片/香港人不反中國人?網民向大陸律師陳秋實致敬!

2019-08-21

5148Views

高登、連登網上討論區,一直都流傳一句話「逢中必反」,即係話只係同中國有關,唔理好壞,都一律要盲目反對。呢四個字,甚至成日俾親中人士引用,呼籲大家唔好咩都反對,要理性客觀咁睇返件事。喺自6月起至今嘅「反送中」社會運動入面,都有人批評話抗爭者「逢中必反」,但就喺8月20號晚,香港網民打破咗呢個定律,對大陸律師陳秋實致敬。

Image source:FB/林鄭媽媽後援會截圖

文/積遜猿

8月20號晚,香港網路流傳咗一段大陸律師陳秋實嘅自拍影片,網民反應相當熱烈。影片約五分鐘,背景係陳秋實喺香港機場,主要內容係講佢由8月17號就嚟到香港,親身參與呢個重要嘅歷史時刻,但因為大陸嘅公安局、司法局同律師事務所都打畀佢,同佢講:「秋實你別在這麼敏感的地方呆著,你再不回來誰都保不了你。」佢唯有提早返中國,以免連累埋其他人。點解佢會咁受大陸機關以至香港網民嘅關注呢?我哋不妨由佢喺香港第一段版講起。

查返資料,陳秋實係大陸律師,亦係網紅,2014年參加大陸節目《我是演說家》攞咗亞軍,口才了得,官方微博為〈微博陳秋實和他的朋友們〉 。喺「陳秋實律師香港見聞」首支影片,佢自言自己會嚟香港,係因為香港好亂,同佢之前去江西水災現場見證一樣,佢去親身了解呢件事。陳秋實話:「做律師是我的職業,去新聞現場採訪是我的興趣。……香港正經歷歷史性的變革,我希望親身來見證這件事。」陳秋實話要留到8月23號先返去中國。

「我不想等老了的時候,孩子問我香港在2019年的夏天發生些什麼,我啥也不答上來,或只會跟著媒體喊一堆口號,或只會跟著網路去宣泄我們的情緒。」正因為咁,陳秋實決定唔持有各種立場,反中親中都會聽,真正咁喺現場持平、客觀咁反映真相。由佢喺8月17號早上至8月20號晚,陳秋實一共喺YouTube上傳咗九條「陳秋實律師香港見聞」嘅影片,大約內容都係佢喺香港參加藍黃集會嘅所見所聞,其中嘅報導並無強烈嘅主觀意見,只係講返客觀嘅情況。

陳秋實對香港嘅抗爭運動相當有了解,佢曾經就喺其中一條影片入面,為大家講解三個香港嘅關鍵詞:「和理非」、「勇武」同「不割席」。佢話有兩百多萬人參加嘅社會運動,有唔同嘅政治光譜,其中九成都係「和平、理性、非暴力」,而「勇武」則認為已經抗爭咗咁耐,要直接衝出去抗爭。而「不割席」係「和理非」理解社會運動唔可以割裂,要「兄弟爬山,各自努力」,先可以成功。

喺8月20號晚,陳秋實打破咗原定計劃,提早返去中國。喺呢段最多香港網民睇佢嘅影片,陳秋實再次重申,講普通話嘅媒體喺香港歷史性嘅時刻唔應該缺席。佢又講到,佢對自己嘅採訪唔滿意,因為連林鄭月娥都無見到,而時間匆忙,好多議題好似地產霸權咁,都搞唔到。陳秋實話自己對唔住香港同胞,大陸同胞,做唔好今次嘅報道。佢又提到,有人話香港抗爭集會係有用錢請,但呢幾日又曬又落雨,「你花多少錢能請一百多萬人跟你一起來受遭這個罪?」

陳秋實亦都指出,香港問題係法律問題,「到底逃犯條例是否通過,警察執法是否合符規範,立委選舉是否通過合理的程序,基本法以至中英聯合聲明是否得到貫徹的實施?」以上種種都係法律問題,正因為咁,佢先更加要嚟香港了解。「這個世界有人精明躲在後面,照顧好自己的家人和兒子,就得有人虎沖沖的衝在前面,並且承擔後果,我自己選這條路,我願意一個人承認問題。」呢段影片嘅自白,好多香港網民都致敬,甚至傷心咁認為係陳秋實嘅「遺言」。

一齊睇睇有人話「逢中必反」嘅連登網民點講喇:

「佢係有思想嘅人,點知唔知中共會點對付呢啲人?來自中國嘅支持,有心同匿名就夠,唔想有人送頭。」

「佢呢D就真係愛國青年,肯了解,肯放低自己的立場去聽人講。」

「好耐冇咁respect過一個中國人!」

「如果中國人個個都係咁,我自認係中國人。」

「佢比起好多香港人了解香港,又比起好多大陸人唔了解大陸。」

「respect,時代革命就是不論身份國藉,年齡,有共同思想理念就是同路人。」


延伸閱讀►►►


片/水炮車定「漏水炮車」?市民車輛同香港街道被強制「變藍」?

片/疑似軍裝警察凌辱長者?閉路電視影到晒又打又除褲!

片/到到都有「臥底」?中港各有暗號分辨「自己人」?

x

訂閱DailyView網路溫度計(香港版)電子報