香港書展有咩講座值得去？除咗倪匡仲有咁多勁人！

——香港文壇老前輩

杜漸，原名李文健，或者後生一輩無咩聽過佢嘅名，但係佢喺香港1970、80年代都活躍喺文藝圈，做過《讀者良友》總編輯，創辦咗極具文化歷史價值嘅讀書雜誌《開卷》。佢嘅著作好多，尤其對科幻、推理文學有研究，《書癡書話》、《偵探推理小說談趣》等著作，都精彩咁介紹、評論咗好多唔同嘅科幻、推理作品。2019年，佢仲要喺書展出《偵探書話》。作為老前輩，杜漸喺書展講「香港科幻的早期發展」，真係無人能及。

——貼地嘅文學家

香港小說家譚劍，佢多年嚟係兩岸三地都攞咗好多文學獎，其中最廣為人知嘅，一定係2010年嘅《人形軟體》，講AI，又講香港社會議題，仲攞埋首屆全球華語科幻星雲獎「全球華語最佳科幻/奇幻長篇獎」金獎，認真屈機。譚劍嘅作品有強烈嘅批判性，力證咗科幻小說，都可以好貼地。譚劍除咗會出席7月18號「類型小說作者圓桌會議——我們如何成為推理／科幻作家？」，7月20號「科幻中的推理，推理中的科幻」都有佢，不可錯過！

——中國科幻大師

要講韓松，可以睇吓因為《三體》、《流浪地球》爆紅嘅劉慈欣點評論佢：「我寫的是二维科幻，韓松寫的卻是三维科幻。如果说中國科幻是一個金字塔，二维科幻是下面的塔基，而三维科幻則是塔尖。」韓松讀緊大學寫嘅《宇宙墓碑》，已經喺 1991年攞咗「全球華人科幻小說徵文」大賽特獎，之後寫嘅作品係咁攞獎，可謂中國科幻作家嘅傳奇人物。7月19號，書展「平行的軌跡——華文科幻創作談」，韓松嘅講座相當值得大家去聽。

——香港科幻會會長

講起李偉才，好多人都知佢係香港第一代天氣先生。但你又知唔知，佢畢業於港大物理系，一直醉心將科學普及大眾，除咗專業知識嘅論者，仲要玩埋文學創作，真係多才多藝。1999年，李偉才以《科幻中的科學》一文榮獲台灣李國鼎通俗科幻獎嘅第一名，筆耕不斷，2008年出任香港科幻會會長，實至名歸。李偉才今次書展有三個講座，其中7月20號「嘆為觀止—科幻小說的無窮魅力」係佢單獨主講，多年經驗，唔聽就蝕囉。

——本土作家揚威海外

香港推理、科幻作家陳浩基，可謂近年相當出色、知名嘅本土作家，皆因佢多次得到文學大獎，攞咗2009年第七屆「台灣推理作家協會徵文獎」首獎，2011年第二屆「島田莊司推理小說獎」嘅首獎，2014年以《13·67》榮獲2015年台北國際書展大獎，售出多國版權，仲要改編成電影。陳生要喺7月18號「類型小說作者圓桌會議——我們如何成為推理／科幻作家？」做講者，猛人講創作心路歷程，見到文學大師嘅機會認真唔多，一定要去！

——卡夫卡獎

閻連科喺長篇小說作家，作品可謂備受學界肯定，唔單止2016年以《日熄》攞咗紅樓夢獎，2014年衝出中國，攞咗國際級大獎卡夫卡獎，亞洲地區除咗村上春樹，就只得佢有份攞咋！佢另一個受人注之處，係閻連科係中國最受爭議，禁書最多嘅作家。不過禁唔到嘅，因為佢嘅作品已經翻譯咗近30種語言，真正國際流通。今次7月20號，佢要講喺「在無盡的困境中活著與寫作」，真係特別有說服力，唔到你話唔服嘅。

——教授級人馬

鄭培凱出生中國，1949跟父母去咗台灣，台大讀外文系，受到白先勇影響，對文藝好有興趣。去完美國留學，又喺美國同台灣大學教過書，1998年去咗香港城市大學做中國文化中心嘅主任同教授，真係兩岸三地佢都玩哂。7月22號，佢係「文學遇見大灣區」嘅其中一位講者，入面仲有好似許子東呢種名家，相信由佢嘅特別嘅經歷，一定對近年熱門嘅「大灣區」有唔少特別睇法。呢個議題咁貼地，香港人一定要知己知彼喇！

——《一句頂一萬句》

劉震雲係中國相當知名嘅作家，著作等身，2009年出版嘅《一句頂一萬句》獲得2011年茅盾文學獎。但佢唔止喺中國受到賞識，2016年劉震雲榮獲埃及政府授予「埃及文化最高榮譽獎」，2017年獲得摩洛哥文化部頒發嘅「國家文化最高榮譽獎」，喺中國首位有呢個殊榮嘅作家，真係衝出中國。更唔好講，佢好多小說都改編咗做影視，「從《一九四二》到《我不是潘金蓮》」，正係佢同馮小剛對談改編作品，一定好有趣。

——佢嚟自蒙古

白岩松係中國大陸嘅知名作家，出過好多唔同範疇嘅書，單係旅行系列，《岩松看台灣》、《岩松看日本》同《岩松看美國》都已經有三本。白岩松喺2016年出咗本《白說》，時政、教育、改革、音樂、閱讀、人生咁多個題目，都講咗唔少人生哲理、智慧。今次佢7月21號嘅書展講座：「白說：讀書、閱人、知時」，呢個名正都出自呢本書。白生人生閱歷咁豐富，相信講呢個題目，一定令聽者知道點樣知己、知人同知時。

——「香港四大才子」

相信大家對倪匡都唔陌生，香港70、80後嘅共同回憶，就算係後生少少嘅，都有喺電視睇過衛斯理劇集喇！但當然最近佢最爆紅嘅討論，係因為倪匡十幾年前講香港社會嘅片段，竟然中哂，真係預言家咁。倪匡嘅作品唔少都相當有批判、社會性，好似佢本《追龍》咁，話東方有個城市會因為失去自身優勢而消失，隱喻香港，真係好有遠見。7月21號，「無限時空中追尋無限未來——倪匡與衛斯理的科幻世界」，不見不散。