數據看破：連登生態
全香港最多人上嘅大型討論區，LIHKG，網民幫佢改咗個中文名，連登。天下大勢，合久必分，連登活躍網路嘅年齡唔長，2016年，因為高登同另一非官方APP「HKG+」發生爭執，連登喺呢個時候出現，好多人都決定由高登移民去新論壇，令到連登即刻爆紅，人數規模至今都遠超其他香港討論平台。連登作為香港網路文化嘅集散地，幾乎要了解香港網民，就一定要上連登。不過，連登並唔係睇落咁簡單，有好多潛規則，好似唔好打5P字咁，隨時俾人罵埋伯母。今日就等DailyView用網路大數據話你知，連登二十大開Post標題常用語，俾大家一文了解連登生態。
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
20 一人N＿(7222筆)
——集思廣益
[一人N個]我個仔啱啱出世，我姓劉，想請問各位巴絲打有咩好名可以用，要霸氣嘅！[一人N首]最近拍咗七年嘅女朋友帽咗我，求分手勵志歌⋯⋯[一人N次]頭先忍咗好耐先搵到廁所，求一人一個相似經驗分享。好似呢種標題，喺連登成日都會出現，要各位巴絲打一齊集思廣益，分享自己經驗。不過呢，往往會同樓主諗法相反，會有大量搞笑留言，趣味指數極高。
19 日經/月經/年經(8159筆)
——oldnewisso唔識串
[日經Post]想請教各位哲學大師，人生到底有咩意義？[月經Post]留低你手機而家Wallpaper！[年經Post]聖誕節又就快到，想請問各位巴絲打有咩好地方去，想同屋企人開開心心過一日。無論係日經、月經定年經，都係話呢種Post成日會出現，係一種永恆嘅話題，每過一段日子都會再有人傾。舊，並唔係無聊，反而代表咗呢種Post相當有話題性，都係連登嘅重要特色。
18 hehe(11306筆)
——支持多元成家
全港最大型嘅同性戀網上討論區，連登。網民成日都講笑咁講，話連登係香港最多同性戀巴打上嘅論壇。可能因為香港社會相當保守，網路變咗其他性取向可以吹水傾計嘅地方，都一再表現咗連登多元性向嘅特色。好似有人開Post前面會用[hehe]，就係代表入面內容會同男同性戀相關。點解？兩個he喎，即係兩個男性喇。hehe咁開心，有興趣嘅巴打，記得留意呢個字眼喇！
17 有甜/無甜/重甜/甜(13419筆)
——唔該重甜呀
人生有百味，五味最常在，人生流流長，就有人用五味嚟形容人生，酸甜苦辣咸。咁人生之甜，莫過於愛情，嘅兩性嘅巫山雲雨，緊加係甜之中甜。所以喺連登見到[有甜]、[無甜]，正係講緊有冇色色嘅成份。呢種形容詞，最多出自「講故台」，皆因現實邊有咁多甜，可以甜嘅多數都係出自FF幻想。好多網民都會留言，唔該重甜呀！加甜呀！咪就係想要睇更多愛情動作囉。
11 秒回(42491筆)
——係咪Bot
網路發達，科技一日千里，最能夠體現係人類社交。以前古人尚且要飛鴿傳書，家書抵萬金，但係而家現代人溝通，唔係秒回嘅話，隨時都會焦慮到不得了。網上討論區，成千上萬嘅人在線，在咗佢又點再怕無人秒回你？正因為咁，連登都有大量呢種[秒回]Post，仲要周不時都喺深夜時份出現，求巴絲打秒回傾計，解決內心嘅寂寞。如果你瞓唔著，想唔想開返個秒回Post呢？
10 長文(47401筆)
——好文共賞
網上社交平台最俾人睇唔起，最受人批評嘅地方，就係在於網上討論太過淺薄，個個都係Too long didn't read，根本無深度可言。但係呢，文化事業仲係有人熱心去搞，成為網路之中嘅清流。呢種人好醒目，開Post之前必定注明[文長必看]、[文長注意]等字眼，大家點入嚟之前，已經有心理準備要睇千字文。呢種[文長]Post喺連登排名有第十，都證明大家其實幾有文化喎。
7 召喚(76660筆)
——志同道合
古有高登你的樣子如何巴打，今有連登肥絲大隻，兩個都係知名會俾巴絲打召喚嘅對象。不過[召喚]Post，唔一定只係召喚網路名人嘅。皆因網路上有好多唔同身份、年紀、與趣嘅朋友，佢哋都成日會喺連登開[召喚]Post。召喚咩？[召喚九十後吹水]、[召喚行山巴絲一齊行山]、[召喚IT狗分享返工苦況]等等，三五成群，個個好人。你都有想召喚嘅對象？一齊上連登體驗吓喇！
4 你問我答(149536筆)
——問咗未必答
[你問我答]絲，77歲，你問我答。[你問我答]脫髮救髮、植髮、用藥、買藥、幫買及謬誤討論。[你問我答]有關考鋼琴演奏級之你問我答(ATCL至FTCL)。以上個個都係真Post，仲有好多更加特別，每次出現呢種Post總係特別吸引，皆因可以睇到來自五湖四海嘅人分享經驗。不過真真假假，都真係上連登勿認真，有時仲會問咗都唔答，唔好咁高期望，但的確有唔少高質Post。
3 有圖/無圖/多圖(246608筆)
——唔好做不孝子
正所謂上連登出Post無圖，隨時會俾各位巴絲打問候雙親，咁閣下無緣無故令自己父母出事，緊係相當不孝嗱。連登出Post，通常有個定理，多圖等於一張圖，有圖等於無圖，無圖就真係無圖。有圖無圖，有人問候有人不孝，都係連登生態常見嘅一環。[多圖]爆乳台妹性感抖動，一手不能把掌握的神秘玉乳。試諗吓，如果你入到呢種Post發現一張圖都無，相信你都會大罵出口。
1 突發(796579筆)
——馬總統睇手錶
今時今日，做香港媒體嘅，一定會有人負責專門睇住連登，皆因連登嘅話題，隨時係香港人茶餘飯後熱議嘅八卦趣談。而且連登仲周不時會有一種Post，好多記者都可能靠佢先收到風。[突發]生化危機3重製版封面洩露！[突發]粉嶺公路巴士撞樹多人受傷。呢種新聞，可能連記者都未必咁快知，但就會先喺連登出現。不過更多突發，係無聊到同馬總統睇手錶一樣嘅，呢種都係連登生態。
【以上圖文為香港網路溫度計調查結果，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2018年12月18日至2019年12月17日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『LIHKG十大標題常用詞』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
分享本篇文章
你可能也會喜歡這些文章 :