香港「反送中」運動進行至今，警察武力使用嘅情況備受關注，社會上對警方執法方式存有質疑嘅聲音，有市民認為警員執法期間有濫用武力同濫捕嘅情況，危害、侵害到市民應有嘅權力。而喺尋日（9月2日），有一個白衫少年疑似因為問警員「良心去咗邊」，而被防暴警員扑到頭破血流後被捕，引起網民激烈討論。
片／白衫少年問警良心去向反被扑頭，流晒血堅持理論使網民佩服！
Image source:網路流傳圖片（取自「LIHKG」討論區用戶「人體小百科」）
文／偉文
香港「反送中」運動進行咗差唔多3個月，警民衝突不斷，社會上有唔少聲音質疑警員執法時，係使用咗過分嘅武力，而且有唔少「濫暴」同「濫捕」嘅情況出現，認為警方咁對市民係「冇良心」嘅表現。
而喺尋日（9月2日），藉蘋果日報嘅直播片段睇到，有一個白衫少年因為問警員「良心去咗邊」，而被一班防暴警察捉捕，並打到頭破血流。
▲影片1:46:10 – 1:59:15，白衫少年因為問警員「良心去咗邊」而被捕過程。
由影片可見，少年著住白衫短褲，身上冇口罩、gear，只有一個書包。喺佢問警員「你哋良心去咗邊」之後，數名防暴警員就突然衝上去，嚇到白衫少年跑走，其後少年被追及後扑到頭破血流。白衫少年被警員控制之後，講話自己只係補完習行過，隔住條馬路向警察問句「良心去咗邊」，就俾人扑到流晒血，對遭受到咁嘅對待相當不滿。
白衫少年只係補完習嘅市民，經過搜查後亦唔見有同示威相關嘅物品，亦冇著黑衫，只不過講咗句「良心去咗邊」就被警方扑到頭破血流，更以「公眾地方行為不檢」為由拘捕。網民見到咁嘅情況發生，好多人都喺網上咒罵警察，仲要「煲大件事」；同時又大讚白衫少年好勇敢，流晒血都可以咁理智咁同警察理論，仲有理有據，話同扑佢嘅警察比較，高下立見咁話。
▲網民為白衫少年而製作嘅圖片。
image source:取自「LIHKG」討論區用戶「撤銷義士控罪」
到底警察有冇「濫暴」、「濫捕」，市民心入面都會有佢自己嘅答案，你又點睇呢？
延伸閱讀►►►