片/鄒凱光賣政治TEE抽水?FB片段澄清一直力撐抗爭者

2019-08-01

2059Views

香港「反送中」嘅社會運動喺六月延續到今日,有好多文化人都用佢哋嘅創作,為抗爭出一分力,好似寫詞唱歌,寫文畫圖,都受到廣大嘅網民支持、尊重。不過呢,近日鄒凱光喺7月29號公布嘅政治TEE,就受到好多人嘅批評喎!

Image source:FB:鄒凱光

文/積遜猿

鄒凱光,暱稱灘叔、鄒海灘,係香港編劇、導演同商業二台節目主持。佢喺7月29號喺FB公開發表佢設計嘅五款黑色TEE,名為「VolunTEE」,話「希望打打氣,又或者幫吓呢排要換好多件衫嘅朋友們」。哇,近日有咩人要換黑色TEE呢?莫非鄒生意有所指,講緊最近「反送中」抗爭者嘅黑衣象徵?睇真少少,件衫印有「SAVING LIVES IS NOT A CRIME」、「BE WATER STAY HERE」呢種句子,難怪網民會覺得同「反送中」有關嘅。

網民留言問鄒生,「一直支持你,但呢個時候賣口號衫,仲成$299一件,除非所有收入幫助『有需要人士』,不然就太那個了...」鄒生就回應:「不如我送俾妳,妳揀一件,有時心地好先會睇到好心地的事。」唔少網民見到都好嬲,但鄒生依然無有怕,講埋:「呢批衫我係決心賺錢,因為我都要食飯。我用我創意換人工,呢個係我三十幾年嘅搵食方法!」

另一邊廂,YouTuber大J又發功,佢話眼見有人「走出嚟發財」,就話自己都本身都有賣TEE,但就好少講。今日佢決定下次邊到好多人做運動嗰陣,就放埋衫喺就近嘅地鐵站,大家隨便取用咁話。網民見佢咁識做,當然力撐喇!「多謝大J的各方面付出和關懷,真.香港人會銘記於心的。」

而喺7月31號,鄒凱光亦都發片澄清,要同「每一位抗爭緊嘅年輕人」講幾句。佢講返因為出咗TEE而引起好多風波,自己嘅情緒都相當唔好,話自己無打算用抗爭者嘅錢嚟賣TEE。咁其中嘅盈利會唔會捐俾抗爭者呢?佢就好有趣咁單哂眼咁講,「我唔會,我齋賺錢架咋,唔會捐俾你地!」佢仲重申,希望大家明白佢有啲嘢唔可以講到咁直,叫大家相信佢。佢叫大家睇返佢以前嘅發言,就會知佢係真心嘅!

網民嘅意見似相當對立,我哋一齊嚟睇睇:

「大家明白晒!」

「呢個係人或是鬼呀?佢係人但是講鬼話?」

「算吧啦,跌落地𢲡返咋沙!而家講咩都得㗎啦!」

「早就估到啦,有時做好事吾使大鑼大鼓嘅。」

「辛苦曬,灘淑!好人唔易做!一齊加油!」

「灘叔六月份開始幾多次不眠不休心靈支援大家有眼見。」


延伸閱讀►►►


片/解放軍恐嚇港人後果自負?網民狂笑片中英文字幕嘅秘密

片/方皓玟、RubberBand七月新歌,願港人甦醒

片/毆鬥傷人,警察走人!《紐約時報》談721香港元朗黑夜

x

訂閱DailyView網路溫度計(香港版)電子報