破壞童年回憶?《花木蘭》真人版試映結果太差要重拍!

2019-10-21

1465Views

大家期待咗好耐~好耐~又好耐嘅《花木蘭》即將會喺出年(2020年)嘅3月尾喺北美地區首映!但喺呢個淨返半年都無嘅時間,迪士尼因為試映會嘅反應唔理想竟然要重拍,仲要係為期四個月大型重拍!大家都擔心緊會唔會延期上映,究竟點解要補拍呢?

image source: Youtube: Walt Disney Studios影片截圖

文/牙菜

隨著呢幾年迪士尼將好多經典卡通翻拍成真人版,《仙履奇緣》、《阿拉丁》都拎到唔錯嘅成績。喺2010年迪士尼話要翻拍《花木蘭》,到2015年正式落實,好多人都好期待自己童年嘅代表性卡通會點樣拍成真人。

KEYPO大數據關鍵引擎嘅分析顯示,香港網民喺過去1年就《花木蘭》嘅討論度有三個高位。第一個就係《花木蘭》嘅正式Trailer出街嘅時候,大家都好關心當年嘅動畫同真人版相比有啲咩唔同。第二個就係飾演花木蘭角色嘅演員劉亦菲表態自己政治立埸,最後就係最近試映會大家嘅反應。


image source:KEYPO大數據關鍵引擎(分析期間:2018/10/22 - 2019/10/17)


最近,喺《花木蘭》嘅試映會完成咗無耐之後,外國網站The DisInsider 就爆料話套戲將會重拍,預計去到出年,即2020年嘅2月先會完成。暫時唔知呢四個月嘅重拍會唔會影響到《花木蘭》喺北美嘅上映時間,畢竟佢都係2月左右先完成。

「暫時未知到係乜野要重拍,不過我地聽到嘅係『一幕重大嘅戰場畫面』。」(As of now, it is not known what the reshoots entail, but we heard it is for significant battle sequences.)

究竟係啲咩因素令到個試映會反應差到要迪士尼急到要重拍?綜合各大網民嘅意思,下面歸納出幾個網民對套戲唔滿意嘅重要points。


1.啊~~~~~木須去咗邊?連李翔都無埋?

喺《花木蘭》個卡通入面,花家嘅祖先派木須去幫花木蘭適應軍中生活。而木須嘅古靈精怪就成為入面最搞笑角色。但係喺真人版入面,木須個角色就消失咗,取而代之嘅係一隻唔識講嘢嘅鳳凰。唔少網民得知呢個消息之後都接受唔到,無咗木須嘅《花木蘭》就好似等於周星馳電影少咗個吳孟達咁,少咗啲嘢。


image source:Youtube: Walt Disney Studios頁面截圖 

另外唔見咗嘅,仲有卡通版男主角李翔。《花木蘭》卡通入面,大家最熟嘅橋段除咗代父從軍之外,就係花木蘭同將軍李翔嘅線。喺卡通入面,李翔好出色咁帶領成隊軍隊同訓練花木蘭,但知道花木蘭係女仔嘅時候完全唔識反應嘅反差,令到好多人都忍唔住笑。而喺真人版入面,「李翔」呢個角色亦都無咗,男主角將會係一個身為士兵嘅「陳宏輝」代替。無咗呢兩個咁重戲份得嚟又咁多人鐘意嘅角色,啲觀眾好難收貨喎。可能因為咁迪士尼逼於無奈唯有重新執過套戲。


image source:Youtube: Walt Disney Studios頁面截圖


2.經典歌曲有無得用統音樂嘅版本,聽下都好啊!

喺拍呢套電影嘅時候,導演妮基卡羅 (Niki Caro) 就曾經表示過:

「花木蘭係一個無畏無懼嘅後生女,毅然以男子裝扮對抗入侵中國嘅外敵嘅冒險之旅」(Mulan is the epic adventure of a fearless young woman who masquerades as a man in order to fight Northern Invaders attacking China. )

所以《花木蘭》真人版會係充滿打鬥場面嘅武俠片。喺9月嘅時候,The DisInsider 已經透露出《花木蘭》原本打算係無歌,就算可能有歌都唔會係演員唱,只會係純樂器演奏嘅版本。而導演自己都話套戲唔會有歌出現 。但卡通入面就有首代表性嘅歌——《倒影》(Reflection)。相信其中一個重拍嘅原因,可能係觀眾接受唔到迪士尼出品嘅《花木蘭》係一套唔好話《倒影》,連歌都無首嘅電影。


3.演員嘅政治取態令部份人對人選有意見

飾演花木蘭嘅演員劉亦菲早前曾經喺網上表態自己立場,部份觀眾因為呢年事而不滿迪士尼繼續用佢做花木蘭呢個角色。網民亦喺Twitter發起hashtag #boycottMulan。劉亦菲本人亦無出到席早前喺8月嘅迪士尼D23 Expo上《花木蘭》嘅presentation。可能因為群眾壓力,迪士尼要讓步喺電影入面做啲調整?


無論要重拍啲咩都好,對喺2010年等到2020年嘅一眾觀眾嚟講,能夠勾起返佢地細個嘅回應嘅翻拍片,有返細個睇卡通嗰種原汁原味嘅feel先係最重要!當然,最好就唔好延遲上映啦,因為大家都等咗十年。人生唔係好多個十年㗎咋!大家一齊重溫吓經典畫面頂住先啦!


延伸閱讀►►►


LOL都出Moblie版,舊玩家竟然大嗌「不了」?

兄弟情不再? 《再見UFO》可能係Shine最後螢幕合體

片/徐曉冬打爆嘅詠春大師丁浩又被KO?今次只係頂到74秒!



x

訂閱DailyView網路溫度計(香港版)電子報