片/網路瘋傳兩張圖兩條片,一次睇晒尋日香港人關心啲乜!

尋日(8月25日)係香港「反送中」運動第12個星期日,喺香港街頭再次上演警民衝突,期間更有警員以拎出配槍對空發射示警。一日之間發生咁多事,唔同嘅資訊周圍傳,而其中,最廣受人討論嘅就有兩張圖同兩段影片。

Image source:「LIHKG」討論區同戶「對人生過敏圖片

文/偉文

上星期日(8月18日)由民陣發起嘅維園「流水式集會」,170萬個香港市民再次以「和理非」方式上街要求政府回應「五大訴求」,但未能獲得官方正面答覆,示威行動持續進行。尋日(8月25日),喺民間發起嘅荃葵青遊行入面,示威者嘅「勇武派」再次上場,警民多次衝突,期間更有警察舉起配槍瞄準示威者、市民以及記者,之後有向天鳴槍示警。

尋日示威現場發生咁多事,喺網路上就有唔同資訊被廣泛傳播,其中就有兩幅圖片同埋兩段影響最為熱門。其中一張圖就係由蘋果記者所拍攝,係影住一個示威者俾警員箍住條頸,而背後係有一大班示威者向後方跑走。


「LIHKG」討論區就有網民引用依幅圖,開咗個叫〈一張圖解釋哂點解我地會輸〉嘅post,以下面嘅留言好一致咁講:

「救人啦」
「冇人幫拖」

「唉,冇人返轉頭幫」

「戰又不戰退又不退」

「睇住佢地一見佢比人捉成幾百人狂走  佢之前係拎住條鐵打緊」

網民普遍認為唔好責怪佢哋,不過一定要反省吓,認為前線示威者要團結、識救人,唔好再留低任何一個「手足」,如果驚嘅就企後D咁話喎。

而另一張被廣為流傳嘅圖片,好多人睇完都話好震撼,好心痛。圖片影住一個警員手持配槍指向前方,就有一個身穿背心短褲嘅男子,張開雙只係拎住一把遮嘅雙手,擋喺槍口前面。


網民喺「LIHKG」討論區開咗個post,話「呢張相嘅震撼程度將會成為重要嘅歷史」,底下連登仔紛紛留言話「英勇」、「respect」,佢哋仲話:

「其實當時uncle係咪想保護其他人而跳出黎用身擋?
回想返都真係眼濕濕
英雄先有咁既勇氣」

「你見佢真係比枝槍指住都可以咁樣企係面前
我只能夠講好佩服佢既勇氣」

有網民後尾話依位男子係一位「教會傳道人」,咁到底係咩令佢置生死於度外呢?係良知?定係信仰呢?

除咗以上兩張相之外,仲有兩段影片都喺網上快速流傳,其中有一段片俾網民話形容話係「六秒令你滿眼淚水」嘅片。




畫面中有三個示威者,分別係戴咗用黑、白同黃色頭盔。6秒嘅影片入面,白色拎住一支木棍,前後分別試扑左黑色同自己個頭盔,扑一扑,望一望;另外黃色頭盔嗰個,見到有人拍片,就面向鏡頭做咗個「V」字手勢。 

好多網民都話自己睇咗唔止一次,重播重播又重播,愈睇愈心痛。佢哋留言話:

「一開始真係覺得好可愛然後就想喊」

「你地班傻瓜,過黎比姐姐攬下」

「睇左  香港人真係好可愛  但心又痛」

「他們只是個孩子  用落呢到真係笑唔出」

「真係會眼濕濕唔係講笑」

好多示威者都只不過係十幾廿歲,本應該去玩去旅行嘅暑假,佢哋企咗出嚟捍衛佢哋覺得重要嘅嘢。好多市民都有講,有大好前程嘅後生仔,整整一代人,點解咁都可以俾人話係「廢青」,真係好心痛。


而另一條片就長少少,唔係催淚彈,但同樣催淚。


影片內容係沙田新城市廣場入面嘅市民,為前線示威者歸來而歡呼。見到示威者一路行,現場就市民不斷鼓掌、歡呼,更加有人向佢哋躬鞠躬。其後廣場入面嘅人就叫起口號:「光復香港,時代革命」。網民話睇到段片好感動,市民嘅行為好代表到民意喺邊,示威者就好似為香港奮戰後,凱旋而歸嘅戰士。 

網上瘋傳嘅兩張圖,兩段片,邊個最打動你心呢?
香港,加油!


延伸閱讀►►►


反送中爆紅十大記者!立場姐姐居然只係得第三名?

片/當大J和達哥相遇?網民熱議大J最新影片無視達哥

事必有因:以大數據看「反送中」示威者訴求變化




x

訂閱DailyView網路溫度計(香港版)電子報