係戲定真實世界？大數據睇網民至Hit討論Joker小丑話題！

大家諗起小丑，都會聯想到殺人犯。近呢幾年發生唔少無差別殺人事件，無辜嘅受害者固然令人感到惋惜，部分人會覺得好憤怒，認爲要判處最重刑罰俾犯案人。不過其實我哋更加要去了解「壓倒駱駝最後一根稻草」到底係咩，點解會造成呢D人有呢D行爲，都好值得我哋認真思考。

小丑電影話題咁貼近現實社會，有人覺得行出戲院仍然好似仲喺套戲入面，令人擔心會唔會有人有樣學樣犯罪，其實類似事件早有前科。2012年美國西部一間影院放映《黑暗騎士：黎明昇起》時發生槍擊案，用多種槍械行凶，造成12死70傷，所以外國今次都有因爲小丑電影而作出相關戒備，以免悲劇再次發生。

點先算做一部成功嘅電影？可以引起觀衆嘅共鳴、帶出背後意義、引發大家思考，以上三點應該都能夠成爲評分標準之一。而小丑呢套電影，一次帶出好多唔同社會問題，揭開現實中存在各種「醜陋」嘅一面。就好似電影中講到高譚市鼠患嚴重，衛生環境差，都彷彿係影射緊現實社會早已滿目瘡痍。

大家印象中嘅小丑係一個惡名昭彰大反派，不過今次喺電影入面，被社會弱勢捧做英雄。有網友就覺得將小丑英雄化，掩飾咗本身犯罪行爲。違反法律固然有錯，但同時都應該要反思，點解每次等到釀成悲劇，大家先正視問題？小丑唔只係一個個體，而係代表一班社會低層。種種極端、犯罪行爲都係對世界無助嘅呐喊。小丑一直努力做一個正常人都不被尊重，直到殺人之後，反而被譽爲所謂英雄，社會亦終於願意注視佢。面具下可以係任何人，如果我哋視而不見，社會上只會出現更多小丑。

要演出一個咁經典嘅反派角色，對演員嚟講真係一個好大挑戰嚟，加上歷代飾演小丑嘅演員都好出色，想超越前人就更加難喇。過去飾演過小丑嘅演員，幾乎都因為太投入角色而精神飽受折磨，甚至患上憂鬱症。有網民開post討論邊一任小丑做得最好，當然每個人心中都各有人選，基本上每一個演員嘅演繹都有獨特之處。即使前面已經有深入民心嘅演員，今次飾演小丑嘅Joaquin Phoenix一樣好評如潮，完美展示一個人點樣一步一步邁向瘋狂，精彩又細膩演技令人睇到眼都唔捨得眨。

根據國際調查報告，香港貧富懸殊情況一直喺國際排頭位，地少人多環境下，地產商不斷起豪宅，同時有唔少人仲逼緊喺劏房。國際金融中心呢個稱號聽落風光，喺經濟高速發展下，物價持續上升。電影中外面聲援示威者一邊叫囂，對比戲院入面有錢人無視出面動亂，事不關己、若無其事繼續欣賞《摩登時代》呢套諷刺社會階級嘅電影。我哋現實生活中何嘗又唔係一樣咁諷刺呢？

霸凌問題由校園到職場都存在，從好多新聞上面，我哋都見識到霸凌行為對於一個人嘅影響可以有幾嚴重。依家大家生活基本上都無辦法脫離網絡，唔少人覺得喺網上大家唔知自己身分，隔住個螢幕發言就唔洗負責任，於是就出現好多鍵盤戰士不斷言語攻擊其他人。呢D無形暴力，其實對受害人都係好大打擊，就好似前幾日發生雪莉自殺事件，又係一個血淋淋例子。

電影入面，透露小丑兒時曾經被媽媽虐待，雖然電影中只係輕輕帶過，但都會令人聯想到小丑所患上不斷大笑嘅病，同佢嘅情緒問題會唔會係因為童年被虐嘅經歷。其實喺2008到2018年間，香港有超過9000宗虐兒個案呈報，呢個紀錄創咗1981年新高。童年陰影大家講得多，小時候經歷嘅事，對一個人以後嘅成長有好大影響，所以呢個議題，絕對好需要關注同去解決。

一般提起弱勢社群，大家都會諗到老人、單親、殘疾人士等等，電影主角小丑經濟拮据，本身有怪病而一直被人取笑、鄙視，喺社會動盪不安嘅時候更被解僱，之後遇到對佢冷嘲熱諷嘅華爾街經紀，成為佢爆發嘅導火線。社會入面嘅弱勢社群好多時都無能為力去改變現狀，好需要大家關心同協助。當然呢個問題，唔係大家去探訪，捐錢就能解決，歸根究底都需要政府有相應解困措施。

精神病呢三個字令好多人聽到就敬而遠之。近年越嚟越多精神病患自殺事件，令大家都慢慢更加正視呢D病。以前聽到人哋講精神病就覺得等於「痴線」，但因為都市人生活壓力大令情緒病變得普遍，好彩嘅係呢幾年大家開始慢慢去除各種對情緒病嘅歧視，其實精神病唔一定會傷害人，往往係患者自己要承受好大壓力同受到精神困擾，如果每個人都對身邊人多D關心同體諒，可能就可以懸崖勒馬，拉住睇唔開嘅患者。