香港「反送中」運動進行超過100日，喺依段時間入面，香港著名YouTuber「大J」一直積極參與，好多網民話佢係香港YouTuber界行得最前嗰個。尋日（9月16日）大J又出咗條新片，內容涉及直接面對防暴警察，而喺今日（9月17日），大J就喺Facebook開post話自己收到至少2－30個死亡恐嚇，但佢竟然咁回應？
片／大J又挑機！爆警察金句回應死亡恐嚇！
Image Source:Facebook:Jason - 大J
文／偉文
香港「反送中」運動持續進行，香港著名YouTuber「大J」一直都參與其中。佢喺6月9日嘅遊行之前，已經拍晒片呼籲觀眾參加，之後亦不斷拍攝、上傳參與示威嘅影片，俾網民譽為香港YouTuber界嘅「社運第一人」。
喺尋日，大J又出咗條片，內容係講及佢喺9月15日同女朋友Mai行完街，揸車返屋企食飯嘅途中，撞到防暴警察封路。
好多網民睇完條片，都留言話大J好勁揪，俾防暴警察咁圍住都可以咁冷靜同理直氣壯咁回應，就算車尾箱有「兩個頭盔，三個豬嘴，一件反光衣」都唔驚，堅持同防暴警理論，直至佢哋放行。
條片入面，影到有唔少唔多禮貌嘅警員，但亦都有幾位警察相當有客氣同有得商量。不過大J喺片到有講到話唔排除係因為認得佢，又或者以為佢架車係咩名牌車，警察先至會放行、以禮相待。
喺條片出街之後，網民當然又再大讚大J好嘢，反應相當熱烈，但原來，反應熱烈嘅唔止網民，仲有一啲惡徒。今日大J喺Facebook到開post，話自尋日條片出街後，佢收到2-30個死亡恐嚇，主要係叫大J行路小心啲，話下次見到佢會捅佢一刀咁。
面對依啲死亡恐嚇，生命受到威脅嘅大J，不得不宣佈要「停止發佈有關香港政治運動嘅事情」……講笑咋！大J係爆一句警察金句回應依啲恐嚇，係咩啊？係「你哋咁樣係唔會令到我驚」！
好多網民都話好佩服大J嘅勇敢，不過就提醒大J出門口真係要留意吓好啲。
點都好，香港人，加油！
延伸閱讀►►►
片／831警方發出反對通知書！大J 決定舉辦七周年觀衆見面會