今屆香港電影金像獎，最有印象可能係龍蝦裝
image source: 香港電影金像獎 Hong Kong Film Awards Facebook
2024 香港電影金像獎早前喺4月14號已經完滿結束，《金手指》成功橫掃 6 個獎項，成為當晚嘅大贏家，而《白日之下》則獲得最佳女主角、最佳男、女配角三大獎項，真係恭喜晒！其實呢幾年每部香港電影無論係劇本、演員、燈光夠晒誠意，而攞獎都唔代表網路討論趨勢，所以今日就等網路溫度計用網路大數據話你知，香港金像獎電影 TOP 10 熱門討論排行！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
NO.10 《1人婚禮》
《1人婚禮》喺2023 年賀歲檔期上映，由《幻愛》導演周冠威執導，嗱，呢部話就話係愛情喜劇，其實當中都有唔少寓意，例如係點樣面對自己、重新審視自己嘅需求。雖然部分內容唔係人人接受到，但作為低成本電影嚟講，有如此表現已經令人驚喜！而女主角吳冰曾為戲宣稱「票房超過一千萬將會Show 三點式泳裝照」，可惜撞正《毒舌大狀》，票房仆直，冇得睇！
網民：「成個劇情睇完都唔明講緊乜，誇張得黎又無厘頭！」
NO.9 《七月返歸》
《七月返歸》由白靈及MIRROR 成員AK江𤒹生出演，雖然金像獎只獲最佳美術指導同視覺效果提名，但上映後畀英國《衛報》評為係香港最好睇嘅恐怖片，更入選美國紐約亞洲電影節，成為港片之最！而《七月返歸》絕非一般鬼片用jump scare （突發驚嚇）嘅方式嚟嚇人，而係將恐懼嘅氛圍慢慢滲入觀眾腦中，打從心裡毛骨聳然。你以為最驚嘅係鬼，其實係人⋯⋯
網民：「AK江𤒹生意外地演技大突破！」
NO.8 《填詞L》
《填詞L》呢部熱血追夢式電影係根據編劇及執導黃綺琳嘅個人經歷改編，自己出錢，製作陣容全部係創作人，將小眾冷門嘅職業推上大熒幕，試問邊個有Guts？而黃綺琳真係做到！成功憑《填詞魂》奪得第42屆香港電影金像獎最佳原創電影歌曲。喺香港地夢想可以當飯食？睇完學羅穎詩，追L咗先講啦！
網民：「想拍電影就自己拍，大癲！」
NO.7 《命案》
《命案》聽名就知係關於懸疑驚悚片，今次MIRROR 隊長楊樂文（Lokman）孖住影帝林家棟齊齊做男主角，以戲探討命運與人嘅連結，兩位演技紛紛被觀眾及影評人大讚，不過最後兩位連最佳男主角都冇緣提名，原因好可能係雙男主嘅關係，同時分薄支持者票源⋯⋯唔緊要啦，好嘅電影依然會有收獲，因為⋯⋯《命案》榮獲最佳導演、最佳編劇同最佳剪接！恭喜晒！
網民：「係只有香港人先拍得出嘅味道！」
NO.6 《但願人長久》
《但願人長久》係香港導演祝紫嫣自編自導自演首部長片，請來台灣金馬影帝吳慷仁坐陣飾演道友老竇，舉手投足演咩似咩，影帝果然係影帝！而女主角謝咏欣憑呢部戲一舉勇奪最佳新演員獎，年僅22 歲即成為香港指日可待嘅新生代演員，佢曾接受訪問時表示感謝祝紫嫣導演係旺角街頭邀請試鏡，先有今日咋！大家估下點解吳慷仁只係畀提名最佳男配角，而唔係男主角？
網民：「睇嚟要成日落旺角畀星探發掘！」
NO.5 《潛行》
香港犯罪電影年年都有，《潛行》有咩咁特別？由劉德華監制又演埋已經夠啦，仲要華仔喺《潛行》飾演人面獸心，人前扮晒斯文律師，人後就係心狠手辣嘅毒販，反差感問你死未？而呢部戲唔單只有劉德華，仲有林家棟、彭于晏，陣容強大，不過唔知係咪題材問題，今屆金像獎只獲最佳攝影同最佳動作設計提名，實在可惜！
網民：「又係劉德華，又係警匪片，悶唔悶？」
NO.4 《年少日記》
《年少日記》以倒敘嘅方式帶領觀眾走入學生輕生嘅事件，日日被受「極端教育」同時感受唔到家庭溫暖，對小朋友嚟講無疑係極大嘅童年創傷。呢部電影上映嗰陣撞正香港學童自殺潮，受到唔少香港人熱烈關注議題，《年少日記》成為香港2023年港產電影票房第二名。劇本令人深思，演技逼真，再加上導演功力一流，唔怪得一次提名12個獎項咁犀利啦！
網民：「因為好日常，所以睇到喊晒⋯⋯」
NO.3 《白日之下》
《白日之下》呢部戲嘅內容改編十年前香港老人院性侵、虐待醜聞，內容非常敏感嫁，就連戲中出演反派院長嘅林保怡都一額汗，直言「自己都好憎自己」！雖然一般講香港社會議題嘅電影票房成績都唔錯，但唔知係咪經濟差而有所影響，《白日之下》票房只有2,000萬，不過喺金像獎中橫掃16項提名，最後更獲頒最佳女主角、男女配角獎，一部好電影，係台前幕後一齊拼搏，多謝仍然會堅持嘅你哋！
網民：「見到老人家裸體等沖涼，唔敢相信真係發生過⋯⋯」
NO.2 《金手指》
《無間道》班底闊別20年重組，劉德華同梁朝偉同臺上演你追我趕，以前浸香港電影味返留晒嚟！雖然救到全港票房成績，但有唔少網友認為劇情dum波鐘，角色又冇深度，唔係有班演技出色嘅演員都頂唔緊！不過似乎金像獎逆風而上，一個唔該梁朝偉第六次拎影帝，《金手指》都拎咗6個獎項。唔知佢會唔會跟導演王晶建議唔再領奬呢？
網民：「呀Sa 做邊套戲都好似做返自己咁LOL」
NO.1 《毒舌大狀》
《毒舌大狀》以最快記錄打破賀歲片突破四千萬票房嘅電影，原本以為黃子華再演又係喜劇角色，點知今次打破定律，用角色道出法律公義嘅故事，劇情內容加埋精華金句，網友大讚有料又大快人心！而對手楊偲泳演戲經歷冇咁耐，但壓場感絕對唔遜色！可惜嘅係口碑、票房都極好，最後都只拎到最佳電影！
網民：「好睇但子華拎最佳男主角又好似冇咩料！」
【以上圖文為香港網路溫度計調查結果，未經授權請勿轉載改寫】
分析說明：
本研究資料由《KEYPO大數據關鍵引擎》提供，分析時間範圍為2023年1月1日至2024年4月20日。KEYPO觀測港澳地區萬個網站頻道，包含新聞媒體、Facebook、Instagram、YouTube及各大討論區、BLOG等，針對本議題相關文本內容進行分析，並根據網友就該議題之討論，作為內容撰寫依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
分享本篇文章
你可能也會喜歡這些文章 :