片/爆眼少女首次現身聲明!高言譴責香港警察蓄意謀殺

香港自6月「反送中」逃犯條例修訂引起社會運動,至今依然未見止息,而各種警民衝突、流血事件,可謂數之不盡。喺8月11號晚,就發生咗一宗女子眼部中槍事件,引起全城震怒,好多市民更揚言要警察「還眼」。「警察還眼」嘅口號,成為8月社運嘅重要事件,仲引起埋韓國明星金義聖喺instagram到開post撐香港,仲自拍咗張用手遮右眼嘅相,觸發網民仿傚,發起eye4hk活動。

Image source:FB/Fighting against China’s Creeping Authoritarianism

文/積遜猿

8月29號,民間記者會播出喺8月11號晚,遭警察發射布袋彈擊中右眼失明爆眼少女嘅聲明。呢次聲明片段,亦都係爆眼少女自中槍送院後首先公開露面說明狀況,令好多擔心佢嘅香港網友見到佢平安,都尚叫鬆咗一口氣。爆眼少女講到目前身體狀況只容許佢拍片發聲,同時亦都感謝香港醫護人員,同埋其他支持佢嘅香港示威者,係佢心目中嘅英雄,寄語香港人好好加油。

片中最主要嘅內容,係爆眼少女譴責香港警隊意圖謀殺、殘害香港人,愧對港人,「我以一位受害人嘅名義,對香港政府以及香港警隊予以最強烈嘅譴責」,叫警隊即時停止暴力行為,要嚴正執法,唔好俾元朗事件再出現,強調必須成立獨立委員會,挽救港人對警隊嘅信心。最後,爆眼少女仲引用古埃及神話,話古埃及神話人物荷魯斯嘅右眼有遠離痛苦、戰勝邪惡嘅力量,佢希望佢嘅右眼一樣畀到香港人呢種力量。


延伸閱讀►►►


片/眼部中槍女子傳失明,全城震怒入機場!

呼應金義聖,網民發起Eye4HK,821 8pm齊齊up相!

宣明會核爆級公關災難?網民話要用呢樣嘢代替捐款

x

訂閱DailyView網路溫度計(香港版)電子報