抽水對象變中國男神？
2003年參加全球華人新秀歌唱大賽，won the competition但喺香港發展一直無咩起色，之後靠的士陳紅咗一排，又慢慢無聲無氣。係香港個個比人笑咗咁多年嘅佢，幾年前返中國發展，搖身一變成為中國男神，你有你笑，佢有佢繼續賺人民幣。呢排陳偉霆登上Google嘅熱門搜尋，又係咁喺Facebook瘋狂洗版，今日就等DailyView網路溫度計透過《KEYPO大數據關鍵引擎》話你知網友討論數據，一齊嚟睇睇最近關於陳偉霆嘅幾件事，到底係咪我哋香港人無眼光，唔識欣賞的士陳呢？
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
一個廣告可以幾多人重新配音／二創？
陳偉霆 What time is it ?
嚟喇嚟喇，陳偉霆從來唔會令大家失望，今次呢個廣告又成功帶起熱潮，大家都食住個勢爭住模仿！
係新秀歌唱比賽出身，雖然咁多年嚟一直人氣麻麻，但去到中國發展搖身一變成為一線男神，節目一個接一個。做咗潮人男神，好多品牌都搵佢合作。呢個Chanel廣告入面，陳偉霆英文同普通話都講曬，唔少人笑佢口音，不過致命傷其實都係佢招牌嘅誇張演技，唔少網友都話真係笑到人心都寒埋。
雖然比人笑，不過唔緊要！以一個廣告黎講，可以得到咁多人關注、討論，都係好事黎嘅！
黃建東Lunch Box版
參與香港先生入行嘅黃建東二次創作惡搞都唔係第一次，2016年個時將洗腦日文歌“PPAP” 改編為港式粗口版，一時成為網上瘋傳短片。
今次陳偉霆廣告出黎之後，佢都好快手呀，六個鐘頭就翻拍「食lunch」版，無論誇張表情、做作語氣都模仿得十足十！加埋自己改嘅對白： "I ding my lunch box"， "the moment I hug my goo ma"，諷刺陳偉霆港式英文，唔少網友都大讚佢翻拍得好好，有笑點之餘又抽水抽到應一應。
曾經係香港話劇團全職演員，果然係專業嘅！
蕭叔叔出品必屬佳品！
蕭叔叔講英文好聽就係人都知，平時喺FB page：「蕭叔叔英式英文學會」教人英文。今次陳偉霆呢段廣告英文係咁比人笑，擁有一口標準英式口音嘅蕭叔叔，比一班網民要求整返個「配音版」，示範標準讀法，仲加上一句：Please tell this uncle to get a life. 都幾串下！
「田叔叔港式英文學會」？
今次陳偉霆廣告可以話真係好成功，連田北辰都出馬抽埋一份水，仲要開返個「田叔叔港式英文學會」，政治人物嚟講都算好貼地。除咗用佢「辰級英文」幫佢配音，完美演繹一次之外，之後仲用埋「辰級普通話」，連普通話都配埋。雖然田二少d普通話未去到非常流利，不過網民話：已經夠做澳門特首！
懲教署都唔執輸啊！
近排政府抽水都唔執輸，上次安心事件廉政公署都好快手，藉住呢個爆紅話題抽水加宣傳，雖然都有人批評咁樣嘅宣傳方式同廉署正直、專業形象唔係好吻合。今次陳偉霆嘅廣告相對之下，唔係咩負面題材，懲教署就跟得好貼喇，快手出咗段由二級懲教助理Saleem Humzah拍嘅宣傳片，分享佢職業生涯，廣東話都講得幾好㗎！
網友最關注佢仲有呢啲事
阿拉丁中文版主題曲
阿拉丁最近咁紅，經典主題曲A whole new world 再次掀起熱潮，而中文版主題曲《新的世界》就由陳偉霆同張碧晨合唱。張碧晨係中國好聲音冠軍，唱功毋庸置疑。相對之下陳偉霆就好輸蝕喇，向來唱功、舞蹈、演技都俾人好多驚喜嘅佢，今次一樣令網友感嘆：「到底點解會紅？」、「好似一啲籌款活動裡面啲女歌星帶著總理總理個仔唱咁」、「從未想過我可以用猥褻來形容一個人的歌聲」斷氣缺氧式唱法，真係聞者流淚。
驚人浮誇演技
講到演技，陳偉霆2015年有份參與嘅作品《活色生香》可以話係佢經典之作。入面攬住要就嚟死嘅愛人喊住講出深情對白，誇張表情被做成唔少「表情包」，公認係最尷尬喊戲，被譽為「世界級演技」！網友表示「總有人可以將喊戲演出喜劇效果」、「論哭戲，我只服陳偉霆」。連佢本人都好後悔，話如果有時光機，返去當時一定唔會咁樣喊wor。不過樂觀啲諗，起碼都成功引起關注啦，娛樂吓大家都幾好呀～
嚮往的生活嘉賓
就算舞蹈、唱功、演技俾人笑唔緊要，上吓綜藝節目點都會好啲掛！香港撈唔掂，轉去北上發展嘅陳偉霆，早前參與中國一個入面好受歡迎嘅節目《嚮往的生活》喺第三季擔任嘉賓，入面無架子咁真實表現自己，製造出唔少節目效果。
喺節目度陳偉霆買餸講價、落田插秧、釣魚統統好落力，咁認真，點都有挽回少少分數啦。
最潮菠蘿頭
被英國雜誌I-Magazine評選為「亞洲最時尚面孔」，4月參加Chanel品牌Party都用招牌菠蘿頭見人吸引唔少鏡頭。
Chok 曬樣擺Pose，迷倒一班Fans，不過呢啲咁潮嘅髮型就唔係人人都carry到，所謂「撐得起就型，撐唔起就.......」，至於陳偉霆夠唔夠班撐起呢個頭，就見仁見智啦～
同迪麗熱巴拍拖？
陳偉霆出道以黎，緋聞唔算好多，對上一次公開戀情係同阿SA拍拖，再之前就係Angela baby，網絡流傳名句「而我不知道陳偉霆是誰」，就係由Angelababy老公黃曉明講出黎架喇。之前因為拍攝《古劍奇譚》傳出同迪麗熱巴撻著，雖然陳偉霆公司好快出嚟否認，不過兩個人互動咁親密、又被影到著情侶衫，相信大家都唔會咁容易放過佢地。
分析說明：
本研究資料由《KEYPO大數據關鍵引擎》提供，分析時間範圍為2018年12月03日至2019年05月31日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『陳偉霆』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :