片/熊仔頭係最正Youtuber?網民話:當大J哥哥無到?

喺香港「反送中」運動入面,好多YouTuber都因為工作機會、形象、唔想得失粉絲等嘅問題,選擇唔發聲,唔表態,沉默咗3個月;當然,亦都有一班放棄「錢途」,堅持發聲嘅YouTuber嘅,大J哥哥就係一個好例子喇。但喺尋日(9月9日),有一個知名嘅YouTuber出咗條片,有連登仔睇完就話要宣布佢世上最好Youtuber,仲「沒有之一」。喂!當大J哥哥無到啊?

image source:YouTube:FHproduction影片截圖

文/偉文

香港好多YouTuber嘅觀眾都係年輕人,但當好多年輕人積極參與「反送中」運動嘅時候,就唔係好多YouTuber企喺佢哋嗰邊,而係選擇唔表態。有人就話佢哋沉默係為咗保住飯碗,唔好怪佢哋,又有人話佢哋有合約在身,身不由己。


有網民話見到佢哋咁,就諗到子華神有句金句:「搵食啫,犯法啊?我想㗎?」以前聽已經好諷刺,依三個月聽就更為令人反省。有啲人真係覺得「搵食」係凌駕好多嘢,「返工」同「賺錢」對於好多香港人嚟講,係重要過「反送中」嘅訴求、社會存在嘅問題。不過好彩,都有一班人係寧願賺少啲錢而選擇勇於發聲,「熊仔頭」就係其中一個。

「熊仔頭」係香港出名嘅YouTuber,平時出開啲搞笑片,扮吓周星馳、張家輝咁,用幽默嘅方式去講吓大家日常生活都會遇到嘅問題。佢同埋「近南哥」、「藍仔頭」,仲有一班「熊女郎」,一班人拍咗好多引起網民共嗚嘅片,好似「男人有話兒」系列咁,講出網民成日都會遇到兩性關係嘅問題,又將佢自己相信嘅道理分享俾觀眾。
「熊仔頭」出產嘅依一種「共鳴」,喺依三個月香港嘅不安、動盪下,依舊存在。「熊仔頭」喺尋日(9月10),就上傳咗段片,好多網民話睇到又笑又喊。


《愛怪責的香港人》一上,「LIHKG」討論區就有一陣嘅討論,網民「大嶼山神秘力量」就話要「宣布熊仔頭係世上最好Youtuber」,仲「沒有之一」。點解呢?無他,影片好明顯講緊依家香港年輕人遭遇嘅處境,堅持理念又未必獲得家人嘅支持,俾人打到流晒血都仲要俾親近嘅人指罵、責怪,再次引起觀眾共嗚。

好多網民都話,「熊仔頭」依段片最尾嘅一句對白:「媽咪,我好痛……」係引爆淚點嘅位,三個月嚟嘅委屈,真係喊出嚟。個個都留言話好多謝「熊仔頭」,喺風頭火勢都依然企喺年輕人依邊,堅持講出年輕人嘅心聲,係「世上最好Youtuber」。

 

雖然好多網民都認同「熊仔頭」嘅好,不過真係唔好當大J哥哥冇到先得㗎!網民個個都話大J哥哥都係由一開始就開始撐住,可以話係喺「反送中」入面企喺最前嘅YouTuber。除咗佢哋2個,仲有Rock哥、伍分子、bob叔、薑檸樂、Sunny、Creamy……。


香港,加油!
香港人,加油!


延伸閱讀►►►


片/831警方發出反對通知書!大J 決定舉辦七周年觀衆見面會

「究竟今年應該買咩月餅好?」被推上神檯嘅四喜餅家

片/當大J和達哥相遇?網民熱議大J最新影片無視達哥


x

訂閱DailyView網路溫度計(香港版)電子報