你個台唔健康,走左都唔緊要,話我地係引戰狗」,呢句或者係唔少達哥舊Fans嘅心聲。


延伸閱讀►►►


片/612「反送中」示威者頭部中槍流血!視力受損卻投訴無門?

片/網傳何君堯威脅朱凱廸?朱凱廸有生命危險已經唔係第一次

何君堯親人墓碑被破壞!網民熱議兇手身份!

x

訂閱DailyView網路溫度計(香港版)電子報