網民熱烈討論，誰是今年龍頭？
話咁快又到咗一年一度嘅第38屆香港電影金像獎喇！相信一眾香港人都等到頸都長哂。點解咁講？因為今年嘅香港電影出現咗多部以本土為題材，港味十足嘅精彩電影，引起好多網民嘅熱烈討論，仲有唔少人睇到感動落淚喎。好似《逆流大叔》咁，引起咗大叔熱潮，基本上只要自稱自覺係大叔嘅朋友，都話深有同感。一部好嘅電影，演員絕對係關鍵。成日有人批評香港電影界青黃不接，但其實都仲有好多新人入行，表現出色，值得表揚。今日DailyView用網路大數據話你知，提名嘅電影同新演員邊個最多人講，又有咩精彩之處喇！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
5 角逐奧斯卡，《紅海行動》
真事改編，軍事動作一流
《紅海行動》有一個出色嘅背景，佢係根據2015年葉門內戰撤僑行動一事改編。你可能仲未睇過呢部電影，但好似《激戰》、《證人》、《線人》同《破風》咁，總有一部你係睇過嘅！咁多部出色電影，全部都係林超賢導演，可以話係實力保證。《紅海行動》講外國發生政變，解放軍執行撤僑任務，有軍事顧問確保真實，血肉橫飛，打得好爽！
4 中佬熱血人生，《逆流大叔》
就係跟住你嘅鼓聲向前行
《逆流大叔》再次掀起咗香港人對本土電影嘅關注，呢類型嘅運動競技電影一直深受歡迎，好似最初嘅《狂舞派》，後嚟嘅《點五步》，都係以香港文化、地理做基礎，加上勵志熱血，喺近年香港就好似一支強心針咁。呢部電影講四條麻甩佬被迫參加龍舟比賽，又面對各自嘅中年危機，就算最後唔太成功，但都同我哋講，人生就係要Keep going，奮鬥落去！
3 兩大影帝對手戲，《無雙》
舉世無雙偽造成真嘅技藝
《無雙》有幾好睇？就算唔講精彩嘅故仔，只係睇周潤發、郭富城兩大影帝嘅對手戲，都值回票價喇！再睇埋導演係莊文強，《無間道》三部曲喎，香港影史嘅經典之作，真係信心保證。《無雙》周潤發同郭富城合作，遊走歐美各國，破解美鈔防偽技術。但呢個只係表層嘅無雙，電影入面故事隱藏著故事，誰真誰假，先係呢部劇情嘅精髓，等你嚟驗證。
2 港味本土溫情故事，《淪落人》
Still Human，殘而不廢
《淪落人》小品製作，但係劇情非常感人，刻劃嘅香港好少人仲會講，但仍然存在嘅人情味，人與人之間嘅互相信任、幫助。陳小娟首次自編自導，配上老戲骨黃秋生，表現非常出色。呢部電影講黃秋生因工傷而半身不遂，由有攝影才華嘅菲傭照顧，由最初兩位陌生人漸漸轉變為彼此支持，令人生從灰暗變成彩色，細細道來，毫不濫情，貼地咁向我哋講出人性溫暖。
1 現代香港都市寓言，《三夫》
不可思議但偏偏合情合理嘅奇幻之作
《三夫》係陳果「妓女三部曲」最後一部嘅力作，有影評話呢部電影就好似拉美魔幻寫實般嘅藝術作品，充滿咗好多深層嘅隱喻。例如，呢部電影以水上人生活為背景，係海上飄盪嘅船似乎亦係象徵咗本土香港人無根嘅不安。而陳果借用香港自古以來嘅人魚傳說，更係為呢部電影加上更多解讀空間。情慾之間嘅流動，本能嘅索求，都等緊觀者唔同嘅解讀，創造意義。
青黃不接？留意吓最佳新人喇
成日都有人話香港影壇無哂勁人，得返老一輩撐起成個演藝事業咁話喎！但好似古天樂咁講，演員不分年齡，最緊要係演技。其實有新人入嚟就證明呢個行業仲係生生不息，只係我哋對呢堆新人唔夠關注。如果我哋願意細心留意吓，會發現，哇原來好多新人都有出色嘅演技，絕對有潛力成為新嘅影帝影后。千其唔好只著眼喺香港影壇昔日嘅光輝，因為未來先係屬於我哋嘅。即刻睇睇第38屆香港電影金像獎最佳新演員提名先！
5 《L風暴》——栢天男
傳說中嘅金城武2.0
新一代靚仔栢天男，唔止睇得，仲好演得。好多網民都話，想睇佢有更多嘅演出，唔知佢有冇收到呢？要講佢出道以嚟暫時嘅代表作，係由林德祿執導嘅《L風暴》，亦都因為栢天男入圍最佳新演員最後五強，令呢部電影成為「反貪風暴系列」首部獲香港電影金像獎提名嘅電影。栢天男係電影入面扮演細個有自閉症，有暴力傾向嘅角色，咁高難度但都挑戰成功！
4 《三夫》——陳湛文
劇場新星殺入電影界
憑住《三夫》嘅「四眼」男主角，陳湛文已經成為金像獎最佳新演員最後五強。其實佢本身畢業於香港演藝學院戲劇學院，2017年《少年十五二十時》獲頒「第二十六屆香港舞台劇奬」最佳男配角奬、獲提名「第八屆香港小劇場奬」優秀男演員，2018年憑香港話劇團《迂迴曲》獲提名「第十屆香港小劇場奬」最佳男主角。絕對係值得香港人期待嘅新星！
3 《G殺》——林善
專研編劇，喜好音樂
林善喺《G殺》出演大提琴家，佢之可以能夠喺咁多人海選之中得到演出機會，正因為佢現實中亦都識拉大提琴，好適合呢個角色嘅定位。佢喺求學期間專研編劇，有一個導演夢。佢仲話，其實自己演戲經驗唔多，但係片入面嘅角色同自己好似，所以要做好呢個角色唔係太難。佢嘅個角色亦都好充足咁反映當下香港後生仔嘅心理，或者都同林善好似喇！
2 《淪落人》——姬素．孔尚治
要為少數族群發聲
來自菲律賓女演員嘅姬素．孔尚治，初次登上香港電影大銀幕，即刻廣受好評，有好多網民都畀好評佢。佢憑《淪落人》女主角殺入金像獎最佳新演員最後五強，仲殺入最佳女主角。更早之前，佢已經攞咗第13屆香港電影導演會年度大獎「最佳新演員」，可謂聲勢浩大，絕對係今次嘅大熱門。孔尚治演出菲傭，帶出在港菲律賓女性嘅生活同心聲，非常動人。
1 《逆流大叔》——胡定欣
唱得演得又跳得
胡定欣由最初參加《全球華人新秀歌唱大賽》唱歌，後嚟參演《衝上雲霄》一劇，更北上挑戰《舞動奇跡第二季》，每次改變，胡定欣都有出色嘅表現，出道無耐已經證明佢唱得演得又跳得嘅全能形象。又點諗得到，係佢兩奪兩屆TVB視后之後，佢會連電影都撈埋一份噃。2018年，胡定欣首次參演電影《逆流大叔》，多年演出經驗，自然有好表現，成為最佳新演員嘅大熱門。
分析說明：
本研究資料分析時間範圍為2018年04月07日至2019年04月08日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『香港金像獎最佳電影及最佳新演員最後五強 』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :