香港「反送中」運動備受國際關注，世界各地有好多人都關心依兩個幾月嚟，喺香港發生緊嘅示威行動。唔少外國人除咗留意吓之外，仲作出好多實質表態嘅行為，其中韓國明星金義聖所做嘅表態行為，唔單止引起網民廣泛討論，更加令到香港網民發起行動呼應。
呼應金義聖，網民發起Eye4HK，821 8pm齊齊up相！
Image source:網民「我愛您3000」（取自「LIHKG」討論區）
文／偉文
香港「反送中」示威行動已經持續咗兩個幾月，世界各地都有唔少人係keep住關注事態發展，仲有一D有影響力嘅公眾人物表咗態。
其中因為《屍殺列車》而廣被香港人認識嘅韓國明星金義聖，就不停咁喺instagram到出post支持香港，仲因為咁而招來一D中國網民嘅惡意留言。
但金義聖就冇俾嗰D中國網民嘅惡意留言嚇親，仲喺8月18日，香港逾170萬出嚟「流水式集會」之後，金義聖又喺instagram到開post撐香港，仲自拍咗張用手遮右眼嘅相。
金義聖有用韓文解釋到依個遮右眼嘅動作背後意義，係為咗安撫嗰位懷疑被警察布袋彈打傷右眼嘅女仔，並支持香港市民爭取自由同民主咁話。
金義聖依個舉動感動唔少香港人，個個都話好多謝佢咁關心香港件事。又因為咁，連登仔發起咗一個呼應金義聖嘅活動，名為「Eye For Hong Kong Campaign」。
活動內容係：喺今日晚上八點正（21-8-2019 20:00 ）用手掩右眼自拍，加上「#Eye4HK」、「#EyeforHK」、「#NoPoliceBrutality」、「#FreeFromFear」同「#DemocracyForHK」依幾個hashtag，然後上載到各個社交媒體，並tag至少3個香港朋友同埋2個海外朋友。
唔知大家會唔會喺821 8pm，齊齊upload靚自拍呢？
延伸閱讀►►►
片／水炮車定「漏水炮車」？市民車輛同香港街道被強制「變藍」？