有網民為「反送中」運動作咗首歌，叫做《願榮光歸香港》，希望可以為香港人打打氣。首歌喺短短半個月間傳播全港，尋日（9月11日）更加有好多市民係唔同地方合唱，令到好多網民都話好感動，忍唔住喊。
片／《願榮光歸香港》響遍全城，合唱之聲聽喊唔少香港人
Image source:YouTube:dgx dgx影片截圖
文／偉文
香港「反送中」運動進行咗三個月，多場嘅示威行動過後，市民希望政府回應嘅「五大訴求」依然缺四。但「五大訴求」係「缺一不可」，市民示威嘅行程不斷更新，有唔少人話會「堅持，堅持，再堅持」，直到政府答應晒「五大訴求」。
三個月無間斷嘅示威，香港市民日日都接受大量不同嘅時事訊息，肉體同精神都相當疲累。喺依個時候，「LIHKG」討論區嘅用戶「Dgx69210」喺8月25日就作咗首叫做《願榮光歸香港》嘅歌，為香港人打打氣。後來，加埋其他連登巴絲嘅力量，潤飾咗歌詞、錄合唱、仲整埋MV。
主創作者「Dgx69210」表示，《願榮光歸香港》係用典寄意，「榮光」即「榮譽」、「光彩」，願祈榮光歸於香港。一齊嚟睇吓首歌嘅歌詞：
Image source:網路流傳圖片（取自「LIHKG」討論區）
《願榮光歸香港》好切合好多香港市民嘅心聲，引起好多示威者嘅共嗚，所以短短半個月間，就傳遍香港各區。喺尋日（9月10日），更加係有好多市民喺唔同地方，不約而同咁進行大合唱。
網上流傳好多錄有市民合唱嘅片段，好多網民都話，聽到香港人咁齊心、團結咁唱依首歌，感動到忍唔住眼淚。一齊嚟睇吓唔同地方嘅大合唱，挑戰吓忍住唔喊！
其實香港人追求嘅嘢好簡單，只係「願榮光歸香港」。
延伸閱讀►►►