怪錯香港一芳!網民重申「不分化」、「不割蓆」!

近日網上流傳一則由「一芳水果茶」官方微博發出嘅聲明,內容係譴責佢哋旗下嘅一間香港分店支持依家香港社會運動嘅行為,更話「堅決維護一國兩制,堅決反對暴力罷工」。引起香港網民激烈討論、更甚罷飲抗議。

image source:Facebook:一芳台灣水果茶 - 香港圖片

文/偉文

台灣知名手搖嘢飲連鎖店「一芳水果茶」,喺香港絕對可以講係「過江龍」,深受港人喜歡,你未飲過都實聽過。

image source:Facebook:一芳台灣水果茶 - 香港圖片


但喺近日香港社會運動持續進行嘅時候,社會全力關注各個示威活動嘅同時,竟然傳出要罷飲「一芳」嘅消息。

點解呢?原來係有「一芳」嘅香港分店因為響應尋日(8月5日)嘅「三罷」行為,被「一芳水果茶」官方微博發出聲明譴責。個聲明就講到要「堅決維護一國兩制,堅決反對暴力罷工」,要同依間香港分店「解約」同「關店」咁話喎。

image source:微博:一芳台灣水果茶圖片


image source:微博:一芳台灣水果茶頁面截圖


「一芳水果茶」官方微博嘅聲明一出,就即時激嬲一班市民,個個都話要罷買、罷飲,更加有市民用噴漆將其中一間「一芳」嘅招牌改成「共芳」。

「一芳-台灣水果茶」嘅招牌被改成「共芳-支那水果茶」。

image source:網路流傳圖片(取自「LIHKG」討論區用戶KS_Sona圖片)


咁嘅局面,香港「一芳水果茶」嘅Facebook page就即刻出咗個聲明,話香港嘅「一芳」係冇微博嘅,而且總代理係由香港人營運同管理,直接對台灣總公司負責。聲明更加提到香港總代理係尊重唔同加盟分店嘅個人政治立場,點出「可以包容多元意見」、「自由」、「開放」係香港人堅守嘅核心價值,亦講到盼望各界可以同佢哋一齊愛護依個「家」。

依個聲明出咗冇幾耐,其實好多網民都唔買單,話只不過係公關show,見唔對路先出嚟割蓆止血。但後尾愈嚟愈到消息提到,原來「一芳水果茶」香港總代理嘅老闆係一直都積極支持、參與為香港發聲嘅社會運動。其中唔單止係批准員工去遊行、罷工,更加有試過落手落力安慰、幫助過因為社會現況而情緒低落嘅人。

▲網民真甜筆神話一芳香港老闆用咗一個鐘頭勸慰佢情緒低落的朋友。

image source:「LIHKG」討論區用戶「真甜筆神圖片

▲網民指出一芳香港老闆好支持員工為香港發聲,仲放有遊行嘅員工一日假。

image source:網路流傳圖片(截取自「LIHKG」討論區用戶「哈哈俠圖片)


仲有自稱係員工嘅網民開post力撐,話「請大家善用起底功能起我底同我老闆底」,證明老闆係「極深黃」,要還返佢一個清白,更加反問返網民「點解要信用簡體字出聲明既人」。亦有另一位員工仲提到「一芳」嘅香港總代理,係俾大陸總代理同台灣品牌持有方「過一棟」同「被發聲」。

一位自稱係一芳香港總部嘅員工開post為老闆辯解。

image source:Facebook截圖

▲另一位自稱係一芳香港總部嘅員工,亦都有為老闆解釋。

image source:網路流傳圖片(截取自「LIHKG」討論區用戶「淆底後勤員」圖片)


睇到咁多資料,又咁多人行出嚟證明,唔少網民都表示好內疚怪錯好人;又話依家社會運動去到依個地步,咩事都好複雜,好多人都愈嚟愈唔清醒,發誓話下次一定係會fact check咗先。

最後,有網民再次呼籲運動參與者、示威者要揸緊返個宗旨,係:「不分化」、「不割蓆」,記得「唔好輕易傷害到任何一位同路人」。


延伸閱讀►►►


女警一夜之間多粒花,網民話:「升咁快,打機咩?」

片/警員強行抬走少女導致走光,市民怒斥「蝦女仔」!

香港三罷!機場員工集體病假2百航班取消 林鄭轟:推港上不歸路

x

訂閱DailyView網路溫度計(香港版)電子報