片/澳洲記者狂串小粉紅爆紅!最新消息話俾政府告五條罪?

香港自6月起因為「反送中」逃犯條款引發嘅社會運動,至今已經超過100多日,經過埋10月1號香港警察開實彈射擊市民,引起民眾更多不滿,睇嚟呢場社運都未見完結嘅一日。喺呢場咁漫長嘅社運入面,香港人唔止單單喺香港抗爭,仲要喺國際上都不斷發聲,引咗好多外國傳媒都關注香港議題,將香港嘅社運消息畀全世界都見到。其中,就有一位澳洲記者做咗一系列嘅香港社運訪問,成為網路上熱議嘅話題!

Image source:YouTube/中國人對香港的抗議活動有何看法?

文/積遜猿

澳洲記者Avi Yemini,喺佢FB自介,佢強調自己嘅目的係「揭穿」(Debunking)謊言,一直相當用心去到各種活動嘅現場訪問。Avi Yemini喺8月16號上傳咗一條影片,係佢親身嚟到香港社運現場,話要訪問香港示威者,問吓佢哋點解要示威,有咩目的同訴求。8月23號,佢再放一條名為「唯一一條你需要睇嘅香港示威者影片」(The one video on the HONG KONG PROTESTS you need to see),內容係訪問唔同嘅香港示威者,佢哋都指控香港警察嘅暴力,重申「五大訴求」,仲高叫美國總統特朗普唔好信中國。

Avi Yemini見證完香港社運,知道咗香港示威者嘅訴求之後,佢返咗澳洲都依然繼續做相關嘅報道,專門去當地嘅同香港議題相關嘅活動,訪問反對香港社運嘅中國人。呢幾條影片,佢不斷針對香港人訴求內容,質問佢哋點解要反對香港社運。俾佢訪問嘅中國人,都無方法回答香港示威者「五大訴求」到底有咩內容,又誤以為香港人唔要一個中國,搞緊港獨。Avi Yemini嘅窮追不捨,狂問中國受訪者,問到佢哋啞口無言,好多網民都話真係睇到哭笑不得!

喺Avi Yemini最新嘅訪問入面,佢不斷咁俾一位中國中年男子打斷,呢位男人叫其他中國人唔好接受佢嘅訪問。Avi Yemini最初以為,係佢拍中國人影片太出名,有人為咗唔好令中國出更多醜,所以制止咗佢哋嘅訪問。喺佢上傳影片之後,好多香港、台灣以至中國都有人寫信話佢知,呢位中年男人好可能係中國係澳洲間諜!佢希望有更多人睇到佢個樣,搵出佢嘅真正身分。

正當Avi Yemini令反對香港社運嘅中國人出醜之際,佢喺9月30號上傳嘅影片,就令一眾香港網民相當擔心。佢喺影片入面話,自己因為上年競選維多利亞州選舉嘅事,被控五項罪行。Avi Yemini強調自己無罪,話係政府打壓言論自由,一定會為咗呢件事抗爭到底。香港就有網民呼籲大家,話呢位澳洲記者咁支持香港人,一定要支持返佢,仲話要捐埋錢畀佢打官司。

一齊睇睇大家點講:
「依幾次佢訪問海外強國人,令佢地出哂醜,確確實實係幫香港發聲。淨係依幾次既訪問,都值得大家俾錢幫返佢。」
「略盡咗一分綿力希望幫到佢!」

「佢d訪問真係好正,令國際更睇到五毛有幾腦閉塞。」


延伸閱讀►►►


片/少年喺電光火石間疑似中兩槍?網民怒斥等同謀殺!

巴黎時裝週都Full Gear上陣?網推:光復香港 時裝革命

張敬軒衰乜嘢?一個post引嚟香港人狂負皮?

x

訂閱DailyView網路溫度計(香港版)電子報