去信革除中槍學生?教協大戰前特首,批橫蠻本性

香港前任特別行政區行政長官梁振英,從佢退下特首職位以嚟,梁生一直關心香港社會,日日睇《蘋果日報》,年中無休咁喺個人Facebook更新自己對時事、政治嘅睇法。梁生咁關心香港,對於香港自6月起因為「反送中」逃犯修訂條例而引起嘅大型社會運動,緊係有好多意見要畀香港人喇!梁振英唔止話香港示威者係暴徒,近日仲針對10月1號俾警察實彈射擊中五學生曾志健,發表公開信希望何傳耀紀念中學校長謝潤明革除呢位學生嘅學籍,引起網路罵戰⋯⋯

Image source:FB/教協(香港教育專業人員協會)

文/積遜猿

10月1號,香港示威者聲言「沒有國慶,只有國殤」,喺香港多區抗爭,發生相當激烈嘅警民衝突,出現咗唔少嘅流血事件。其中,10月1號示威入面最令香港市民震驚同憤怒嘅,一定要數呢個持續超過三個月嘅社運,首次有警員以實彈射擊示威者,使其胸部重傷。呢位示威者曾志健,只係一個未成年嘅中五學生。正當好多香港市民都希望呢位學生吉人自有天相,可以平安無事康復,另一邊廂,前特首就喺10月2號,發表咗一封畀何傳耀紀念中學校長謝潤明嘅公開信。

呢封公開信入面,梁振英好清楚嘅表明:「社會關注的不僅是警察應否開槍,而是貴校學生暴力襲警,犯下嚴重罪行這一清楚事實。」「我公開呼籲閣下馬上革除這名學生暴徒學籍,以作懲處,以儆效尤,並向社會交代。」其後又針對《星島日報》報道「中槍男生校友指校方承諾不會處分會保留學位」,佢就話希望呢個並唔係校方嘅真實立場。無耐,梁生又炮轟支持受傷學生嘅人同組織:「請教協、葉健源和其他泛民議員停止姑息和變相鼓勵暴力行為,請公開譴責暴力襲警的何傳耀中學的學生。此人如果不是襲警,不會中槍。」

香港教育專業人員協會,喺10月2號梁振英出咗Post無耐,佢哋亦都用咗FB出Post回應前特首。教協呢篇聲明嘅用詞相當強硬,提到「梁振英持續滋擾教育界」,「在學生重傷之際向校長個人施加政治壓力,充分顯示他的橫蠻本性和對教育界毫不尊重」,好多教職員都感到「極度憤怒」。最後教協明確咁叫「各界也毋須理會梁振英的無理要求」,即係話學校唔使理佢。梁振英見到教協咁講,當然嬲嬲豬喇,再發咗個Post「敎協還想香港多幾個曾志健?再斥教協」,指責「如果教協不痛改前非,香港只會出現更多的學生暴徒」。

網民對呢場教協大戰前特首嘅大事,似乎各有立場,我哋先睇睇梁振英派點講:

「一班曱甴又揾到藉口到處破壞……CY,你幾時可以連系中央搞掂香港D司法呀!求求你。」

「大陸大中小學生由心愛國,香港學生大中小學生多數反國,教育之禍!」

「坐監,是年青人唯一的出路lol……」


支持教協嘅朋友又點講呢:

「感謝教協保護學生,保護學校!」

「不如改名做梁振中啦,做政協個名唔可以有個英字。」

「死都要加句『前行政長官』,係唔係讀得書少連格式都唔識,定係覺得呢個頭銜好威?行政長官同過街老鼠冇分別喎!」


延伸閱讀►►►


片/澳洲記者狂串小粉紅爆紅!最新消息話俾政府告五條罪?

片/少年喺電光火石間疑似中兩槍?網民怒斥等同謀殺!

巴黎時裝週都Full Gear上陣?網推:光復香港 時裝革命

x

訂閱DailyView網路溫度計(香港版)電子報