片/林鄭開金口講「撤回」,網民回應話「四餸一湯,缺一不可」

香港「反送中」運動由《逃犯條例》修訂草案所引起,經過將近三個月嘅示威行動,今日特首林鄭月娥將於講出「撤回」修例。但正當消息傳出,網民普遍表示唔收貨,認為事情發展到依家咁,絕對唔係「撤回」咁簡單,應該係「五大訴求,缺一不可」。點解唔收貨呢?有連登仔就用咗一個好生鬼嘅比喻解釋,形容「反送中」就似係「叫餸食飯」,係「四餸一湯,缺一不可」。

Image source:Facebook:Stand News 立場新聞影片截圖

文/偉文

香港「反送中」運動係因為《逃犯條例》修訂草案而引起,喺6月9日,103萬香港市民應香港民間陣線(俗稱民陣)號召,上街表達反對《逃犯條例》嘅修訂,認為政府應撤回條例修訂草案。但當時政府並未有答應市民訴求,更表示立法會會喺6月12日恢復修訂草案嘅二讀審議,令到唔少市民嬲到喺6月12日選擇圍堵立法會去阻止二讀,期間爆發警民衝突。 

喺6月12日開始,香港「反送中」嘅事態持續升溫,示威者因為政府嘅唔回應,以及警察武力嘅驅趕、拘捕行動,不斷升級示威行動,同時亦令到愈嚟愈多社會問題浮現。喺依個情況底下,示威者嘅訴求,由一開始嘅「撤回逃犯條例修訂」,發展到「五大訴求」,亦即「撤回條例」、「收回暴動定性」、「釋放被捕示威者及撤回控罪」、「實行雙普選」以及「成立獨立調查委員會」。

喺示威者不斷以唔同方式表達訴求嘅時候,特首林鄭月娥曾經喺6月15日向公眾講及「暫緩」《逃犯條例》修訂草案嘅工作;又喺7月9日講話條例已經「壽終正寢」,但一直都拒絕用「撤回」字眼。直到今日(9月4日),特首林鄭月娥終於肯講「撤回」,以下係佢發表嘅講話片段:


歷經近三個月嘅「反送中」運動,終於喺特首口中聽到:「特區政府會正式撤回條例草案」,雖然無接受,但都有正面回應到示威者嘅「五大訴求」,但係市民、示威者竟然普遍「唔接受」,仲話「一步都唔會退」,話「五大訴求,缺一不可」,係唔會有退讓空間。點解咁堅持呢?「LIHKG」討論區用戶「麥美娟X老母」就開咗個post用「叫餸食飯」嚟比喻:

話說今日我本身落曬訂book左圍枱食飯

講到明
四餸一湯一點都不能小
點知個林經理一個餸都唔比我地食
仲叫曬佢d員工打我地
推入廁所打又有 
㩒係地下打又有
冇啦啦去地鐵站打埋隔離枱班人又有
仲逼到我d朋友去跳樓自殺

咁我地一定唔會妥協啦
喂講到明四餸一湯 
X街你賺完我d錢 
又唔比翻我應得嘅野我

咁我地一定反抗啦
就黎成間酒樓反轉佢
仲叫左隔離酒樓個經理黎幫手

到頭先好似開始識驚
林經理終於放d風話比翻個湯我地飲
四餸一湯喎做乜撚野得翻個湯?
個湯仲要攤到凍哂 

最好笑係我d朋友話
算啦都爭取到個湯翻黎坐低食飯啦

拿咁大家話喇
應該要爭取翻本身個四餸一湯
定要翻個湯就算?


其他網民見到依個比喻,都紛紛留言話「四餸一湯,缺一不可」。一個凍嘅湯,大家又飲唔飲呢?


延伸閱讀►►►


片/點解咁多馬來西亞人鬧「反送中」示威者?等黃明志話你聽啦!

片/白衫少年問警良心去向反被扑頭,流晒血堅持理論使網民佩服!

片/831警方發出反對通知書!大J 決定舉辦七周年觀衆見面會


x

訂閱DailyView網路溫度計(香港版)電子報