DSE尚未結束，考生們繼續努力
一年一度嘅學生界Hunger game啱啱正式開始，各位參加者嘅戰況如何？考得好嘅，繼續keep going！發現有問題嘅，千其唔好怕，好似張家輝咁講：上得場，怯你就輸成世！悟以往之不諫，知來者之可追，未入大學，先有大學生精神，搏盡無窮。各位考生努力之餘，都一定要收集唔同嘅消息，前人嘅經驗，咁先可以贏在起跑線上。今日Dailyview用網路大數據提提你，到底大家成日講嘅DSE五大中伏位同煩惱係咩，講埋解決同面對嘅方法，等大家都可以順順利利，名列前茅。
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
Image sourse:Youtube/講三講戲
5 記錯咗考試時間
愈對自己有信心嘅人，愈容易係習以為常嘅細節犯錯。相信從來都唔會有人覺得自己會記錯時間，但你又會發現，每年係網路上係唔同朋友嘅口中，都總會見到有考生唔記錯咗考試時間。當佢哋考好溫哂書，充滿信心咁去到應試學校，發現竟然空無一人，當堂灰到核爆，真係欲哭無淚。大家千其唔好犯呢種低級錯誤，日日Check一次。
4 慣性影barcode
香港人有股癮，一股咩都影咩都要上傳嘅毒癮。食嘢要影相，去旅行要影相，爺爺過身要影相，每年DSE呢，都一定有人會影考試嘅條碼紙barcode。影咗，唔放上網，同無影有咩分別？但其實影barcode呢個行為，已經係違反咗考試條例，俾人發現隨時會扣分，甚至取消埋你考個科嘅成績！咁解決嘅方法得一個，忍忍手，唔好影相囉！
3 背名師範文照用
補習，上名師堂，已經係絕大多數學生嘅日常生活。咁為咗好成績，去補習緊係無問題喇。但係要記得小心，特別係中文作文呢份卷，即使補習名師貼中咗題，例如咩檸檬茶呀走火眾生相呀，都千其唔好照抄照用返補習班嘅範文。事關貼中題一定會俾人揭發，而且人人都咁寫，咁無創意，又俾人知死背，緊係低分喇。寧願自己寫，仲高分。
2 帶錯計數機
正所謂︰工欲善其事，必先利其器。各位考生努力溫書之餘，都係時候檢查吓你手頭上嘅計數機啱唔啱用。唔係所有計數機都可以帶入試場，一定係要經過考試當局認可先得。所以大家一定要留意計數機要印有H.K.E.A.A. APPROVED 或 H.K.E.A. APPROVED，唔係就唔可以帶入試場用。咁辛苦入咗一大堆program，無得用，隨時唔合格。好好檢查手上嘅工具！
1 未收完卷講嘢
微臣董昭，先行告退！有得走，喺Hall入面捱咗兩三粒鐘，緊係好開心喇！正當大家以為可以暫時鬆一啖氣，就好開心咁同身邊嘅人講嘢，都唔記得咗未收卷。其實，就算收哂卷，老師未講俾你哋走，都唔好講嘢，佢哋有權留低係寫返份點解講嘢嘅報告書。就算最後無扣到分，你個心都十五十六，後面嘅考試都士氣大減。所以記得離開試場先歡呼喇！
除咗考試伏位，考生五大煩惱
DSE文憑試，真係一場漫長嘅戰鬥。唔係話喺考試嗰日無犯錯就得，要發揮自己最好嘅水平，要有最好嘅狀態應試，事前都仲有好多煩惱嘅。如果唔面對問題，隨時會係精神方面壓垮埋自己，未考試之前，都已經宣佈投降。呢種非戰之罪，真係要唔好忽視，係考試前好好面對，等考試無哂煩惱，先真王道。下面五大煩惱，你又解決咗未？
Image sourse:截圖自[鏗鏘集]--阿晴的讀書壓力
5 日日都失眠
DSE文憑試，一年一次，一試定生死，錯過無回頭。呢種壓力真係令無數學生無覺好訓，久而久之，失眠。輕則喺床兩三粒鐘都訓唔到，重則眼光光等天光，非常之咁減低哂我哋嘅溫書成效。咁失眠可以點解決呢？內要正視自己壓力嘅成因，外要配合自然療法，好似做吓運動，聽吓安眠曲，唔得就要睇醫生，科學咁解決問題。
4 呀我個胃好痛
除咗失眠，壓力大仲會搞到個人胃痛。大家千其唔好睇少胃痛，絕對會係關鍵時候，例如考試果陣令你痛不欲生，連答案都寫唔到上去。而且，為咗場考試，陪上自己嘅健康，值得咩？咁首先最緊要係定期飲食，唔好暴飲暴食，飯後至少休息三十分鐘。再唔得就去睇醫生，唔好等真係病入膏肓先理，Too late！
3 父母畀太多壓力
望子成龍，做Jacky Chan，相信每個父母嘅心願都係咁上下。但有時呢種希望，就會令到考生好大壓力喇！咁喺到我想同父母講，平常心喇，你迫都唔迫到嘅。如果大家覺得父母俾太多壓力，都可以主動咁，心平氣和約父母出去飲茶好好溝通。始終都係親骨肉，佢一定唔想你咁辛苦，會願意體諒你嘅，放心！
2 擔心出路問題
雖然未知考試結果，但係呢，我哋天性都係會杞人憂天……愈諗，愈容易鑽入牛角尖。如果唔夠分，咁點呢？屋企人會點睇？我仲可以點做？咁多問題，其實都唔係未知結果之前，我哋可以解決嘅。咁當然，我哋唔會話唔做好事前準備，而係當計劃好自己咩分可以做咩之後，千其唔好再亂諗。條條大路通羅馬，人生總係有好多可能嘅！
1 考生嘅情緒問題
情緒不穩， 憂鬱、抑鬱症，唔止影響到Dse，隨時會令到往後嘅人生，陷入一片灰暗。壓力係日積月累而嚟，我哋可以搵同學一齊互相扶持，共同面對壓力根源。我哋要學會「善待自己」、「寬恕自己」，接納自己有負面情緒。外人千其唔好話佢哋，佢哋唔需有人教佢哋點做，最需要嘅係聆聽同陪伴，要同佢哋一齊經歷同克服。必要時，一定要搵心理醫生。
分析說明：
本研究資料分析時間範圍為2018年04月02日至2019年04月03日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『DSE五大伏位同煩惱 』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :