片/無聲不等於沉默,手語哥哥演繹《願榮光歸香港》

由網民創作嘅《願榮光歸香港》快速流傳、普及,廣受香港人傳唱,其後更加有唔同嘅version出現,以唔同嘅語言、方式,表達同一個心情、目標。而喺尋日,出現咗一個超越聲音嘅版本,手語哥哥黃耀邦同一眾聾人,用手語「唱」出《願榮光歸香港》。

Image Source:YouTube:Love Song Hand影片截圖

文/偉文

由「LIHKG」討論區用户「Dgx69210」於8月25日創作咗一首,叫做《願榮光歸香港》,為持續抗議、示威嘅香港人打打氣。後來又合連登一眾巴絲嘅力量,潤飾歌詞、合唱、整MV、翻譯成其他語言……產出咗一首完整表達香港人當下心情嘅音樂作品,有人更加稱呼依首歌嘅地位有如「國歌」一樣。


《願榮光歸香港》因為詞曲易記易唱,內容又可以引起廣大香港人嘅共鳴,好快就喺香港廣泛流傳,大大小小嘅示威場合都可以聽到佢哋旋律,好多市民幾乎日日都會聚埋一齊大合唱。好多人話依首歌完全唱出咗香港人嘅心聲,以前見到有人奏國歌嗰時喊覺得好假,依家自己聽到《願榮光歸香港》都成日忍唔住流眼淚。

《願榮光歸香港》係香港人嘅歌曲,但其實唔係所有香港人都可以聽到。香港有一班聾人、聽障人士,佢哋都係生活喺香港嘅人,佢哋都係努力為香港付出,希望一切榮光都可以歸於依片土地。但佢哋嘅世界冇聲音,無辦法講出佢哋想講嘅說話,亦聽唔到依首唱出香港人心情嘅樂曲。

但依班活喺無聲世界嘅香港人並唔沉默,佢哋為佢哋成長、生活嘅土地企出嚟。好似為「民間記者會」做手語傳譯,被網民稱呼為「手語哥哥」嘅黃耀邦,勇敢站於人前,用唔到聲音,就用手語、表情、身體動作嚟表達支持,亦以佢嘅方式將訊息傳遞出去。佢似佢Facebook page出嘅status就有講出一眾聾人心聲:

「縱使我們不能發聲,
面對時代的黑暗與恐懼,
我們仍要發「聲」!
因為,我們都是香。港。人!」

依一班喺無聲世界嘅香港人,以佢哋嘅方式「發聲」,「唱」出《願榮光歸香港》。


無聲不等於沉默,香港人,願榮光歸於這裡。


延伸閱讀►►►


片/《願榮光歸香港》響遍全城,合唱之聲聽喊唔少香港人

民間記者會嘅手語傳譯,「無聲世界嘅英雄」──黃耀邦

西門町響起《願榮光歸香港》,毓民寄語年輕人「最緊要保住自己」


x

訂閱DailyView網路溫度計(香港版)電子報