十大好煲糖水 有佢冬天唔怕Dry啦

馬蹄可以清熱生津，化痰明目，基本上同綠豆沙差不多功效，但比起綠豆沙比較中性，唔會太寒涼，全家都啱食呀。其實馬蹄露嘅材料同做法都好簡單，麻煩在要洗馬蹄同削馬蹄皮，要花好多心機。就算街市有已經處理好嘅馬蹄，都一定唔及自己批咁安心。第一步將馬蹄切粒，煲一煲水，水滾後將馬蹄同冰糖放入去滾，等到冰糖溶曬就可以加馬蹄粉，煮幾分鐘就可以熄火，倒埋蛋液落去就完成。

木瓜有豐富嘅胡蘿蔔素，幫助維持呼吸道黏膜健康。雪耳有平民燕窩之稱，唔單止滋陰潤肺，植物性膠質可以美顔，所以木瓜同雪耳呢個配搭好得女士歡心。呢個糖水同其他湯水比起上嚟比較清淡，食多碗都唔怕滯，凍熱都一樣清甜滋潤，一年四季都啱食。首先將雪耳浸軟，切走硬嘅部分，稍爲切碎，將木瓜去皮去核，切件。南北杏洗乾淨之後浸水備用，煲一煲水，水滾放入雪耳、木瓜和南北杏煲30分鐘，最後加冰糖煲溶就得。

紫米喺古時候係皇帝食用嘅米，又名「貢米」，有豐富鐵質、膳食纖維補血暖身，促進腸胃蠕動，防止便秘。紫米露煲好加上椰奶，變成淡淡嘅紫色， 散發住糯米香味，諗起都流口水呀。用一大碗水泡浸黑糯米30分鐘，夠鐘之後直接將浸黑糯米嘅水倒入煲入面，用中火煮滾，加入黑糯米，再次煮滾後轉做細火，煮大概45分鐘，按個人喜好加椰汁同片糖，煮到片糖完全溶化就可以上檯啦。

冬天咁乾燥，想食返個糖水滋潤下，燉雪梨就啱曬啦，如果咳得比較嚴重，可以加埋川貝，連同冰糖燉，效果更顯著。酸酸甜甜，大人細路都鐘意，步驟仲好簡單添。首先將雪梨洗乾淨，有人話連皮先有用，所以去唔去皮就自己決定啦。係雪梨上方大約三分一嘅地方打橫切開備用。挖空入面梨芯，放入冰糖、川貝，最後用牙籤封口，隔水蒸大概1個鐘頭就食得。

綠豆沙同紅豆沙一樣係非常經典嘅港式糖水，一樣可以加陳皮煲，性質上其實差唔多，不過綠豆就多咗清熱解毒、消暑益氣嘅功效，加入陳皮、海帶、薏仁煲，效果更加好。有部分人會加臭草呢種有效解毒、排毒嘅材料一齊煲，不過臭草唔係人人接受到，味道就見人見智啦。洗乾淨綠豆之後煲水，水滾放綠豆同按各人喜好落埋其他材料，轉做細火，記得要一直攪拌，直至煮到綠豆變軟就可以熄火，用冰糖調味。

家常糖水入面，腐竹白果糖水都係熱門之選。白果功效都唔少，可以益肺治咳，運血補腦，仲可以美白。白果個種特別嘅清香，配上腐竹細滑口感同神來之筆嘅雞蛋香，食飽飯都要飲返碗清燥熱先。腐竹煮前先浸水10分鐘以上，落白果煮，因為白果需要比較長時間先可以煮出香味，然後放埋腐竹，俾充足時間佢煲溶，大概15分鐘之後落冰糖，滾多10分鐘，最後落雞蛋，煲多10分鐘就完成~

芝麻糊賣相無咩優勢，但無可取代嘅香滑口感都成功令佢成爲好多人心頭好。主要以黑芝麻製成，傳統嘅杏仁糊同芝麻糊，係用石磨來磨出黎，依家講求效率，大部分都交由機器處理。出街好容易就可以買到已經有經過處理、磨成粉嘅黑芝麻直接加水煮滾，加入片糖適當調味就完成，如果加入磨成粉嘅白米一齊煮可以令芝麻糊更濃稠。黑芝麻營養豐富，可以潤膚養顏、補肝腎、仲有抗氧能力，越食越靚，難怪咁多女士都咁鐘意啦~

老人家成日話冬天手腳冰冷就要食多D薑，薑嘅味道唔係個個都接受到，不過煮成糖水就易入口好多啦。用比較甜嘅黃色番薯，加埋味道重嘅老薑煲嘅番薯糖水，香甜暖胃之餘可以又驅寒。將番薯去皮切粒，浸水備用。切好薑片，然後拍幾下，令煲落薑味更出。水滾落薑，大火滾10分鐘，比D時間薑煲出味。之後落番薯，等水再滾，就可以轉做中火，煲大概30分鐘，最後落片糖，煲到溶曬就搞掂。

提到中式湯水，無論喺屋企樓下糖水舖，定酒店擺酒都會見到嘅紅豆沙，一定要佔一席位。將紅豆煮到起沙，加入陳皮、蓮子等材料，果香同紅豆甜味融為一體，好味之餘，紅豆仲有豐富鐵質同去水腫功效，補血、促進血液循環，梗係要飲多幾碗啦。點樣煮出起沙紅豆沙呢？呢到話比大家知：洗乾淨紅豆之後浸一晚，第二日煲一煲水，水滾放陳皮同紅豆，大概煮60分鐘後撈起紅豆，將紅豆壓出沙再倒返落煲入面，再煮30至60分鐘，最後加入冰糖同少少鹽調味就得啦。

西米露可以話係咁多湯水入面嘅入門級，凍食熱食都得，雖然做法簡單，不過可以按個人口味加入唔同材料，例如芒果、芋頭等等，一粒粒晶瑩剔透嘅西米加上椰奶香味，真係唔覺意就飲曬成碗。最基本嘅椰汁西米露，水同西米嘅比例大概10：1，水一煮滾之後直接放入西米轉小火，記得一定要一邊煮一邊攪拌，煮到變半透明，中間有白芯就可以熄火，焗５分鐘左右。將煮好嘅西米撈出，立刻放入冰水冷卻。另外煮一煲水加入椰漿，煮滾後加入糖，之後直接將西米加入椰汁入面攪勻就搞掂~