年少有知,由「雨傘」唱到「反送中」嘅Boyz'Reborn

Boyz'Reborn,一隊由9個18歲男仔組成嘅樂隊,喺本應開心成長嘅青春時光,面對「雨傘」同「反送中」嘅社會撕裂,佢哋以音樂為年輕人發聲。喺「年輕人」被標籤嘅時代今日,回望依隊堅持唱出自我嘅樂隊,佢哋係咪真係某群人口中嘅「年少無知」呢?

Image source:Facebook:Boyz' Reborn照片

文/偉文

因為「反送中」運動,香港社會習慣標籤「年輕人」,無論正面定負面都好,「年齡」都成為一種可被解讀嘅符號,「年輕人」同「示威者」輕易掛勾,刻板印象日漸加劇。

睇返香港社會對「年輕人」嘅解讀,呈現兩極嘅鮮明對立:有人就話佢哋係香港嘅未來,為咗香港可以勇敢企捍衛市民應有嘅權力,維護社會核心價值;但又有人話佢哋係「曱甴」、「廢青」,搞亂香港、無法無天,上街示威係因為入世唔深俾人搧動,係「讀屎片」,係「年少無知」。

但「年少」,係咪就真係「無知」呢?

香港有一隊叫做「Boyz'Reborn」嘅band,係由9個喺大專院校讀緊書嘅18歲男仔組成,由「雨傘」到「反送中」都係積極就社會問題發聲。5年前稚氣未脫嘅「學生哥」,靦腆唱出《試問誰還未發聲》、《撐起雨傘》,鼓勵香港人勇於表達己見,為「自己的信念發聲」,撐住香港。

當年,未變晒聲嘅少年歌聲感動唔少人,支持著唔少人走上街頭。

▲▼Boyz'Reborn演繹《試問誰還未發聲》、《撐起雨傘》少年版。


當年,依9個中三學生、「中學雞」,見到「雨傘」運動下嘅香港社會,見到香港警察向香港市民射向嘅催淚彈,佢哋難過、傷心、疑惑……將感受寄在音樂當中,創作出一首歌曲:《催淚彈》。


《催淚彈》嘅歌詞揭示少年對社會狀況嘅反思不解現實同教科書內容點解唔同:「點解政府唔會聆聽一番/令我諗起中史嘅領袖會虛心納諫」;又滿載少年對當權者、執法者嘅質疑:「催淚彈本來用來保護人民/如今卻令道路鋪滿著灰塵」、「催淚彈令人要再拔足狂奔/究竟點先叫做到和平抗爭」;仲有少年對「民主」嘅理解:「民主精神係一齊同撈同煲/一齊討論決定究竟咩野/係最好

少年思考、創作、表達,尋找自我於香港社會嘅定位,似乎並不「無知」。


「無知」嘅唔一定係「少年」

將「年少」勾連「無知」真係可以好簡單,自古如是。哪怕今日社會嘅「年輕人」3歲求學,讀到中學、大學、碩士,更甚準備攻讀博士,喺某班人眼中,無半頭白髮、三五條皺紋,都只會貼上「年少無知」嘅標記。 

就算Boyz'Reborn只係以歌聲表達己見,對今日社會上某一群人嘅定義嚟講,佢哋都係「廢青」、「曱甴」,係「年少無知」嘅一群,社會上絕大部份人食鹽都多過佢哋食米。

Boyz'Reborn依9個男仔依家先廿歲左右,全部都仲係大專生。雖然相對5年前係大個咗唔少,氣質都沉穩咗唔少,但始終都未有半頭白髮,亦唔見皺紋。不過,「年少」多好,面對今年香港「反送中」運動,佢哋依舊企出嚟。

 

一首《夏愨道》,又聽喊唔少香港人。


《夏愨道》嘅詞、曲以及MV都較《催淚彈》成熟,但想表達嘅內容冇變過,依然心繫於香港社會。Boyz'Reborn以《夏愨道》刻畫香港人喺「雨傘」、「反送中」入面,於夏愨道上堅守「自由」信念,傳遞感動同希望,

依一班閒閒地讀過十幾年書嘅「年輕人」,只不過係「年少」。佢哋因為反思到依個城市嘅問題,企咗出嚟抗爭;因為社會有違背自細所學嘅良知價值,勇敢捍衛信念。但社會某群人輕易以「年少無知」為由,輕賤佢哋堅信嘅一切,漠視佢哋不斷表達嘅訴求,令到唔少「年輕人」感到絕望無助……

到底邊個先係「無知」?


「少年」實際係代表「希望」

好多「少年」喺「反送中」運動入面,漸行漸感絕望,唔少人更加諗過放棄一切。有好多人就話:你哋先十幾廿歲,仲有幾十年路要行,唔好咁輕易就放棄人生,唔值得。但轉個頭嚟諗,係要有幾絕望先會令「大把世界」嘅年輕人選擇放棄?又係邊個令年輕人感覺唔到希望?

Boyz Reborn成員Ben曾經面對過依種絕望,仲諗過試圖放棄依個人生,但係佢最後都冇做到。Ben現身說法,同「年輕人」講應該點面對啲唔如意事,去看待自己不被明白嘅處境。佢以《給憂鬱的你》向感到絕望嘅「年青人」講:不要放棄。


睇住Boyz Reborn由「雨傘」唱到「反送中」,9個男仔依然堅持用音樂彰顯香港「年輕人」嘅信念;睇住香港「年輕人」一次又一次走上街頭,不顧一切咁捍衛心中確信嘅道德、良知。有好多香港市民被感召上街,為嘅係保護佢哋,因為佢哋係香港嘅「希望」。

唔知仲有幾多香港人,會話依班香港「年少」嘅人,係「無知」呢?


延伸閱讀►►►


「反送中」運動係「雨傘」運動2.0?當中十大進步你又知唔知?

日本真係咁美好?網民大爆日本工作辛酸史,慘過香港做社畜!

《淪落人》真的「淪落」了!今年奧斯卡拍板提名《掃毒2》!

x

訂閱DailyView網路溫度計(香港版)電子報