由於香港政府並未有正面回應示威者嘅五大訴求，所以「反送中」運動持續進行咗兩個月多D，示威行動、警民衝突不斷，流血場面幾乎日日都出現。而喺尋日（8月12日），就發生咗一宗女子眼部中槍事件，引起全城震怒，好多市民更揚言要警察「還眼」。
片／眼部中槍女子傳失明，全城震怒入機場！
image source:編輯自網路流傳圖片（取自「LIHKG」討論區）
文／偉文
繼7月21日元朗白衫人無差別打人事件後，香港人又再一次全城憤怒。事源係有一名女子懷疑眼部中彈，疑似係俾警方嘅布袋彈「爆眼」，血流不止。
▲懷疑眼部中彈女子倒地。（請注意，內有令人不安畫面。）
▲受傷女子受現場救護人員即時急救。
好多網民由各大媒體嘅直播入邊睇到依一幕，即刻引起熱論，大批市民極為憤怒，更聲稱要警方「還眼」。同時有大量相關文宣被廣泛流傳，網民發起今日（8月12日）一點要到機場，進行「全民入機場」嘅「百萬人塞爆機場」行動。
▲其中一幅被廣為流傳嘅文宣。
▼▲網民揚言要「警察還眼」，並呼籲市民入機場嘅文宣。
而喺今日，有一位疑似係受傷女子嘅妹妹喺「LIHKG」討論區到開post，就話有D嘢要同大家講。佢話：「首先想多謝大家關心，希望你地將呢份憤怒，帶去今日和你飛要做既事身上 塞爆香城機場」，想呼籲大家去機場參與示威、發聲。
依位網民都講咗受傷者嘅傷勢心情況：
我家姐右眼全紫腫到雞蛋咁大
右眼眼頭至眼袋位有好長既傷口爛哂
剛剛深夜縫左針
根據醫生所講，傷勢嚴重，中彈附近既骨(鼻骨、眉骨暫時知既係咁多）都碎哂
做左緊急手術扶骨勉強扶到因為多碎骨都有困難
毀容就一定
跟住就暫時連我都未知情況如何
佢亦都講到事發經過：
當時佢係尖沙咀警署外
係巴士站觀察緊狗既行動無衝擊無做任何攻擊性動作
佢同我講只係伸個頭係巴士站廣告版之間既空隙望出去
就有個防暴定唔知速龍係近距離
只有8-10米既距離下
開左槍中左眼
隨即倒地流左好多血口鼻都滲血
依位受傷女仔喺網民嘅形容中，「係個好善良既人」、「只係一個愛香港既女仔」，佢企出嚟示威、發聲係因為「想保護自己屋企」、「維護人性人權」同埋「為自由而戰」。
佢最後又再次呼籲市民去機場示威，話：
你今天可以為這個為自由而戰的女生走出來嗎？
你今天可以為這個家走出來嗎？
依個備受關注嘅問題，好多記者都喺警方記者會上不斷提出嚟，警方代表就有承認警方當時係有放過布袋彈，不過基於現場有好多人使用其他武器，就話唔知、唔可以證實係咪真係布袋彈打。
但有記者就講話佢親眼睇到受傷女子嘅眼罩係留有布袋彈，但警方代表都係話未夠資料，要再查吓，不過就好歡迎記者們提供資料咁話。
咁利君雅就追問，喺唔知道係咪布袋彈導致他人眼部嚴重受傷嘅情況下，會唔會有警員「停職後查」，以協助、幫助調查；又有記者追問：「會唔會係喬裝嘅警員去做」。
而警方就未有正面回答利君雅嘅問題，而「會唔會係喬裝嘅警員去做」依個問題，警方就只係講話係警員跟指令就唔會咁做喎。
image source:Facebook:香港警察 Hong Kong Police直播截圖
就依個問題，睇直播嘅網民就表示好唔滿意警方答覆，答到唔清唔楚，疑似係同處理「721元朗白衫人恐襲」嘅手法一樣：「起勢拖」。
大家又點睇呢？
延伸閱讀►►►