片/831警方發出反對通知書!大J 決定舉辦七周年觀衆見面會

2019-08-30

3363Views

自6月起至今,香港因為逃犯修訂條例激起民眾「無大台」、「去中心化」嘅「反送中」社會運動。呢場社運,隨住警民衝突增多,無數流血事件出現,示威者高叫「五大訴求」,「和理非」遊行同「勇武」抗爭都做過哂,但政府喺8月28號高言唔會答應民間訴求,令更多人不滿。民間人權陣線組織申請8月31號遊行,警方發出反對通知書,照去就隨時違法俾人捉。呢個時候,「社運型Youtuber」大J喺FB出咗個Post……

Image source:IG/hunggy9527

文/積遜猿

民間人權陣線召集人岑子杰,喺8月29號接獲警方就早前申請8月31號嘅遊行,發表咗反對通知書。岑子杰對向外表示,話見唔到警方嘅反對通知書有咩合理理由,僅係列咗一堆之前遊行發生嘅衝突。佢喺8月30號接受香港電台訪問,形容民陣搞遊行收到反對通知書,係前所未有嘅事。民陣嘅上訴都失敗咗,佢表示為保市民安全,唯有取消遊行,擇日申請再戰。

不過,雖然岑子杰話取消遊行,但喺「反送中」社會運動嘅示威遊行,早就唔係第一次收到反對通知書。好似早前7月27號「光復元朗」咁,警方向申請人鍾建平發出書面通知,禁止7月27號嘅遊行,鍾生就話仍然會一個人喺元朗行街。7月27號,香港人依然冇有怕,照去光復元朗。當時,何韻詩仲講會喺當日嘅元朗搞流動簽名會,令一眾香港市民都多咗個理由出去元朗玩。

香港知名拍片Youtuber大J ,一向主力拍打機、淘寶開箱嘅影片,係香港第一個突破50萬訂閱數嘅YouTuber,至今訂閱數已經達70萬以上。但自從香港「反送中」社運開始,佢拍咗多條影片支持運動,已經正式轉型咗做「社運型Youtuber」,極受香港網民歡迎。大J 見到8月31號嘅遊行示威,決定同何韻詩727嘅做法一樣,話要喺8月31號喺港島區各處出沒,搞七周年嘅「觀衆見面會」喎。大J 最後強調:「聽日,8.31!港島見!」仲Tag埋「#不見不散 #無不反對通知書」,真係別有深意。


大J成日拍片撐香港社運,佢咁識做,底下嘅香港網民當然一致性咁支持佢喇!我哋一齊睇睇網民點講:

「81萬7千個觀衆,大J 咁謙虛估1成...,計我話聽日fans應該有15成,百零萬走唔甩。」

「大J我細細個就睇咖,我聽日一定要見到佢。」

「有良知嘅小朋友,係時間出黎搵大j哥哥啦。」


延伸閱讀►


831前大搜捕多人?陳浩天、黃之鋒、周庭同鄭松泰等先後被捉

片/當大J和達哥相遇?網民熱議大J最新影片無視達哥

片/香港社運型YouTuber!大 J 轉型想參選區議員

x

訂閱DailyView網路溫度計(香港版)電子報