老套啲講返句「入圍已經係肯定」
因應全城抗疫，連金像獎都都取消咗公布名單嘅記者招待會，改用網上宣布入圍電影。今屆關注熱點唔單止有第六度被提名最佳女演員嘅Sammi，今次仲要係雙提名入圍，封后嘅呼聲相當高。而入圍最佳新演員嘅最終五強亦係亮點之一，DailyView今日用網路大數據帶你睇吓2019年度香港電影交出嘅成績單，有無邊套電影又咁啱係你心水呢！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
5《叔‧叔》—唔一樣嘅香港愛情故事（994筆）
被台灣影評人聞天祥大力推薦為「年度最好嘅香港獨立製片」，《叔‧叔》探討一個隱晦又確實存在嘅議題—講一個關於香港「深櫃老基佬」嘅故事。選題非常特殊，亦有跡可循，導演楊曜愷係香港同志影展創辦人，過往作品亦以同志議題為主打。今次由演技派太保、袁富華雙主角領銜主演，演繹出唔一樣嘅香港老男人。性別議題近年成為國際影展上嘅熱門題材之一，《叔‧叔》早於第56屆金馬獎獲得五項大獎提名，兩位主角一齊入圍最佳男主角，實力可見一斑！
4 《少年的你》—班底實力超強嘅話題之作（1550筆）
《少年的你》講述嘅唔係一般香港故事，而係以內地高考為背景，由校園霸凌事件發展成懸疑犯罪片。《少年的你》同樣係原著小說改編電影，有小說粉網民大嘆電影只能算「擦邊球」輕輕帶過霸凌主題，不過喺內地電影評審制度下，電影成果已算不俗。除咗有金馬影后周冬雨主演之外，本屬偶像團體TF Boys一員嘅易烊千璽擔綱做男主角，內地影評一致認為超水準發揮，由之前大受好評嘅《七月與安生》班底製作，呢部電影氣勢如虹咁再次獲得金像獎12項提名。
3《麥路人》—金融社會下無家可歸嘅悲歌（1682筆）
以往港產片都以警匪片見長，不過近年趨勢都著重於刻劃社會上嘅小人物，喺電影深度上更往社會議題靠攏。《麥路人》就以喺快餐店借宿嘅流浪漢為題材，演繹金融社會下嘅貧富懸殊狀況，議題雖然沈重，不過劇情帶出嘅訊息可算正面激勵。充滿著人民情感嘅《麥路人》除咗獲邀成為「倫敦東亞電影節」的閉幕電影外，主演城城（郭富城）更因此奪得影帝寶座。喺歐洲首映後獲得電影節評審嘅高度評價，口碑就爆晒棚啦，就睇可唔可以擄獲埋香港評審嘅心啦。
2 《花椒之味》—夠晒催淚嘅溫馨作品（6494筆）
改編自張小嫻嘅原著小說《我的愛如此麻辣》，由Sammi領銜做大家姐，加上台灣演員賴雅妍及內地演員李曉峰，飾演同父異母嘅三姐妹，分別喺香港、台灣、重慶長大生活，初次見面竟然係爸爸喪禮，及後一見如故成為互相扶持嘅家人。電影唔單止打親情牌，更似著重於女性面對親情同社會嘅考驗。電影上映無幾耐已經正評不斷。除咗Sammi被提名影后之餘，導演麥曦茵更獲提名最佳導演及最佳編劇等獎項，連同賴雅妍亦入圍最佳女配角，共計獲11項提名，可謂今屆大熱門之一。
1 《新喜劇之王》—孭住經典嘅姐妹作（7152筆）
星爺同邱禮濤操刀合拍嘅《新喜劇之王》，當時未上映就已經有兩極嘅反應，有啲網友認為係將20年前嘅經典炒冷飯，有啲網友甚至狠批前作《喜劇之王》連經典都算唔上。不過隨住影視文化越來越成熟，原本充斥著「無厘頭」評價嘅劇情大家開始睇得明，識睇電影嘅都知《喜劇之王》一啲都唔名符其實，本質上就係一齣茄哩啡追尋夢想嘅悲劇。講到明唔係當年《喜劇之王》嘅續集，但呢部用女性茄哩啡視角講同一個關於「演員的自我修養」嘅故事，會唔會奪獎成為新一代經典呢？
令人眼前一亮的最佳新演員
以往有人夢想拍戲，都會被人笑話「發明星夢」。不過隨著演藝培訓嘅興盛，每年投入影視圈嘅新人競爭都非常激烈，可以成功獲得電影角色，仲要出演到令人留下深刻印象，中間嘅努力並唔係發夢咁簡單嘅事。跟住落嚟我哋就一齊睇吓今屆入圍嘅最佳新演員！
5 區嘉雯《叔·叔》—資深舞台劇皇后級嘅新演員（104筆）
上面講到《叔‧叔》被譽為全年最佳香港獨立製片，除咗題材新穎之外，歸功於選角全部都係實力派班底。耕耘香港話劇圈多年嘅區嘉雯，喺戲中飾演主角之一嘅老婆，身處貌合神離嘅婚姻當中表現非常無奈，爐火純青嘅表演除咗成功首度入圍最佳女配角之餘，更以資深級姿態網羅最佳新演員嘅提名，睇來轉戰舞台一啲都難唔到佢啊！
4 李宛妲《葉問4：完結篇》—王家衛選中嘅混血美女（194筆）
越演越國際化嘅《葉問》系列，今集亮點可以話係同甄子丹做文戲嘅新人女演員—現年16歲嘅李宛妲 (Vanda)。濃眉大眼、身材高挑嘅Vanda係中德混血兒，被媒體廣為報導佢自細喺雲南雨林區長大，十分有仙氣。Vanda氣質同外貌俱備，仲要係被國際名導王家衛簽下嘅新星，今次入圍最佳新演員獎，相信距離擔綱主角嘅日子唔遠啦。
3 劉俊謙《幻愛》—香港本土潛力影帝（202筆）
話就話入圍新演員，但其實香港觀眾對劉俊謙應該唔陌生。有份出演熱門劇集《瑪嘉烈與大衛系列 前度》嘅劉俊謙，從事香港演藝工作已有些時日，首次轉戰大螢幕亮相嘅佢，今次挑戰嘅角色係精神病康復者，發揮嘅水準亦都得到肯定。早前喺第26屆香港電影評論學會大獎獲封最佳男演員，唔知會唔會一舉攞埋金像獎呢？
2 鄂靖文《新喜劇之王》—顏值成謎嘅星女郎（220筆）
喺《新喜劇之王》兩極嘅評價當中，主演鄂靖文同樣備受關注，有網民就張柏芝等高水平女星為參考，評價佢為歷年顏值最低嘅星女郎，反之亦有影評認為選角合理，畢竟主角人設就係一位茄哩啡，生得太靚你都出戲啦。本身係內地綜藝圈以搞笑小有名氣嘅鄂靖文，唔知今次會唔會獲獎加持成為「高顏值嘅實力派諧星」呢？
1 易烊千璽《少年的你》—成功擺脫偶像包袱嘅演技（257筆）
如果話入圍最佳新演員係對演技嘅一種肯定，同樣問鼎最佳男主角的易烊千璽，毫無疑問係影視圈嘅一粒新星。《少年的你》入圍最佳電影，劇情發揮已在水準之上，加上有影后周冬雨帶著做對手戲，電影上映之初有唔少影評已經對呢位本身係偶像嘅少年，留下深刻嘅印象。初入影視圈就有咁樣嘅提名成績，潛力不容忽視啊！
網路溫度計香港版嘅Telegram開咗喇！快D嚟follow我哋啦→https://t.me/dailyviewhk
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年01月01日至2020年02月14日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『金像獎最佳電影、金像獎最佳新演員』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
分享本篇文章
你可能也會喜歡這些文章 :