屯門Happy伯年派三十萬,網民竟讚心水清?

同屯門娜娜熱舞嘅而廣被流傳嘅「Happy伯」再引網民熱議,但今次竟然係大讚佢「心水清」?

image source:YouTube:拍拍拍影片截圖

文/偉文

屯門公園嘅「大媽」一直困擾當地居民,市民多次反映「大媽」造成噪音污染,仲引嚟唔少伯伯去圍觀兼且大派利是,場面形同「色情場所」,令到佢哋唔敢帶小朋友過去。


大派利是嘅伯伯中有一個相當出眾,佢經典嘅舞姿,投入嘅表情,令到佢喺網路上爆紅,仲引到唔少劇集、明星模仿。網民借佢講過嘅一句說話:「我唔係咸濕,我只係想生活Happy」,稱呼佢為「Happy伯」。

▲「Happy伯」出現喺「光復屯門」現場,仲應現場市民要求,再現招牌舞姿。

▲關智斌宣佈演唱會加場,容祖兒興奮到模仿「Happy伯」跳舞。(影片8:45)

▲TVB劇集《愛回家之開心速遞》模仿「Happy 伯」。


《蘋果》今日就出咗單「Happy 伯」嘅獨家專訪,唔少網民睇完竟然話佢心水清?據報導,「Happy伯」姓陳,已經83歲,喺90年代喺武漢開傢俱廠,之後就交由個仔打理,依家就有十幾個物業收緊租,又有投資股票,生活無憂。「Happy伯」家底咁厚,可以成日去聽歌派錢,佢話:「我10年喺佢哋身上使咗300幾萬!」嘩!咁驚唔驚畀人呃啊?

原來「Happy伯」心水好清,佢知道唔少「大媽」埋佢身係為咗利是,係「搵食」。但佢又覺得自己因為咁而開心,自己又有錢,派吓錢換開心無乜所謂咁話。

「Happy伯」有咁嘅睇法,好多網民都好驚訝原來佢諗得咁通透,真係「一買一賣」,用錢買開心。而且「Happy伯」對「反送中」運動仲有一套睇法,話自己理解年輕人,反而批評林鄭:「好多嘢特首搞錯咗,到而家都感覺到佢係大晒,呢啲就唔得,睇到咁嘅環境,你做特首應該就吓人。」
《蘋果》依個專訪,真係令「Happy伯」印象好咗唔少,而且好多網民都話:屯門派利是嘅啊伯都明,點解仲係有啲人唔明㗎?


延伸閱讀►►►


政治放兩旁,黃藍為民生:光復屯門公園有咩咁大魔力?

何君堯號召三萬人拆連儂牆!外國記者話沙田921再現元朗721

黃夏蕙暗串何君堯?網民留言激讚「夏蕙bb」!



x

訂閱DailyView網路溫度計(香港版)電子報