當你見到天上星星，可會想起我
2019年5月16日，世界自此少咗一個偉大嘅建築師，「現代主義建築嘅最後大師」貝聿銘離開咗塵世，思憶前人風采，我哋痛失咗文化嘅巨星。慶幸嘅係，正如許許多多曾經喺香港留下足跡，留下文化遺產嘅偉大心靈，即使佢哋離開塵世，依然繼續發揮佢哋正面嘅影響力，令香港人能夠動力往前，令香港能夠更加美好。其實，除咗貝聿銘，香港仲有好多喺天上嘅巨星，佢哋嘅光芒一直照射緊我哋，留低嘅遺產，值得我哋好好嘅檢視。今日DailyView就細數對香港有貢獻嘅逝世人物，等你對香港了解更多，亦都更加了解佢哋嘅偉大之處。
DV小教室：香港網路大數據觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
何弢，與香港同在
——香港區旗、區徽設計師
2019年3月29日，何弢離開咗我哋，一代建築師、設計師逝去，令人惋惜再三。我哋成日見到香港嘅區旗、區徽，其實都係出自何弢之手。何弢唔止設計呢兩樣嘢，佢仲為香港留下咗好靚嘅建築物，灣仔嘅香港藝術中心，係何生嘅代表作。佢仲曾經為咗中央圖書館嘅設計勇敢咁表達意見，佢嘅風骨同言行代表咗建築師嘅良心。何生留俾香港嘅，唔止有形，更多係無形嘅。
何藩，東方布列松
——鏡頭細訴香港光影
何藩，係國際級嘅香港攝影師、電影導演，佢嘅電影《心鎖》更被國際級成人品牌Penthouse引薦到日本發行，真正衝出國際。佢退休之後去美國定居，係家人鼓勵之下，佢重拾昔日嘅鏡頭，同Modernbook Gallery合作，舉辦影展。何藩攝影嘅主題以香港為主，出咗《香港追憶》、《人生舞台》同《香港‧往日情懷》，可謂香港三部曲，為香港攝下咗無數經典嘅照片。
余光中，香港情人
——十一年詩居馬料水
「香港是一種鏗然的節奏／吾友用一千隻鐵輪在鐵軌上彈奏」，余光中詩作〈九廣鐵路〉。余光中講過，香港對佢嚟講係情人，充滿浪漫同激情，恰恰係佢留喺中文大學執教嘅十一年，佢寫下咗無數經典嘅詩、散文，當中唔少都同香港有關。余光中獨愛沙田，出過《文學的沙田》散文集，佢用文字將沙田呈現俾香港人以至其他華文地區嘅人見到，十一年創造咗永恆嘅在地文學。
貝聿銘，建築大師
——香港中國銀行大廈設計者
2019年5月16日，「現代主義建築嘅最後大師」貝聿銘離開咗塵世。貝聿銘留低嘅價值，空間嘅藝術，真係歷久不衰，超越咗個己生命，化成人類文明史上嘅坐標。美國華盛頓特區國家藝廊東廂、法國巴黎羅浮宮擴建工程、1970年日本萬國博覽會中華民國館等，每一個都係貝聿銘嘅經典建築。香港中國銀行大廈，正係出自大師之手，令香港坐擁世界級知名嘅藝術建築。
麥理浩，香港總督
——香港嘅「麥理浩時代」
麥理浩，1971年出任香港港英時期嘅總督。佢做得有幾好？好到連任咗四次，成為港英時期任期最耐嘅香港總督，人見人愛，史稱佢嘅任內治理嘅時間為「麥理浩時代」。係呢段香港發展嘅黃金時期，佢為香港留低咗好多公屋、好多新市鎮，仲有「香港勝在有ICAC」嘅廉政公署。政策方面有九年免費教育、設立郊野公園、興建地下鐵路同地方行政改革等，無佢，香港一定無咁風光。
古龍，傲世鬼才
——小李飛刀，例不虛發
武俠小說家古龍，佢喺香港出世，後嚟屋企人連同佢移居台灣。相信大家都知佢著作等身，寫嘅書加埋隨時壓得死你，好似《楚留香》、《多情劍客無情劍》、《絕代雙驕》、《陸小鳳》咁，都一一被香港邵氏改拍做劇集、電影。除咗金庸，我哋睇得最多嘅武俠小說、電影，就係古龍。雖然「小李飛刀成絕響，人間不見楚留香」，但佢嘅作品仍然深刻嘅我哋腦海中栩栩如生。
劉以鬯，香港文學之父
——香港人都知嘅〈打錯了〉
王家衛電影《花樣年華》、《2046》，相信香港人就算冇睇過，都一定聽過嗰名。王家衛就講過，呢兩部電影都受到劉以鬯意識流小說代表作《酒徒》影響，先會呢兩部經典電影出現。「生銹的感情又逢落雨天，思想在煙圈裡捉迷藏」，劉以鬯先生一生都不斷追求創新，好多前衛嘅作品，香港文學嘅奇葩。作為南來文人，佢嘅成就同影響力大到被人稱為「香港文學之父」！
高錕，諾貝爾物理學獎得主
——世界「光纖通訊之父」
如果無高錕，我哋今日上網一定冇咁快！高錕2009年獲得諾貝爾物理學獎，係物理學之中最高榮譽，千百萬人之中獨佔鰲頭，真真正正嘅香港之光。佢太太幫佢致謝嘅公開信，提及佢喺香港讀高中，喺中文大學教書、做校長，喺埋呢到退休，「是個名副其實的香港人」。高錕除咗留低嘅光纖科技，另一令人津津樂道係佢嘅教書典範，非常支持學生嘅言論自由，令人敬仰。
李小龍，絕世高手
——截拳道創始人
李小龍，功夫電影嘅傳奇，一句「中國人唔再係東亞病夫」，振奮咗無數龍的傳人。如果無佢率先一手一腳打入荷里活，香港電影相信無咁快風靡全球。李小龍嘅武打絕對係真材實料，係佢嘅著作《李小龍：生活的藝術家》，將哲學同武術合二為一，將功夫視為自我解放之道，相當精彩。1973年逝世，到今日不論香港定外國，都有人繼續學緊佢嘅功夫，傳承佢嘅文化遺產。
金庸，一代宗師
——留下十四部天書
華文界武俠小說顛峰，文學界一代宗師金庸，查良鏞先生。「飛雪連天成絶響，笑書神俠留人間」，2018年10月30日，武俠大師笑傲江湖之後，羽化仙去，廣陵散從此絕響。如果無咗金庸嘅小說，我吔唔單止無咗精彩、經典嘅文字，亦都連埋佢咁多小說改編嘅電影、劇集，嗰種快意恩仇、敢愛敢恨嘅武俠世界，都唔會存在。一代宗師，影響咗一個時代嘅人。
叮噹可否不要老，伴我長高
張敬軒唱：「時光這個壞人，偏卻冷酷如許，離場慢些，也不許。」如果世上真係有神，時間或者係佢哋最殘酷、最大公無私嘅法令，等我哋無法抗拒，只能夠默默咁接受。世界咁多傑出嘅風流人物，都一一被大江東去浪淘盡，化為歷史。世界咁多偉大嘅心靈，隨住佢哋逐一離去，但唔代表一切都化為虛無，因為佢哋留低嘅文化遺產，仍然都發光發熱，好似黑夜中海岸上嘅燈塔，照亮過去、未來。我哋細數咗咁多位係唔同領域深刻咁影響到香港嘅逝者，更應該承接佢哋嘅精神，努力嘅守護、發揚香港嘅文明之光。
分析說明：
本研究資料分析時間範圍為2018年05月23日至2019年05月22日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『對香港有正面且具體影響嘅逝者』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :