「王先生」投訴警察「九唔搭八」唔識中文,言辭搞鬼網民狂笑

香港「反送中」逃犯條例抗爭自6月9號延續至今,好多警民衝突嘅事件,好多香港人認為警察濫用職權,態度惡劣,紛紛寫信投訴。其中呢,最受網民關注嘅投訴人就係「王先生」嘞!

Image source:FB:香港市民王先生

文/積遜猿

網民「王先生」點解會咁出名,受到網民關注?皆因佢開咗一個FB Page「香港市民王先生」,王先生聲稱自己只係一位普通嘅香港市民,以范仲淹《岳陽樓記》嘅「先天下之憂而憂,後天下之樂而樂」為座右銘,眼見今日香港咁亂,要同大家共同進退。呢個Page入面呢,主要係放咗王先生寫俾警方嘅信件,用相當正經嘅筆調,寫出黑色幽默嘅內容,次次都有好多人留意。

Image source:FB:香港市民王先生

王先生第一封寫嘅信件,喺7月9號寄俾香港警務處處長盧偉聰,內容針對7月7日有警員公然挑釁市民,話要市民『隻揪』嘅事件。王先生信中就提及:「本人雖未接受過有關隻揪的專業訓練,但從PC21304友善的眼神、整齊的衣著,充分感受到他對『隻揪』的滿腔熱誠,就是俗稱的『感受到他心中的一團火』。」王先生仲話,為咗響應康文署嘅「每日運動30分鐘」活動,決定接受該位警員嘅邀請隻揪,仲要求警務處安排日期地點,俾佢地隻揪咁話。

Image source:FB:香港市民王先生

當時王先生嘅信已經引起好多網民大讚佢有創意,係咁黑暗嘅事件之中都可以苦中作樂,諷刺警方一針見血相當有力。最有趣嘅係,警方喺7月24號回信俾「王先生/女士」,講佢之前寫信俾「警察課」投訴警察,仲話已經調查緊佢嘅投訴喎。

Image source:FB:香港市民王先生

王先生喺7月25號回咗封信俾盧偉聰,佢首先懷疑警方能力,竟然無法分清「王先生」係男性。同時,佢又話自己其實相當欣賞PC21304,話佢竟然諗到用隻揪「與民同樂,修補警民關係」,所以唔明點解警方會當咗佢寫嘅係投訴信。王先生「為了避免中文程度參差的處理警員誤解」,於是語氣一轉,用粵語寫咗一段話,仲問「請問你哋成個部門係咪無人識中文架」,好鬼搞笑。

王生先最後重申,希望警方早日安排隻揪活動,仲反問係咪可以當做係全體警員嘅隻揪邀請,可以周街「無差別」咁搵警員隻揪喎。王先生真係好幽默,我哋一齊睇睇網民點笑法喇:

「王先生串得嚟又聰明,佢次次出信都冇嘢可以抽秤到。」

「欽佩王先生之中文水平高超非常,單用文鬥已殺個對方片甲不留,好好嘢!」

「小妹對王先生的欽敬又如滔滔江水綿綿不絕!佩服得五體頭地!」


延伸閱讀►►►


片/100毛東方昇扮警察!神似造型演技點樣引起網民熱議?

點解返H&M都要戴頭盔?網民發起全民頭盔月!

片/達朝滅亡已成真?達哥用「引戰狗」形容網民嘅批評

x

訂閱DailyView網路溫度計(香港版)電子報