片/【鐳射筆之晚】年輕人展露笑容,網民話睇到好心酸!

香港「反送中」運動持續咗2個幾月,社會長時間處於緊張嘅狀態,市民生活氛圍壓抑,但尋晚(8月7日)就有一場有別於以往緊張氣氛嘅示威行動。為咗聲援因為買「觀星筆」而被被捕嘅浸大學生會會長方仲賢,市民喺尖沙咀太空館外,舉行咗「全民觀星」行動,當時現場歡聲笑語,示威人士放晒歌、跳埋舞,個個都玩得好開心。但咁開心嘅場面,竟然令到一眾網民泛起心酸。

image source:Facebook:高登討論區 HKGolden影片截圖

文/偉文

喺7月6日晚,香港浸會大學學生會會長方仲賢就俾4名休班警員截查,搜出10支鐳射筆。其後警員就以「涉嫌藏有攻擊性武器」即場拘捕方仲賢,引起當時周圍街坊、市民嘩然,並自發將警員圍住,紛紛指責警方行為不合理。

▲方仲賢因10支鐳射筆被警員以「涉嫌藏有攻擊性武器」拘捕,現場市民指責警員濫權(請注意,內有大量粗口。)


大批市民認為警方拘捕方仲賢的行為無理、不當,所以喺6號當晚就自發到深水埗警署要求警方交待事件,但其後警方突然施放催淚彈同埋派遣防暴警察清場。

▲警方突然施放催淚彈清場。(請注意,內有大量粗口。)


8月6日晚嘅聲援行動最終演變為警方武力清場,而喺尋日(8月7日)同樣係為咗聲援方仲賢嘅另一場行則係相當歡樂。一大批民眾手持「觀星筆」喺尖沙咀太空館外,舉行「全民觀星」嘅活動聲援方仲賢,並嘲諷警察稱「觀星筆」係「鐳射槍」同「攻擊性武器」。

▲市民持「觀星筆」到尖沙咀太空館「全民觀星」,期間載歌載舞,笑聲不斷。


▲市民以警方驅散示威者嘅語句驅散「小強」。


睇到依個快樂嘅場面,見到年輕人又唱又跳,好天真,好開心;無口罩、眼淚、尖叫、槍聲……個個都笑得好大聲,有網民就話好心酸。話成班後生仔女食足兩個月催淚彈,習慣咗流血流汗流眼淚,一時間成長到社會唔記得咗佢哋只不過係年輕人,係一班應該享受青春嘅少年。


又有網民講自己十幾歲嗰時放暑假就飲飲食食同埋玩,日日都打機、升lv、買裝備;而依家社會上嘅年輕人,放暑假係出嚟食催淚彈,日日都成身裝備出嚟示威。比較起上嚟,真係一個天一個地,好佩服出嚟勇敢發聲嘅年輕人,喺理應天真無邪嘅年紀面對好似戰場嘅混亂。當尋日見到佢哋好純真、可愛咁亂玩、大叫,先發覺佢依個壯年人係企喺一班後生後面,要班小朋友保護返轉頭。


就好似好多網民都講:「多謝香港嘅年輕人,多謝你哋無私咁為香港付出咗自己僅有嘅一切。


延伸閱讀►►►


一芳香港總代理蒲頭出聲明 有人話要飲到佢上市為止?

片/「街坊」係社運嘅新角色?點解冇gear都可以咁「勇武」?

片/網民指責示威者打人毀車,但原來事實係司機想撞人在先?


x

訂閱DailyView網路溫度計(香港版)電子報